1. Kanka ñami yachakushkanki Bibliamanta achka yachaykunata. Kay yachayka ayudankami Cristo imashina kawsarka shinallatak kanpash kawsachun (Efesios 4:22-24). Kay yachaykarin jatun ministirishkami kan mana tukuri kawsayta chaskinkapak (Juan 17:3). Shinapash, kishpirinkapakka shukkunapash Diospa Reinomanta uyanami kan. Jesusta tukuy shunkuwan katikkunaka shukkunaman Bibliamanta parlanami kan. Diosmi chaytaka rurankichik nirka (Romanos 10:10; 1 Corintios 9:16; 1 Timoteo 4:16).
2. Kallarinkapakka Diospa Reinomanta kanpa riksikunaman parlay. Kanpa ayllukunaman, yachakuy wasipi kanwan yachakukkunaman, kanwan trabajakkunamanpash parlay. Ama ñapash piñarishpa kushilla shimikunawan parlay (2 Timoteo 2:24, 25). Yuyaypi charinki, runakunaka kanpa parlashkatalla mana uyanakunchu, ashtawanka kanpa kawsaytapash rikunakunmi. Chaymanta, alli kawsayta charinami ayudanka shuktakkuna uyachun (Mateo 5:16; 1 Pedro 3:1, 2, 16).
3. Kipamanka, ima ministirishkata paktachishpaka, congregacionwan Bibliamanta parlankapak llukshita ushankimi. Kayta rurashpaka rikuchinkimi Diosta kasushpa katikushkata (Mateo 24:14). Achkatami kushikunki, pitapash Jehovapa munayta rurachun ayudashpa mana tukuri kawsayta charichun ayudashpapash (1 Tesalonicenses 2:19, 20). |
