¿Imataq Diospa Reinon?

1. Allpapi kachkaspam Jesusqa, discipulonkunaman yachachirqa Diospa Reinon hamunanpaq mañakunankuta. Reinoqa reywan kamachikuq gobierno ninanmi. Chaymzi Diospa Reinonqa sumaq gobierno. Cielopi takyasqam kachkan, chaymantam Allpata kamachimunqa. Diospa sutintam chuyanchanqa. Diospa munaynintam kay Allpapi rurachinqa cielopi hina. (Mateo 6:9, 10.)

2. Diosmi prometerqa Reinonpa Reynin Jesús kananpaq. (Lucas 1:30-33.) Allpapi kachkaspam Jesusqa rikuchirqa sumaq, allin, chuya Gobernante kananta. Cieloman kutispaqa, manam Diospa Reinonpi kamachirqapachachu. (Hebreos 10:12, 13.) Jehová qorqa 1914 watapi Jesusman prometesqan autoridadta. Chaymantapacham, nombrasqa Rey hina Jesusqa cielopi gobernachkan. (Daniel 7:13, 14.)

3. Jehovaqa akllarqataqmi Allpamanta fiel qarikunata warmikunatapas cieloman rinankupaq. Paykunapas Jesuswan kuskam kay pachapi runakunata gobernamunqaku reykuna, juezkuna, sacerdotekuna hina. (Lucas 22:28-30; Revelación 5:9, 10.) Jesusmi paywan kuska gobernaqkunata suticharqa “pisilla huñu”, nispa. Llapanpiqa 144.000 runakunam. (Lucas 12:32; Revelación 14:1-3.)

4. Rey karuspanmi Jesusqa, cielomanta kay Allpaman wischumurqa Satanasta mana allin angelninkunantinta. Chayraykum 1914 watamantapacha problemakunaqa astawan yapakuchkan. (Revelación 12:9, 12.) Guerrakuna, yarqaykuna, onqoykuna, mana allin kawsaypa yapasqankunam..., Jesuspa gobernasqan rikuchiq “señalqa”, tukupay tiempopiña kay pacha kasqanta rikuchiqpas. (Mateo 24:3, 7, 8, 12; Lucas 21:10, 11; 2 Timoteo 3:1-5.)

5. Jesusqa runakunatam juzganqaña hinaspam michiq hina cabrakunamanta ovejakunata rakinqa. Kamachisqanta tukuy sonqowan kasukuqkunatam payqa “ovejata” hina rikunqa, paykunamanmi kay Allpapi wiñay kawsayta qonqa. Diospa Reinonta rechazaqkunam “cabra” hina kanqaku. (Mateo 25:31-34, 46.) Jesusqa wañuchinqañam cabraman rikchakuq runakunata. (2 Tesalonicenses 1:6-9.) Jesuspa “ovejan” kayta munaspaqa, Reinomanta willakuykunatam uyarinayki yachasqaykiman hinataq kawsanaykipas. (Mateo 24:14.)

Jesús gobernamuptinqa manañam cheqninakuypas kanqachu

6. Allpaqa achka nacionkunapim rakisqa kachkan, sapakamataq gobiernoyoqkama. Paykuna puram maqanakunku. Diospa Reinonmi ichaqa llapan gobiernokunata reemplazanqa. Chay gobiernollam Allpata kamachinqa. (Daniel 2:44.) Manañam kanqachu guerrakunapas, wañuchinakuypas, mana allin kawsaypas. Lliw runam huk nisqalla hawkapi sumaqta kawsanqaku. (Miqueas 4:3, 4.)

7. Jesuspa Kamachisqan Waranqa Watapiqa, perfectom fiel runakunaqa kanqaku, Allpataqmi sumaq paraíso kanqa. Waranqa wata tukuypaqmi Jesusqa ruranqa Diospa imaymana munasqanta. Chaymantataq Taytanman Reinota entreganqa. (1 Corintios 15:24.) ¿Willawaqchu familiaykikunaman amigoykikunamanpas Diospa Reinonpa rurananmanta?

Copyright © 2008 Watch Tower Bible and Tract Society of Pennsylvania. All rights reserved.