Pitak Jesucristo kan

1. Allpaman manarak shamushpaka, Jesucristoka espíritu shinami jawa pachapi kawsarka. Diospa punta rurashkami karka; chaymantami Diospa “punta churi” nishpa shutichin (Colosenses 1:15). Jesustallami, Dioska piwanpash mana rurarka. Jesús jawa pachapi kashpaka Jehovapa “jatun alli trabajakmi” karka. Jesuska paypa Taytawan trabajarkami jawa pachapi Allpapipash shuktak ima tiyashkakunata rurankapak (Proverbios 8:22-31, NM; Colosenses 1:16, 17). Diospa shimikunata rimaymantami, Jesustaka “Shimi” nishpa shutichin (Juan 1:1-3; Apocalipsis 19:13).

2. Dios paypa churita Allpaman kachamunkapakka, Mariapa wiksa ukupimi Jesuspa kawsayta churarka. Shuk runa taytataka mana charirkachu, chaymantami jucha illak karka. Imamantatak Dioska Jesusta Allpaman kachamurka. 1) Diosmanta alli yachachichun (Juan 18:37), 2) Diospa tukuylla munayta rurachun, chayta rikushpa ñukanchikpash katichun (1 Pedro 2:21), 3) juchamanta wañuymantapash paypa kawsayta kushpa kishpichichunmi kachamurka. Imamantatak Jesuska wañuna karka (Mateo 20:28).

3. Punta runa Adán, Dios mañashkata mana kasushpaka, Diospa ñawpapika ‘juchatami’ rurarka. Chaymantami Dioska wañunkimi nirka (Génesis 3:17-19). Diospa mañashkakunata ña mana paktachishpaka, jucha illak kanata sakirkami. Asha ashami rukuyashpa rirka, kipamanka wañurka. Adanka paypa tukuy wawakunamanmi juchataka chimpachirka. Chaymantami tukuy ñukanchikkunaka rukuyanchik, unkunchik wañunchikpash. Imashinatak runakunataka kishpichita usharka (Romanos 3:23; 5:12).

4. Jesuska Adán shina jucha illak runami karka. Shinapash, Adán shinaka mana karkachu, jatun llakipi kashpapash Jesuska tukuypimi Diostaka kasurka. Shinaka, Adanpa juchamantami Jesuska paypa jucha illak kawsayta kurka. Bibliapika kay ruraytaka ‘kishpichina’ nishpami shutichin. Shina rurakpimi Adanpa wawakunaka wañuymanta kishpirita ushan. Jesuspi krishpaka juchamanta kishpirishunmi, mana tukuri kawsaytapash chaskishunmi (Salmo 49:7; Juan 3:16; Romanos 5:18, 19).

Jesuska Diosmanta parlarka, yachachirka, milagrokunata rurarka, ashtawankarin paypa kawsaytapash ñukanchikmanta kurka

5. Jesús Allpapi kashpaka, unkushkakunata jampirka, yarikaywan kak runakunaman mikuchirka, sinchi wayrawan tamyakunatapash kasiyachirkami. Wañushkakunatapash kawsachirkallami. Imamantatak kay milagrokunata rurarka. 1) Llakita charikkunamanta nanarishpa, ayudankapak munaymanta. 2) Diospa churi kashkata rikuchinkapak. 3) Rey tukushpa alli runakunamanta imata ruranata rikuchinkapak (Mateo 14:14; Marcos 2:10-12; Juan 5:28, 29).

6. Jesús wañukpika, Dioska espíritu shinatami kawsachirka, jawa pachaman tikrachun (1 Pedro 3:18). Chay kipaka Reytami rurarka. Jesuska ñallami Allpapi tukuy mana alli ruraykunata, llakikunata tukuchinka (Salmo 37:9-11; Proverbios 2:21, 22).

Copyright © 2008 Watch Tower Bible and Tract Society of Pennsylvania. All rights reserved.