Diosta adorakkunaka, imakunapitak limpiokuna kana kan

1. Jehová Dioska limpio, santomi kan. Payta adorakkunaka adoracionpi, kawsaypi, yuyaypi, cuerpopi limpiokuna kashpa katichunmi munan (1 Pedro 1:16). Diospa ñawipi limpio rikurinkapakka sinchitami trabajashpa katina kanchik. Shuk mapa pachapimi kawsanakunchik. Mana alli munaykunata sakinapash mana jawallachu kan. Shinapash mana shaykunachu kanchik.

2. Adoracionpi limpio: Jehovapa ñawpapi alli rikurinkapak munashpaka, mana alli religionpa tukuy yachaykunata ruraykunatapash sakinami kanchik. Mana alli religionmanta llukshinami kanchik, imapipash mana chapurinachu kanchik (2 Corintios 6:14-18; Apocalipsis 18:4). Diosmanta ña yachakushkamantaka, llullakunawan pantachichunka mana sakinachu kanchik (2 Juan 10, 11).

3. Kawsaypi limpio: Jehovaka munanmi, payta adorakkunaka tukuy pachapi pay nishka shina kawsachun (1 Pedro 2:12). Payka tukuy ñukanchikpa ruraykunata rikukunmi, pakalla rurashkakunatapash rikukunmi (Hebreos 4:13). Shuk kariwan shuk warmiwan mana mapayanachu kanchik. Kay pachapa shuktak munaykunamantapash karuyanami kanchik (1 Corintios 6:9-11).

4. Yuyaypi limpio: Ñukanchikpa umata limpio puro yuyaykunawan juntachishpaka, ñukanchikpa ruraykunapash limpiokunami kanka (Filipenses 4:8). Mapa ruraykunapilla yuyakushpaka, mana alli ruraykunatallatakmi rurashun (Mateo 15:18-20). Yankalla kashpaka mana sakinachu kanchik imapash ruraykuna ñukanchikpa yuyaykunata mapayachichun. Diospa shimita yachakushpaka, ñukanchikpa umataka limpio yuyaykunawanmi juntachishun.

5. Cuerpopi limpio: Diosta adoraymantaka, cuerpopi churanapipash limpiokunami kana kanchik. Ishpashka kipaka makita mayllarinami kanchik, manarak mikushpa, yanukrikushpapash makita mayllarinami kanchik. Wasi ukupi ishpana ukuta mana charishpaka, kanchapimi ishpashpa pampana kan (Deuteronomio 23:12, 13). Limpio kanaka ayudankami unkuykuna ama japichun. Jesusta katikkunapa wasikunaka, ukupash kanchapash limpiokunami kana kan, mana imakunapash kayman chayman shitashka kanachu kan. Maypi kawsashpapash alli, limpiota kawsashkamantami riksishkakuna kana kan.

6. Rimaypi limpio: Diosta adorakkunaka llullakunata mana ninchu. Llullakkunaka Diospa Reinomanka mana yaykunkachu (Efesios 4:25; Apocalipsis 21:8). Jesuspa yachakukkunaka mapa shimi runakunaka mana kanchu. Mapa shimikunataka mana uyanakunchu mana shuktakkunaman parlanakunpashchu. Paykunapa llaktapi trabajopi, yachakuy wasipipash, limpio shimita charishkamantami riksin (Efesios 4:29, 31; 5:3).

Diosta adorakkunaka tukuypimi limpiokuna kana kan

Copyright © 2008 Watch Tower Bible and Tract Society of Pennsylvania. All rights reserved.