Imaynatan oracionpi Diosman asuykuna

1. Oracionqa respetowan Diosman rimaymi. Orashanallan Diosmanqa. Chayta ruwaspaqa, munasqa amigonchisman hinan ratakusun. Jehovaqa hatunmi, atiyniyoqtaq, uyarinmi ichaqa oracionninchista. ¿Orallankipunichu Diosman? (Salmo 65:2; 1 Tesalonicenses 5:17.)

2. Oracionqa adorayninchispa partinmi. Chayraykun, Jehová Diosllaman orananchis. Allpapi kashaspaqa, Taytallanmanmi Jesusqa oraran, manan pimanpaschu. Ñoqanchispas chhaynatan ruwananchis. (Mateo 4:10; 6:9.) Jesuspa sutinpipunin ichaqa orananchis. Chhaynatan rikuchinchis Jesuspa posicionnin respetasqanchista, rescatananpaq sacrificionpi iñisqanchistapas. (Juan 14:6; 1 Juan 2:1, 2.)

3. Sonqonchismantan rimananchis Diosman oraspaqa. Manan recitananchischu oraciontaqa nitaq rezanapaq libromantachu leenanchis. (Mateo 6:7, 8.) Respetowanqa sayaspapas, k’umuspapas qonqorikuspapas orallaswanmi, maypipas ima horapipas. Sonqonchispi orasqanchistapas Diosqa uyarinmi. (1 Samuel 1:12, 13.) Ñoqanchispaq mañakuspaqa sapallanchispin orananchis. (Marcos 1:35.)

4. ¿Imakunamantan orakuwaq? Imamantapas, Dioswan allinpi kanaykipaq yanapaqtaqa. (Filipenses 4:6, 7.) Padre nuestro oracionmi rikuchin Jehováq sutinrayku orananchista munaynin ruwakunanpaqpas. Mañakullaswantaqmi imapas necesitasqanchista qowananchispaq, huchanchiskuna pampachananpaq, tentacionkuna atipananchispaqpas. (Mateo 6:9-13.) Manan munasqallanchistachu orananchis. Diospa munasqanman hinallan imatapas mañakunanchis. (1 Juan 5:14.)

5. Sonqoykipi munanki Diosman agradecekuytapas alabaytapas chayqa, orakunallaykin. (1 Crónicas 29: 10-13.) Ama saqeychu oracionniykita problemakuna kaqtinpas iñiyniyki probasqa kaqtinpas. (Salmo 55:22; 120:1.) Allinmi mikhunapaq oraypas. (Mateo 14:19.) Jehovaqa invitawanchismi “ima ratopas” orananchispaq. (Efesios 6:18.)

6. Hatun huchapi urmaspaqa, oracionpin Jehovata rogakunanchis, khuyapayaywan pampachawananchispaq. Diosqa “liston kashan pampachananpaq” sichus huchanchista payman confesakuspa kallpachakusunchis manaña hayk’aqpas huchallikunanchispaq chayqa. (Salmo 86:5; Proverbios 28:13.)

7. Chaninkunaq oracionllantan Jehovaqa uyarin. Chaymi oracionniykita uyarinanpaqqa, anchata kallpachakunayki Diospa kamachisqanman hina kawsanaykipaq. (Proverbios 15:29; 28:9.) Oraspaykiqa, humildadwanmi rimanayki. (Lucas 18:9-14.) Oracionpi mañakusqaykiman hinan kawsanayki. Chhaynatan rikuchinki iñiyniyoq kasqaykita tukuy sonqowan orasqaykitapas. Chayraqmi Jehovaqa oracionniykita uyarinqa. (Hebreos 11:6.)

Copyright © 2008 Watch Tower Bible and Tract Society of Pennsylvania. All rights reserved.