Prácticanan cu Dios Ta Odia

1. Sirbidornan di Dios ta stima loke ta bon. Pero tambe nan mester siña odia loke ta malu. (Salmo 97:10) Esei ta nificá evitá cierto prácticanan cu Dios ta odia. Cua ta algun dje prácticanan ei?

2. Fornicacion: Relacion sexual promé cu matrimonio, adulterio, relacion sexual cu bestia, incesto i homosexualidad ta picánan serio contra Dios. (Levítico 18:6; Romanonan 1:26, 27; 1 Corintionan 6:9, 10) Si un pareha no ta casá, pero ta bibando huntu, nan mester separá of sino casa legalmente.—Hebreonan 13:4.

Dios ta odia buracheria, hortamentu,wega di placa i actonan di violencia

3. Gañamentu, Wega di Placa, Hortamentu: Jehova Dios no por gaña. (Tito 1:2) Personanan cu kier su aprobacion mester evitá di gaña. (Proverbionan 6:16-19; Colosensenan 3:9, 10) Tur forma di wega di placa ta manchá cu golosidad. Pues cristiannan no ta tuma parti den ningun clase di wega di placa, manera loteria, careda di cabai i bingo. (Efesionan 5:3-5) I cristiannan no ta horta. Nan no ta cumpra cosnan cu nan sa cu ta hortá of ta coge cos sin permiso.—Exodo 20:15; Efesionan 4:28.

4. Atake di Rabia, Violencia: Rabia descontrolá por hiba na actonan di violencia. (Génesis 4:5-8) Un persona violento no por ta Dios su amigu. (Salmo 11:5; Proverbionan 22:24, 25) Ta incorecto pa tuma vengansa of pa paga malu cu malu pa loke otronan lo por haci cu nos.—Proverbionan 24:29; Romanonan 12:17-21.

5.  Bruheria i spiritismo: Algun hende ta apelá n’e poder dje spiritunan pa purba di cura malesanan. Otronan ta haci bruha pa nan enemigunan pa haci nan malu of asta pa mata nan. E poder tras di tur e prácticanan aki ta Satanas. Pues cristiannan no mester tuma parti den ningun di nan. (Deuteronomio 18:9-13) Kedando cerca di Jehova ta e mihó proteccion for di bruha cu otronan por haci pa mara nos.—Proverbionan 18:10.

6. Buracheria: No ta malu pa bebe un poco biña, cerbes of otro bebida alcohólico. (Salmo 104:15; 1 Timoteo 5:23) Pero bebementu pisá i buracheria ta malu den Dios su bista. (1 Corintionan 5:11-13; 1 Timoteo 3:8) Bebiendo di mas por ruiná bo salú i kibra bo famia. Tambe e por poné bo entregá hopi lihé na otro tentacionnan.—Proverbionan 23:20, 21, 29-35.

7. Personanan cu ta practicá cosnan cu Dios ta bisa ta malu lo “no heredá e Reino di Dios.” (Galationan 5:19-21) Si realmente bo ta stima Dios i kier agrad’é, bo por kibra cu e prácticanan aki. (1 Juan 5:3) Siña odia loke Dios ta bisa ta malu. (Romanonan 12:9) Asociá cu hende cu tin custumbernan piadoso. (Proverbionan 13:20) Compañeronan cristian maduro por resultá di ta un fuente di yudansa. (Santiago 5:14) Riba tur cos, confia riba Dios su yudansa mediante oracion.—Filipensenan 4:6, 7, 13.

Copyright © 2008 Watch Tower Bible and Tract Society of Pennsylvania. All rights reserved.