Ima ruraykunatatak Dioska millan

1. Diosta adorakkunaka alli ruraykunata kuyanmi, shinallatak mana alli ruraykunataka millanata yachakunami kan (Salmo 97:10). Kayka nisha ninmi Dios millashka ruraykunamanta karuyana. Maykan ruraykunatak mana allikuna kan.

2. Juchapi mapayaykuna: Manarakpash kasarashpallatak shuk kariwan, shuk warmiwan puñuna, kasarashka kipa shukwan puñuna, animalkunawan juchata rurana, ayllu ukupurawan juchata rurana, kari karipura, warmi warmipura juchata ruraykunaka, Diospa ñawpapika jatun juchakunami kan (Levítico 18:6; Romanos 1:26, 27; 1 Corintios 6:9, 10). Shuk kari shuk warmiwan manapash kasarashka kashpata pakta kawsanakushpaka, ley mañashka shina kasaranami kan. Mana shinata rurashpaka karuyanami kan (Hebreos 13:4).

Machayta, shuwayta, kullkimanta pukllayta, shuktakta makayta Dioska millanmi

3. Llullana, kullkimanta pukllana, shuwana: Jehová Dioska mana llullanchu (Tito 1:2). Chaymanta, Dios chaskichun munashpaka mana llullanachu kan (Proverbios 6:16-19; Colosenses 3:9, 10). Kullkimanta pukllaykunaka ashtawan kullkita munaymanmi apan. Chaymanta, Jesusta katikkunaka mana kullkita churashpa pukllanchu loteriata, caballo kallpaykunata, ima shuktak pukllaykunatapash (Efesios 5:3-5). Mana shuwanchu. Shuwashkata yachashpata mana rantinchu, manapash mañashpata imatapash mana japinchu (Éxodo 20:15; Efesios 4:28).

4. Achkata piñarina, shuktakta makana: Achkata piñarika makanakuymanmi apan (Génesis 4:5-8). Shuktakta makakkunaka Diospa ñawpapi mana alli rikurinchu (Salmo 11:5; Proverbios 22:24, 25). Mana allita rurakpi mana alliwanllata tikrachinaka mana alli kanchu (Proverbios 24:29; Romanos 12:17-21).

5. Brujería: Wakin runakunaka brujukunapakman rinmi espiritukunata kayachishpa unkuykunamanta jampirinkapak, shuktakkunata unkuchinkapak, wañuchinkapakpash. Kay tukuylla ruraykunapa washapika Satanasmi kan. Chaymantami Jesusta katikkunaka kashna ruraykunataka mana ruranachu kan (Deuteronomio 18:9-13). Brujushkakuna ama imatapash rurachunka Jehovapa kuchullapimi kana kanchik (Proverbios 18:10).

6. Machana: Bibliaka ninmi, asha vinota, asha cervezataka upiyanallami (Salmo 104:15; 1 Timoteo 5:23). Achkata upiyakta, machaktapash Dioska mana chaskinchu (1 Corintios 5:11-13; 1 Timoteo 3:8). Achkata upiyashpaka unkunkimi, kanpa aylluwan kawsaypash wakllinkami. Shuktak juchakunapipash jawallami urmanki (Proverbios 23:29-35).

7. Dios mana allichu nishka ruraykunata mana sakishpaka ‘Tayta Dios mandakuk llaktapika, imakutapash na japinkachu’ (Gálatas 5:19-21). Diosta tukuy shunkuwan kuyashpa, paypa munayta rurankapak munashpaka, chay ruraykunataka sakita ushankimi (1 Juan 5:3). Dios millashka ruraykunata millanata yachakuy (Romanos 12:9). Diospa munayta paktachik runakunawan tantanakuy (Proverbios 13:20). Alli yuyayta charik wawkikuna panikunaka ñukanchikta ayudankami (Santiago 5:14). Ashtawankarin, Diosta mañakpika payka ayudankallami (Filipenses 4:6, 7, 13).

Copyright © 2008 Watch Tower Bible and Tract Society of Pennsylvania. All rights reserved.