Diosta adorankapakka, Jehovamanta willakkunaka imashinatak tantanakun

1. Jehovamanta willakkunaka kutin tantanakuy kallarirkami 1870 watakunapi. Kallaripika Bibliamanta Yachakukkuna shutitami charirka, shinapash 1931 watapimi Jehovamanta willakkuna shutita Bibliamanta japirka (Isaías 43:10). Kallaripika ashakunallami karka shinapash kunanka achka waranka waranka Willakkunami tiyan, paykunami 230 llaktakunapi Bibliamanta parlanakun.

2. Semanapika kimsa kutinkamami achka Jehovamanta willakkunaka tantanakun. Kay tantanakuykunamanka pipash shamunallami kan (Hebreos 10:24, 25). Chaypika Bibliamantami yachachin. Tantanakuykunaka shuk mañaywan kallarin, shuk mañaywan tukurinpash. Shinallatak, ‘Diosta jatunyachinkapakka shunkumanta takikunatapash’ takinmi (Efesios 5:18, 19, NM). Pipash yaykunallami kan, mana kullkita mañankachu (Mateo 10:8).

3. Achka Jehovamanta willakkunaka Tantanakuy Wasikunapimi tantanakun. Achka Tantanakuy Wasikunataka Jehovamanta willakkunallatakmi makita mañachishpa wasichin. Chaypika mana rikunkichu cruzkunata, runakunapa makiwan rurashka dioskunatapash. Tukuy shunku kushka kullkiwanmi Tantanakuy Wasikunapi ima ministirishkakunataka pagarin. Maykanpash kullkiwan ayudankapak munashpaka caja de contribucionpi churanallami kan (2 Corintios 9:7).

4. Congregacionkunapika ancianokuna tiyanmi. Paykunami tantanakuykunapika yachachin (1 Timoteo 3:1-7; 5:17). Paykunataka siervo ministerialkunami ayudan (1 Timoteo 3:8-10, 12, 13). Kay runakunaka congregacionpi shuktak runakunamantaka mana ashtawan jatun tukunchu (2 Corintios 1:24). Shukkunamanta chikanyankapak imapash shutikunata mana churarinchu (Mateo 23:8-10). Paykunataka mana riksinchu chikan ropakunata churakuymanta. Yachachishkamantaka mana kullkita mañanchu. Ancianokunaka tantanakuykunaman rikkunataka kushikushpami Diosmanta yachachun ayudan. Llakikunata charikpi Diospa Shimiwan kushikuyta kun, alli ñanta rikuchinpash (Santiago 5:14-16; 1 Pedro 5:2, 3).

5. Jehovamanta willakkunaka, watan watan shuktak jatun tantanakuykunatapash charinmi. Chaykunapika Bibliamanta sumakta yachakunkapakmi achka congregacionkuna tantanakun. Tukuy chay jatun tantanakuykunapika, mushuk yachakukkunami bautizarin (Mateo 3:13-17; 28:19, 20).

6. Jehovamanta willakkunapa tukuy pachamanta ashtawan jatun mama wasika Nueva Yorkpimi kan. Chaymantami, achka watakunata ancianokuna, tukuylla pachapi congregacionkunata ñawpaman pushanakun. Tukuy pachapika patsakta yalli sucursalkunami tiyan. Chaypi trabajakkunaka ayudanmi Bibliamanta librokunata rurankapak shukkunaman kachankapakpash. Paykunaka mana kullkimanta trabajanchu. Chaymantallatakmi Bibliamanta imashina yachachinakuktapash rikuranakun. Kanpa llaktapi sucursalta riksinkapak, shuk punchata llukchishpaka allimi kanman.

Copyright © 2008 Watch Tower Bible and Tract Society of Pennsylvania. All rights reserved.