Imashinatak mañashpa Diospakman kuchuyashun

1. Mañanaka kanmi mana jatun tukushka shunkuwan Dioswan parlana. Diostaka kutin kutinmi mañakunalla kanchik. Chashna rurashpaka, shunku ukupi yachashunmi ñukanchikpa kuyashka mashi kashkata. Jehová ashtawan jatun kashpapash, ashtawan achka ushayta charishpapash, ñukanchikpa mañashkakunataka uyanmi. Diostaka kutin kutinchu mañanki (Salmo 65:2; 1 Tesalonicenses 5:17).

2. Diosta adorakkunaka mañayta ruranami kan. Jehová Diostallami mañana kanchik. Jesús Allpapi kashpaka, paypa Taytatallami mañan karka. Ñukanchikpash chashnallatakmi rurana kanchik (Mateo 4:10; 6:9). Jesuspa shutipillami mañana kanchik. Chashnami rikuchishun Jesusmantalla Diospakman kuchuyay ushashkata. Shinallatak, rikuchishunmi kishpichinkapak kawsayta kushkapi krishkatapash (Juan 14:6; 1 Juan 2:1, 2).

3. Diosta mañakushpaka, shunkumantami parlana kanchik. Mañakushpaka, mana kutin kutin chaytallata ninakunachu kanchik (Mateo 6:7, 8). Diosta jatunyachishpaka shayanman, tiyanman imashinapash, maypi kashpapash, ima horaspipash, mañanallami kanchik. Shunku ukupi mañaykunatapash Dioska uyanmi (1 Samuel 1:12, 13). Diosta mañankapakka, shuk chulunlla pushtutami maskana kanchik (Marcos 1:35).

4. Imakunamantatak mañana kanki. Dioswan alli kankapakka imatapash mañanallami kanki (Filipenses 4:6, 7). Padrenuestro mañayka rikuchinmi imakunamantami mañana kanchik. Chaypika ninmi, Jehovapa shutimanta mañana kashkata, paypa munay paktarichunpash mañana kashkata. Shinallatak mañanami kanchik kawsankapak imata ministikushkata kuchun, juchakunata kishpichichun. Mana alli munaykunata charishpapash Diospa ayudata mañanallami kanchik (Mateo 6:9-13). Ñukanchikpa mañashkakunaka mana mitsakuna kana kanchu. Diospa ñawpapi alli rikurishkatallami mañana kanchik (1 Juan 5:14).

5. Diosta tukuy shunkuwan pashi ninkapak munashpa, jatunyachinkapak munashpaka, mañayta ruranallami kanki (1 Crónicas 29:10-13). Llakipi kashpa, Dios mañashkata mana paktachita ushakushpaka, Diosta mañanataka ama sakinkichu (Salmo 55:22; 120:1). Manarak mikushpallatak Diosta mañanami kanchik (Mateo 14:19). “Tukuypi” mañachunmi Dioska munan (Efesios 6:18).

6. Shuk jatun juchata rurashpaka, utkallami Jehovata mañana kanchik, llakishpa kishpichichun. Juchakunata mana pakashpami Diosman parlana kanki. Juchakunapi ama kutin urmankapak sinchiyarishpa katikpika, Dioska juchakunata ‘kunkankapakmi kan’ (Salmo 86:5; Proverbios 28:13).

7. Allita rurakkunapa mañaykunatallami Jehovaka uyan. Kanpa mañaykunata Dios uyachunka, paypa mañashkakunatami kawsaypi paktachishpa katina kanki (Proverbios 15:29; 28:9). Mañakushpaka, mana jatun tukushka shunkuwanmi mañana kanki (Lucas 18:9-14). Imatami mañarkanki chaytallatami rurana kanki. Chashnami rikuchishun feta charishkata, tukuy shunkuwan mañakushkatapash. Shina rurakpillami, Jehovaka ñukanchikpa mañaykunata uyanka (Hebreos 11:6).

Copyright © 2008 Watch Tower Bible and Tract Society of Pennsylvania. All rights reserved.