Imaynatan tariwaq cheqaq religionta

1. Jesusqa ch’ullallatan cheqaq cristiana religionta saqeran. Kunan p’unchaypas Jehová Diosta cheqaq adoraqkunaqa ch’ulla grupollan kananku. (Juan 4:23, 24; Efesios 4:4, 5.) Kawsayman apaq k’illku ñanninta riqkuna pisilla kasqantan Bibliaqa yachachin. (Mateo 7:13, 14.)

2. Bibliaqa willaranmi apostolkunaq wañusqan qhepaman congregación cristianaman pantasqa yachachiykunapas mana cristiana costumbrekunapas, pisi pisimanta haykunanta. Kananmi karan creyentekuna pantachiq runakuna, paykunan Cristo qatikuqkunata karunchaspa paykunata qatichikusqaku. (Mateo 7:15, 21-23; Hechos 20:29, 30.) Chayraykun rikunchis cristianon kayku niq askha religionkunata. ¿Imaynatan reqsiswan cheqaq cristianokunata?

3. Cheqaq cristianokunaqa reqsisqan kanku paykuna pura munanakuyninkupi. (Juan 13:34, 35.) Yachankun huk razamanta, huk colormanta runapas paykunawan igual kasqanta. Manan cheqninkuchu huk nacionmanta runakunata. (Hechos 10:34, 35.) Chayraykun guerramanpas mana rinkuchu. Cheqaq cristianokunaqa wayqepanantin hinan kawsanku. (1 Juan 4:20, 21.)

Cheqaq cristianokunaqa munanakunkun, Bibliata respetanku, predicankutaq Diospa Reinonta

4. Bibliata ancha respetasqankupin reqsichikullankutaq cheqaq religionpi kaqkunaqa. Diospa Palabranta hinan aceptanku creenkutaqmi yachachisqanpipas. (Juan 17:17; 2 Timoteo 3:16, 17.) Diospa Palabranmi paykunapaqqa aswan importante runaq piensasqanmantapas costumbrenmantapas. (Mateo 15:1-3, 7-9.) Kallpachakunkun Bibliaq nisqanman hina sapa p’unchay kawsanankupaq. Chaymi paykunaqa yachachisqankuman hina kawsanku. (Tito 1:15, 16.)

5. Cheqaq religionpi kaqkunaqa respetankun Diospa sutinta. (Mateo 6:9.) Jesusqa willaranmi Diospa sutin Jehová kasqanta, cheqaq cristianokunapas chaytan ruwananku. (Juan 17:6, 26; Romanos 10:13, 14.) ¿Pikunan llaqtaykipi Diospa sutinta willanku?

6. Cheqaq cristianokunaqa Diospa Reinontan predicananku. Jesuspas chaytan ruwaran. Payqa rimallaqpunin Reinomanta. (Lucas 8:1.) Discipulonkunatapas kamachiranmi Allpantinpi chay Reinomanta predicanankupaq. (Mateo 24:14; 28:19, 20.) Cheqaq cristianokunaqa creenku Diospa Reinollan Allpaman sumaq kawsay apamunanta. (Salmo 146:3-5.)

7. Jesuspa discipulonkunaqa manan kay millay pachamantachu kanku. (Juan 17:16.) Manan chaqrukunkuchu politicapipas nitaq metekunkuchu kay pachapi cheqninakuykunapipas. Ayqekunkun kay pachapi millay ruwaykunamantapas millay kawsaymantapas. (Santiago 1:27; 4:4.) ¿Reqsinkichu llaqtaykipi kay marcakunayoq cheqaq cristiana religionta?

Copyright © 2008 Watch Tower Bible and Tract Society of Pennsylvania. All rights reserved.