¿Imatam Dios munan Allpapaq?

1. Jehovaqa kay Allpata unancharqa runakuna wiñaypaq yachananpaqmi. Payqa munarqam kusisqa allin runakunapa kawsananta. (Salmo 115:16; Isaías 45:18.) Manam haykapipas Allpaqa chinkanqachu; wiñaypaqmi kallanqa. (Salmo 104:5; Eclesiastés 1:4.)

2. Manaraq runata unanchachkaspam, Allpapi huk parteta Diosqa akllarqa, sumaq huertaman tikraspataq “Edén huerta” nispa suticharqa. Chaypim churarqa ñawpaq warmi qarita: Adanta Evatawan. Diosqa munarqam wawachuriyoqkuna kaspanku Allpantinpi yachanankuta. Pisi pisimantam Allpata paraisoman tikrananku karqa. (Génesis 1:28; 2:8, 15.)

Chinkasqa paraíso

3. Yachachkaspam Adanwan Evawanqa huchallikurqaku Diospa leyninta mana kasukuspa. Chaymi, Edén huertamanta Jehovaqa qarqomurqa, paraisotaq chinkarqa. (Génesis 3:1-6, 23.) Jehová ichaqa mana qonqanchu Allpapaq munasqanta. Payqa prometen paraisoman tikraspa runakunata wiñaypaq kawsachiyta. ¿Imaynatam ruranqa? (Salmo 37:29.)

4. Allpanchik paraíso kananpaqqa mana allin runam chinkanan. (Salmo 37:38.) Armagedonpim tukunqa, Armagedonqa mana allinkuna tukuchinanpaq Diospa guerranmi. Chay qepamanmi, Satanasqa waranqa wata wichqasqa kanqa, chaymi Allpa purmachiq mana allin runaqa manaña kanqachu. Diospa llaqtallanmi salvasqa kanqa. (Revelación 16:14, 16; 20:1-3.)

5. Chay qepamanmi Jesucristo waranqa wata Allpata kamachimunqa (Revelación 20:6) pisi pisimantataq huchata tukuchinqa yuyayninchikmantapas cuerponchikmantapas. Imaynam Adanpas Evapas manaraq huchallikuchkaspaqa perfecto karqaku, chaynam ñoqanchikpas kasunchik. Manam onqoypas, machuyaypas, wañuypas kanqañachu. Onqosqakunapas hampisqam kanqaku, machu payakunapas jovenyanqakum. (Job 33:25; Isaías 33:24; Revelación 21:3, 4.)

6. Jesuspa Waranqa Wata Kamachikuyninpiqa, Diosman fiel runakunam llamkanqaku Allpantinta paraisoman tikranankukama. (Lucas 23:43.) Millonninpi wañusqakunapas kawsarimuspam kay Allpapi yachanqaku. (Hechos 24:15.) Diospa munasqanta kasukuspaqa, wiñaypaqmi kay Allpapi kawsanqaku. Mana chayqa, wiñaypaq wañuchisqam kanqaku. (Juan 5:28, 29; Revelación 20:11-15.)

7. Chaynatam cumplikunqa qallariymantapacha Allpapaq Diospa munaynin. ¿Munawaqchu Diospa bendicionninkuna chaskiyta? Chaynaqa, hinallam yachanayki Jehovamanta, kasukunaykitaq kamachikuyninkunatapas. Chaykunapi yanapasunaykipaqmi llaqtaykipi Jehovapa testigonkunapa Salón del Reinonpi huñunakuyman rinayki. (Isaías 11:9; Hebreos 10:24, 25.)

Armagedón qepatam, Allpaqa paraíso kanqa

Copyright © 2008 Watch Tower Bible and Tract Society of Pennsylvania. All rights reserved.