Kawsaymanta, yawarmanta imatami Dios yachachishkata kasushunchik

1. Jehovamantami kawsayka shamun. Runakunapash animalkunapash Diosmantami kawsan (Salmo 36:9). Diospa ñawpapika, kawsayka jatun sumakmi kan. Mamapa wiksa ukupi wawapa kawsaypash, Jehovapakka jatun sumakmi kan. Diospa ñawipika wiksa ukupi chayrak wiñakun wawata, paypa munaymantalla urmachinaka mana alli kanchu (Éxodo 21:22, 23; Salmo 127:3).

Diosta kushichinkapakka, yawarta mana churarinachu kanchik, mapa ruraykunata sakina kanchik kawsaytapash mana llakipi churanachu kanchik

2. Jesusta tukuy shunkuwan katikkunaka kawsankapak munashkata rikuchinmi. Paykunapa carrokuna, wasikuna alli allichishka kachunmi rikuran (Deuteronomio 22:8). Diosta adorakkunaka kushikuymantalla imapash chukrinalla wañunalla ruraykunapi, pukllaykunapi mana chapurinchu. Shuktakkunata llakichinayaymantalla mana pukllanchu. Imapash peliculakuna, librokuna maypimi makanakuykuna, piñanakuykuna tiyaktaka mana rikunchu (Salmo 11:5; Juan 13:35).

3. Rurak Diospa ñawpapika animalkunapa kawsaypash jatun sumakmi kan. Cristota katikkunaka animalkunata wañuchita ushanmi: mikunkapak kashpa, churanata rurankapak kashpa, unkuykuna ama japichun, ama llakichichunpash (Génesis 3:21; 9:3; Éxodo 21:28). Pukllaymantalla, wañukta rikunayaymantalla animalkunata wañuchika mana alli kanchu (Proverbios 12:10).

4. Cristota katikkunaka tabacota mana pukunchu, kushikushka kanamantalla mana drogakunata upiyanchu. Imamantatak kay ruraykunaka mana allikuna kan. 1) Chaytalla kutin kutin rurachunmi munachin, 2) cuerpota wakllichin, 3) mapakunapashmi kan (Romanos 6:19; 12:1; 2 Corintios 7:1). Chay ruraykunata sakinaka sinchimi kan, shinapash Jehovata kushichinkapak munashpaka sakinami kanchik.

5. Yawarpash Diospa ñawpapika jatun sumak allimi kan. Dioska ninmi kawsayka yawarpimi kan. Chaymanta yawarta mikunaka mana alli kanchu. Yawarta mana alli llukchishka animalpa aychata mikunaka mana alli kanchu. Shuk animal sipi tukushpa wañushkata, trampapi japitukushpa wañushkataka mana mikunachu kanchik. Shuk lanzawan, imawanpash wañuchishpaka utkallami yawarta llukchina kanchik mikuy ushankapakka (Génesis 9:3, 4; Levítico 17:13, 14; Hechos 15:28, 29).

6. Yawarta churarinaka alli kanchu. Yuyari, Jehovaka yawarmanta karuyaychik ninmi. Kayka nisha ninmi ñukanchikpa cuerpopika mana yawarta churarinachu kanchik, ñukanchikpa yawartallata allichishkatapash mana kutin tikrashpa churarinachu kanchik (Hechos 21:25). Shina kashpaka, Jesusta tukuy shunkuwan katikkunaka yawarta mana churarinchu. Shinapash yawar illak shuktak jampikunataka chaskinmi. Kawsankapak munashpapash, Diospa leytaka mana washaman sakinchu (Mateo 16:25).

Copyright © 2008 Watch Tower Bible and Tract Society of Pennsylvania. All rights reserved.