Ima krishkakuna, ruraykunatak Diospa ñawpapika mana alli rikurin

Dioska mana shuk Trinidadchu kan

1. Achka krishkakuna, ruraykunami tiyan. Shinapash, wakinkunaka mana alli religionmantami shamun. Bibliapa yachaykunawanka mana paktachu kan. Dioska chaykunataka mana alli rikunchu (Mateo 15:6).

2. Trinidad: Jehovaka shuklla Diospi kimsachu kan. Mana. Jehovaka, Taytami kan, ‘shuklla Tayta Diosmi’ (Juan 17:3; Marcos 12:29). Jesuska Paypa punta Churimi kan, Dios nishkatami payka paktachin (1 Corintios 11:3). Taytaka churimantaka ashtawan yalli jatunmi kan (Juan 14:28). Espiritu santoka mana Dios shina kanchu; Diospa ushaymi kan, kay ushaywanmi paypa munayta paktachin (Génesis 1:2; Hechos 2:18).

Navidadka punta mana alli religionkunamantami shamun

Wañushkakunata mana adoranachu mana manchanachu kanchik

3. Navidad Semana Santapash: Jesuska mana wacharirkachu 25 de diciembretaka, 1 de octubre shina punchakunapimi wacharirka. Chay punchakunapika michik runakunaka paykunapa ovejakunata kanchapimi tutakunapash rikun karka (Lucas 2:8-12). Jesuska mana nirkachu paypa wacharishka punchata yuyarichunka. Chaypak rantika paypa wañushka punchatami yuyarinkichik nirka (Lucas 22:19, 20). Navidadpi imakunatapash rurayka punta mana alli religionkunamantami shamun. Semana Santapi procesionkunaman rina, aychata mana mikuna, chaykunapash mana alli religionkunamantami shamun. Jesusta punta katikkunaka Navidadta Semana Santatapash mana yuyarinchu karka. Chaymantami, kunan punchapipash Jesusta tukuy shunkuwan katikkunaka Navidadta Semana Santatapash mana yuyarinkunachu.

4. Cumpleañokuna: Bibliapika ishkay runakunapa cumpleañomantallami parlan, kay runakunaka Jehovata mana adorakkunami karka (Génesis 40:20-22; Marcos 6:21, 22, 24-27). Kallaripika Jesusta katikkunaka cumpleañokunata mana yuyarinchu karka. Chay rurayka punta mana alli religionmantami shamun. Jesusta tukuy shunkuwan katikkunaka mana cumpleaño punchakunata shuyanchu imakunatapash kunkapakka. Ima punchapash tantanakunllami tukuykuna kushikushka kankapakka.

5. Wañushkakunata manchana: Wañushkakunaka imata ruranata imata yuyanatapash mana ushanchu. Paykunata ayudaytaka mana ushanchikchu, paykunapash ñukanchikta llakichita mana ushanchu (Salmo 146:4; Eclesiastés 9:5, 10). Almaka wañunmi, mana kawsashpa katikunchu (Ezequiel 18:4). Shinapash, wakinpika mana alli angelkunami wañushka runakuna shina tukun. Wañushkakunata manchaymanta, adoranamanta imakunatapash ruranaka mana allichu kan (Isaías 8:19).

6. Cruz: Jesuska mana shuk cruzpi wañurkachu, shuk jatun raku kaspipimi wañurka. Achka Bibliakunapi, griego shimi cruz nishpaka parlakunmi shuklla kaspimanta. Cruzpi krinaka punta mana alli religionkunamantami shamun. Kallaripika, Jesusta katikkunaka cruzta mana adoranchu karka. Chaymanta, cruzta adoranaka alli kan yuyankichu (Deuteronomio 7:26; 1 Corintios 10:14).

7. Chashna krishkakunata ruraykunata sakinaka sinchipashchari kan. Ayllukuna riksikuna chashna krishkakunata ama sakichu ninpashchari. Shinapash runakunapa ñawpapi alli rikurinapak rantika, Diospa ñawpapi alli rikurinami ashtawan jatun ministirishka kan (Proverbios 29:25; Mateo 10:36, 37).

Copyright © 2008 Watch Tower Bible and Tract Society of Pennsylvania. All rights reserved.