Diabloka pitak kan

1. “Diablo” shimika nisha ninmi, shukkunamanta jatun llullakunata nik. “Satanás” shimika jarkak nisha ninmi. Kay shimikunaka Satanás imashina kaktami rikuchin. Kallaripika Dioswanmi jawa pachapi kawsarka, tukuyta alli rurak angelmi karka, kipamanka jatun tukurka. Diosta adoranapak rantika, payta adorachunmi munarka (Mateo 4:8-10).

2. Kay ángel, Satanaska, shuk culebrata parlachishpami, Evata llullarka Diosta ama kasuchun. Chayta rurashpami, Satanaska Diospa gobernacionta mana allichu nishpa juchachirka. Pantachinkapakka tapurkami, Diospa gobiernoka runakunapak alli kankachu. Shinallatak Satanaska nirkami, llakikuna tiyakpika, runakunaka Diostaka sakinkallami. Chashna rurashpami Satanaska Diosta jarkankapak munarka. Chaymantami Satanás Diablo shutita charin (Génesis 3:1-5; Job 1:8-11; Apocalipsis 12:9).

3. Satanaska payta adorachunmi runakunataka pantachin (2 Corintios 11:3, 14). Runakunataka pantachinmi mana alli religionkunawan. Shuk religión Diosmanta llullakunata yachachishpaka, Satanaspa munaytami ruranakun (Juan 8:44). Mana alli religión ukupi kak runakunaka, Diosta tukuy shunkuwan adoranakunchik yuyanchari, shina yuyashpapash Satanastami katinakun, paymi ‘kay pachapi mandakuk dios’ (2 Corintios 4:4).

Mana alli religión, brujería, llaktata adoranapash runakunataka pantachinmi

4. Brujeriawanpash Satanaska runakunata pantachinmi. Wakin runakunaka brujukunapakman rinmi, espiritukunata kayachinkapak, shuktak runakunata llakichichun, shamuk punchakunapi ima tiyanata nichun, milagrokunata rurachun, paykunata ayudachunpash. Mana alli Satanasmi kay tukuy ruraykunataka paktachikun. Diosta kushichinkapak munashpaka, brujeriamantaka karuyanami kanchik (Deuteronomio 18:10-12; Hechos 19:18, 19).

5. Shinallatak Satanaska runakunata pantachinmi yurakkuna yanakunamanta ashtawan alli kashkata krichishpa, shuk llaktamanta chayshuk llaktamanta ashtawan alli kashkatapash krichinmi. Chay krishkakunaka llullami kan (Hechos 10:34, 35). Satanaska runakunata pantachinpashmi político tantanakuykunata adorachishpa. Wakinkunaka shuyanmi político tantanakuykuna runakunapa llakikunata tukuchichun. Shinami Diospa Reinota mana munashkata rikuchin. Diospa Reinollami ñukanchikpa llakikunataka tukuchinka (Daniel 2:44).

Jehovamanta yachakushpa katishpaka Satanaspa mana alli ruraykunamanta karuyankimi

6. Satanaska runakunata pantachinmi, mapa munaykunata munachishpa. Kay mapa ruraykunaka, ñukanchikpa mana alli kanata yachashpami, Jehovaka kay ruraykunamanta karuyaychik nin (Gálatas 6:7, 8). Wakinkunaka paykuna shina mana alli ruraykunata rurachun munanpashchari. Shinapash yuyarinami kanki, Satanasmi chashna ruraykunataka rurachun munan (1 Corintios 6:9, 10; 15:33).

7. Jehovata sakichunka, Satanaska llakikunata churanmi. Bibliata yachakukukpika, wakin ayllukunaka achkata piñarinchari, shukkunaka asincharipash. Shinapash, pimantatak kawsayta charinki. Satanaska manchachinkapakmi munan Jehovamanta ama yachakushpa katichun. Manchachichunka ama sakinkichu (Mateo 10:34-39; 1 Pedro 5:8, 9). Diablopa mana alli ruraykunamanta karuyashpaka, Jehovatami kushichinki, shinallatak rikuchinkimi pay kanpa soberano kachun munashkata (Proverbios 27:11).

Copyright © 2008 Watch Tower Bible and Tract Society of Pennsylvania. All rights reserved.