Diospa Reinoka imatak kan

1. Jesús Allpapi kashpaka, payta katikkunata yachachirkami, Diospa Reino shamuchun mañanata. Reinoka nisha ninmi shuk gobierno. Kaypika shuk reymi ñawpaman pushanka. Diospa Reino shina shuk gobiernoka mana tiyanchu. Kayka jawa pachapimi kan. Jawa pachamantami Allpataka ñawpaman pushanka. Diospa shutita santota rurankami. Imashinami Diospa munayta jawa pachapi paktachin shinallatakmi Allpapipash paktachinka (Mateo 6:9, 10).

2. Dioska nirkami, Jesusmi ñukapa Reinopi Rey tukunka (Lucas 1:30-33). Jesús Allpapi kashpaka ima juchatapash mana rurak, alli Rey kanatami rikuchirka. Jawa pachaman tikrakpika, Dioska mana ñapash paypa Reinopi Reyta rurarkachu (Hebreos 10:12, 13). Jehovaka 1914 watapimi Jesusman ushayta kurka. Chay watamantami, Jesuska jawa pachapi Rey kan (Daniel 7:13, 14).

3. Shinallatak, Jehovaka Allpamanta akllashkami pay nishkata paktachik wakin karikunata, warmikunatapash, jawa pachaman richun. Paykunami Jesuswan, jawa pachamanta ñawpaman pushanka Allpapi kawsak runakunata. Reykuna, juezkuna, sacerdotekuna shinami kanka (Lucas 22:28-30; Apocalipsis 5:9, 10). Paypa Reinopi paywan ñawpaman pushakkunataka, Jesuska “ashalla ovejakuna” nishpami shutichirka. Paykunaka 144.000 runakunami kan (Lucas 12:32, NM; Apocalipsis 14: 1-3).

4. Jesús Rey tukushpaka, Satanasta paypa mana alli angelkunantinmi jawa pachamanta, Allpaman shitarka. Chaymantami, 1914 watamantaka Allpapi kawsayka ashtawan wakllishka (Apocalipsis 12:9, 12). Kunan punchakunapika mirashkami jatun makanakuykuna, yarikaykuna, millay unkuykuna, mana alli ruraykunapash. Tukuy kaykunaka rikuchikunmi Jesús ñawpaman pushakushkata, Allpapi tukuy llakikunaka tukuri punchakunapi kashkatapash rikuchinmi (Mateo 24:3, 7, 8, 12; Lucas 21:10, 11; 2 Timoteo 3:1-5).

5. Jesuska ñallami runakunataka imatatak rurarkankichik ninka. Imashinami shuk michik runa, ovejakunata chivokunamanta chikan chikan churan, shinallatakmi Jesuspash ruranka. Payta uyak runakunataka, “ovejakunata” shinami rikun, paykunamanmi mana tukuri kawsayta Allpapi kunka. “Chivokunaka” kanmi Diospa Reinota mana munakkuna (Mateo 25:31-34, Biblia Quichua Chimborazo). Shamuk punchakunapika, chivo shina runakunataka Jesuska tukuchinkami (2 Tesalonicenses 1:6-9). Jesuspa shuk “oveja” kankapak munashpaka, Reinomanta parlakpika uyanami kanki, imata yachakushkatapash rurana kanki (Mateo 24:14).

Jesús ñawpaman pushakukpika, shuktakkunata millanakunaka ña mana tiyankachu

6. Allpapika achka llaktakunami tiyan chikan chikan gobiernokunawan. Shuk llaktawan chayshuk llaktawan makanakunmi. Diospa Reinomi, Allpapi tukuy gobiernokunata tukuchinka. Diospa gobiernollami, tukuy Allpata ñawpaman pushanka (Daniel 2:44). Shinaka, ña mana tiyankachu jatun makanakuykuna, leyta mana kasushpa mana alli ruraykuna, shuktakkunata llakichikunapash. Tukuy runakunami tantanakushpa, kasilla alli kawsanka (Miqueas 4:3, 4).

7. Waranka watakunata Jesús ñawpaman pushakukpika, Dios nishkata paktachik runakunaka jucha illakkunami tukunka. Tukuy Allpami shuk paraíso tukunka. Waranka watakuna tukurikpika, Diospa tukuylla munashkatami Jesuska paktachinka. Shinashpaka, Reinota paypa Taytaman tikrachinkami (1 Corintios 15:24). Kanpa riksikunaman, ayllukunaman Diospa Reinomanta parlashpaka, allimi kanman.

Copyright © 2008 Watch Tower Bible and Tract Society of Pennsylvania. All rights reserved.