Imashinatak alli religionta tarita ushanki

1. Jesuska shuklla alli religiontami kallarichishpa sakirka. Chaymanta, kunan punchakunapika, Jehovata adorak religionka shukllami tiyana kan (Juan 4:23, 24; Efesios 4:4, 5). Bibliaka yachachinmi kawsayman apak kichki ñanpika wakinkunalla purikta (Mateo 7:13, 14).

2. Bibliaka nirkami, apostolkuna wañushka kipaka asha ashami congregacionpi mana alli yachaykuna, ruraykuna chapurinka. Shinallatak nirkapashmi, runakunaka paykunata katichunmi shuktakkunataka Cristomanta karuyachinka (Mateo 7:15, 21-23; Hechos 20:29, 30). Chaymantami achka chikan chikan alli religión kanchik nikkuna tiyan. Imashinatak alli religionta riksita ushanchik.

3. Jesusta alli katikkunataka jawallami riksirin paykunapurapi kuyayta rikushpa (Juan 13:34, 35). Yana kashpa, yurak kashpa, ashtawan alli kani yuyaykunataka mana yachakushkachu. Shuktak llaktamanta runakunata millanatapash mana yachakushkachu (Hechos 10:34, 35). Chaymanta makanakuykunapika mana chapurinchu. Jesusta alli katikkunaka tukuykunawanmi wawki panipurakuna shina kan (1 Juan 4:20, 21).

Jesusta alli katikkunaka shukkuna chayshukkunawan kuyarinmi, Biblia tukuy ima nishkata kasunmi, Diospa Reinomantapash parlanmi.

4. Alli religionta katikkunaka Biblia tukuy ima nishkatami kasun. Diospa shimi nishpami chaskin, tukuy ima nikuktapash krinmi (Juan 17:17; 2 Timoteo 3:16, 17). Runapa yuyaykuna, ruraykunata katinapak rantika Diospa Shimitami ashtawan kasushpa katin (Mateo 15:1-3, 7-9). Tukuy punchakunami Biblia ima nikukta rurankapak munan, shinaka imatami yachachin chaytallatakmi ruran (Tito 1:15,16).

5. Alli religionta katikkunaka Diospa shutitapash jatunyachinami kan (Mateo 6:9). Jesuska Diospa shuti, Jehovatami, shukkunaman riksichirka, chaytallatakmi Jesusta alli katikkunapash rurana kanchik (Juan 17:6, 26; Romanos 10:13, 14). Kanpa llaktapika, pikunatak Diospa shutita riksichin.

6. Jesusta alli katikkunaka Diospa Reinomanta rimanami kan. Jesuska chashnami rurarka, Diospa Reinomanta parlanataka mana sakirkachu (Lucas 8:1). Payta katikkunatapash tukuylla Allpapimi chay Reinomantallatak yachachinkichik nirka (Mateo 24:14; 28:19, 20). Jesusta alli katikkunaka krinmi, Diospa Reinolla kasilla alli kawsayta Allpaman apamunata (Salmo 146:3-5).

7. Jesusta katikkunaka kay millay pachapa ruraykunapika mana chapurinchu (Juan 17:16). Kay Allpapi llakikunata tukuchinkapak piñanakuykunapika mana chapurinchu. Kay pachapa mana alli kawsay, mana alli ruraykunamantapash karuyanmi (Santiago 1:27; 4:4). Kanpa llaktapika maykan religiontatak, kay tukuylla mañashkakunata paktachikukta rikushkanki.

Copyright © 2008 Watch Tower Bible and Tract Society of Pennsylvania. All rights reserved.