Diosta kushichinkapakka, ayllukunaka imashinatak kawsana kan

1. Bibliaka ninmi, kusami ayllu ukupika ñawpaman pushana kan (1 Corintios 11:3). Karika shuklla warmitami charina kan, leykuna ñawpapipash kasarashkakunami kana kan (1 Timoteo 3:2; Tito 3:1).

2. Imashinami payllatak llakirin shinallatakmi kusaka paypa warmita llakina kan. Imatami Jesús payta katikkunamanta rurarka, chaytallatakmi kusapash paypa warmimanta rurana kan (Efesios 5:25, 28, 29). Kusaka mana makanachu kan, mana sinchi shimikunawan rimanachu kan. Chaypak rantika, llakishpa, kuyashpami kushi kawsayta kuna kan (Colosenses 3:19; 1 Pedro 3:7).

Llakik taytaka, paypa warmiman, wawakunaman kawsankapak imata ministishkata kunmi, Diosmanta yachachunpash ayudanmi

3. Paypa ayllu alli kawsachunka, taytaka sinchita trabajana kan. Paypa warmiman, wawakunaman mikunata, churanata, wasitapash kunami kan. Paykunaka Diosta adoranata ministinmi. Chaymanta taytami paykunataka rikurashpa Diosmanta yachachina kan (1 Timoteo 5:8; Deuteronomio 6:4-9; Proverbios 13:24).

4. Warmika kusapa alli ayudantemi kana kan (Génesis 2:18). Wawakunata alli wiñachinkapakmi paypa kusata ayudana kan (Proverbios 1:8). Jehovaka munanmi, warmika paypa kusata wawakunatapash kuyaywan rikurachun (Proverbios 31:10, 15, 26, 27; Tito 2:4, 5). Warmika paypa kusapa nishkakunaka allipak yuyashpami, kasuna kan (Efesios 5:22, 23, 33).

5. Dioska munanmi wawakunaka tayta mamakunata kasuchun (Efesios 6:1-3). Payka shuyanmi tayta mamakuna wawakunata yachachichun, imapi pantarikpipash alli ñanta rikuchichun. Tayta mamakunaka wawakunatami llakina kan, paykunawanmi purina pukllanapash kan. Diosta imashina adoranata Bibliamantapash yachachina kan (Deuteronomio 11:18, 19; Proverbios 22:6, 15). Wawakuna alli ñanta katishpa wiñachunka mana llakinayta makanachu kan (Colosenses 3:21).

Dioska munanmi tayta mamakunaka wawakunata yachachichun imapi pantarikpipash alli ñanta rikuchichun

6. Kusa warmi mana alli kawsanakushpaka, Biblia ima nikta kasushpami alli kan. Bibliaka llakirichik, kishpichirichik ninmi (Colosenses 3:12-14). Bibliaka mana ninchu uchilla piñanakuykunamanta sakishpa rinataka. Shinapash, imata rurakpitak warmika paypa kusata sakita ushan: 1) mikunata, churanata, maypi kawsanata mana kunkapak munakpi, 2) kusa achka piñay kaymanta, paypa kawsay llakipi kakpi, 3) Jehovata mana adorachun sakikpi (1 Corintios 7:12, 13).

7. Kusapash warmipash mana shuktak warmita, karita charinachu kan. Kasarashka kashpata shukwan siririshpa juchata ruranaka, Diospa ñawpapi kusapa warmipa ñawpapipash juchami kan (Hebreos 13:4). Bibliaka ninmi, kanpa kusa mana kashpaka kanpa warmi shukwan juchapi urmakpillami, divorciarita ushankiman. Chayllami shukwan kutin kasaraytapash ushankiman (Mateo 19:6-9; Romanos 7:2, 3). Jehovaka millanmi imamantapash yankata divorciarishpa shukwan kasaraktaka (Malaquías 2:14-16).

Copyright © 2008 Watch Tower Bible and Tract Society of Pennsylvania. All rights reserved.