Testigonan di Jehova—Ken Nan Ta? Kico Ta Nan Creencianan?

Kico Ta Nan Creencianan?

Testigonan di Jehova ta kere den Dios Todopoderoso, Jehova, Creador di shelu i tera. E maraviyanan cu diseño complicá cu ta existí den e universo rond di nos, mes ta duna prueba razonabel cu un Creador poderoso cu inteligencia supremo a producí nan tur. Mescos cu e trabou di hende homber i muher ta reflehá nan cualidadnan, asina ta cu Jehova Dios tambe. Bijbel ta bisa nos cu “su cualidadnan invisibel ta ser mirá claramente desde creacion di mundu padilanti, pasobra nan ta ser percibí den e cosnan trahá.” Tambe, sin bos of palabra, “shelunan ta declarando e gloria di Dios.”—Romanonan 1:20; Salmo 19:1-4

TERA . . . creá dor di Jehova . . . cuidá dor di hende . . . habitá pa semper

Hende no ta forma pochi di klei of traha aparato di television i computer sin un propósito. E tera cu su creacion di mata i bida animal ta muchu mas maraviyoso. E structura di curpa humano cu su biyones di cel ta bai mas ayá di nos comprendimentu, asta e celebro cu nos ta pensa cuné ta incomprendiblemente maraviyoso! Si hende tin un propósito ora nan ta inventá cos relativamente insignificante, sigur-sigur Jehova Dios tabatin un propósito pa su creacionnan extraordinario! Proverbionan 16:4 ta bisa cu en berdad ta asina: “Tur cos Jehova a traha pa su propósito.”

Jehova a traha tera cu un propósito, manera el a declará na e promé parehá humano: “Sea fructífero i bira hopi i yena e tera . . . , tene dominio riba piscá di laman i riba criatura buladó di shelu i riba tur criatura bibiente cu ta move riba tera.” (Génesis 1:28) Dor cu nan a bira desobediente, e pareha aki no a yena e tera cu famianan hustu cu amorosamente lo a cuida tera i su mata i bestianan. Pero nan fracaso no ta pone Jehova su propósito fracasá. Miles di aña despues a ser skirbí: “Dios, e Formador dje tera . . . , cu no a cre’é simplemente pornada.” El “a form’é asta pa ser habitá.” Lo e no ser destruí. No, “tera ta keda pa semper.” (Isaías 45:18; Eclesiástes 1:4, The New English Bible) Jehova su propósito pa tera lo realisá: “Mi mes conseho lo ser realisá, i tur loke ta mi deleite lo mi haci.”—Isaías 46:10.

Pues, Testigonan di Jehova ta kere cu tera lo keda pa semper i cu tur hende, bibu i morto, cu lo pas den Jehova su propósito pa un tera hací bunita i habitá, lo biba riba dje pa semper. Henter humanidad a heredá imperfeccion di Adam cu Eva i p’esei, ta pecadó. (Romanonan 5:12) Bijbel ta bisa nos: “E salario cu picá ta paga ta morto.” “E bibunan ta conciente cu nan lo muri; pero en cuanto e mortonan, nan no ta conciente di nada en absoluto.” “E alma cu ta peca—e mes lo muri.” (Romanonan 6:23; Eclesiástes 9:5; Ezekiel 18:4, 20) Con anto nan por biba atrobe pa participá den bendicionnan terenal? Solamente mediante e sacrificio di rescate di Cristo Jesus, pasobra el a bisa: “Ami ta e resureccion i e bida. Esun cu ehercé fe den mi, asta si e muri, lo biba.” “Tur esnan cu ta den grafnan conmemorativo lo tende su bos i lo sali.”—Juan 5:28, 29; 11:25; Mateo 20:28.

Con esaki lo realisá? E ta ser splicá den “e bon nobo di reino,” cu Jesus a cuminsá proclamá ora e tabata riba tera. (Mateo 4:17-23) Pero awe Testigonan di Jehova ta predicando e bon nobo den un manera masha special.

E CREENCIANAN DI TESTIGONAN DI JEHOVA