Diospa munasqanman hina kawsaq familia

1. Bibliam nin qosam familiapi umaqa, nispa. (1 Corintios 11:3.) Huk warmiyoqllam qariqa kanan, casarakuspataq warmiwanqa yachananpas. (1 Timoteo 3:2; Tito 3:1.)

2. Kikinta hinam qosaqa warminta kuyakunan. Imaynam Jesuspas discipulonkunata tratarqa chaynatam qosapas warminta tratanan. (Efesios 5:25, 28, 29.) Manam haykapipas maqananchu nitaq imawanpas ñakarichinanchu. Aswanmi, respetaspa kuyakunan. (Colosenses 3:19; 1 Pedro 3:7.)

Kuyakuq taytam qon familianman imaymanata, espiritualpi necesitasqantapas

3. Allintam taytaqa llamkanan familian mantienenanpaq. Mikunata, pachata, wasita imam qonan warminman churinkunamanpas. Diosmantapas yachachinanmi. (1 Timoteo 5:8.) Paymi familianta yanapanan Diosmantapas Munayninmantapas yachanankupaq. (Deuteronomio 6:4-9; Efesios 6:4.)

4. Qosanpaq allin yanapaqmi kanan warmiqa. (Génesis 2:18.) Wawakuna yachachiypim yanapanan qosanta. (Proverbios 1:8.) Kuyakuywanmi warmiqa familianta atiendenan, chaytam Jehovaqa munan. (Proverbios 31:10, 15, 26, 27; Tito 2:4, 5.) Warmiqa anchatam qosanta respetanan. (Efesios 5:22, 23, 33.)

5. Churikunatam Diosqa kamachin tayta mamankuta kasukunankupaq. (Efesios 6:1-3.) Diosmi munan tayta mamakuna wawankuta yachachinanta correginantapas. Tayta mamakunaqa tiempotam hapinanku churinkuwan kuska kanankupaq, Bibliata estudiaspanku espiritual necesidadninkupipas ima munasqankupipas yanapanankupaq. (Deuteronomio 11:18, 19; Proverbios 22:6, 15.) Manam haykapipas wawankuta maltrataspaqa disciplinanankuchu. (Colosenses 3:21.)

Diosmi munan tayta mamakuna wawankuta yachachispa correginanta

6. Warmi qari kawsaypi problema kaptinqa, Bibliapa consejonman hinam allichananku. Bibliaqa yachachiwanchikmi kuyakuyta pampachaytapas. (Colosenses 3:12-14.) Diospa Palabranqa manam recomendanchu rakinakuyta uchuy problema allichanapaqqa. Warmim ichaqa qosanmanta rakikunman sichus 1) pay manapuni munanmanchu familian mantieneyta, 2) llumpay mana allin kaspa warminta wañuchiyta munanman, saludnintapas peligropi churanman, otaq 3) llumpayta harkakuspa Jehová servinanta mana munanmanchu hinaptinqa. (1 Corintios 7:12, 13.)

7. Casado warmi qariqa sapakamapaqmi fiel kananku. Adulterioqa qosawan, warmiwan, Dioswanpas huchallikuymi. (Hebreos 13:4.) Casado kachkaspa fornicacionpi pantallaptinkum divorciakunmanku ninmi Bibliaqa, chayraqmi mayqenpas libre kanman hukwan casarakunanpaq. (Mateo 19:6-9; Romanos 7:2, 3.) Adulterio mana kachkaptin divorciakuspa hukwan casarakuytaqa anchatam Jehovaqa cheqnin. (Malaquías 2:14-16.)

Copyright © 2008 Watch Tower Bible and Tract Society of Pennsylvania. All rights reserved.