Imaynatam tariwaq cheqap religionta

1. Jesusqa hukllatam cheqap cristiana religionta saqerqa. Kunan punchawpas Jehová Diosta cheqap adoraqkunaqa huk grupollam kananku. (Juan 4:23, 24; Efesios 4:4, 5.) Kawsayman apaq kichki ñanninta riqkuna pisilla kasqantam Bibliaqa yachachin. (Mateo 7:13, 14.)

2. Bibliaqa willarqam apostolkunapa wañusqan qepaman congregación cristianaman pantasqa yachachiykunapas mana cristiana costumbrekunapas, pisi pisillamanta yaykunanta. Kananmi karqa iñiqkunata pantachiq runakunapas, paykunam Cristo qatikuqkunata karunchaspa paykunata qatichikusqaku. (Mateo 7:15, 21-23; Hechos 20:29, 30.) Chayraykum rikunchik cristianom kaniku niq achka religionkunata. ¿Imaynatam reqsinchikman cheqap cristianokunata?

3. Cheqap cristianokunaqa reqsisqam kanku paykuna pura kuyanakuyninkupi. (Juan 13:34, 35.) Yachankum huk razamanta, huk colormanta runapas paykunawan igual kasqanta. Manam cheqninkuchu huk nacionmanta runakunata. (Hechos 10:34, 35.) Chayraykum guerramanpas mana rinkuchu. Cheqap cristianokunaqa wawqe panintin hinam kawsanku. (1 Juan 4:20, 21.)

Cheqap cristianokunaqa kuyanakunkum, Bibliata respetanku, predicankutaq Diospa Reinonta

4. Bibliata ancha respetasqankupim reqsichikunkutaq cheqap religionpi kaqkunaqa. Diospa Palabranta hinam aceptanku creenkutaqmi yachachisqanpipas. (Juan 17:17; 2 Timoteo 3:16, 17.) Diospa Palabranmi paykunapaqqa aswan importante runapa piensasqanmantapas costumbrenmantapas. (Mateo 15:1-3, 7-9.) Kallpachakunkum Bibliapa nisqanman hina sapa punchaw kawsanankupaq. Chaymi paykunaqa yachachisqankuman hina kawsanku. (Tito 1:15, 16.)

5. Cheqap religionpi kaqkunaqa respetanankum Diospa sutinta. (Mateo 6:9.) Jesusqa willarqam Diospa sutin Jehová kasqanta, cheqap cristianokunapas chaytam rurananku. (Juan 17:6, 26; Romanos 10:13, 14.) ¿Pikunam llaqtaykipi Diospa sutinta willanku?

6. Cheqap cristianokunaqa Diospa Reinontam predicananku. Jesuspas chaytam rurarqa. Payqa rimaqpunim Reinomanta. (Lucas 8:1.) Discipulonkunatapas kamachirqam Allpantinpi chay Reinomanta predicanankupaq. (Mateo 24:14; 28:19, 20.) Cheqap cristianokunaqa creenku Diospa Reinollan Allpaman sumaq kawsay apamunanta. (Salmo 146:3-5.)

7. Jesuspa discipulonkunaqa manam kay mana allin pachapa partinchu kanku. (Juan 17:16.) Manam chaqrukunkuchu politicapipas nitaq kay pachapi cheqninakuykunapipas. Karunchakunkum kay pachapi mana allin ruraykunamantapas mana allin kawsaymantapas. (Santiago 1:27; 4:4.) ¿Reqsinkichu llaqtaykipi kayna marcayoqkuna cheqap cristiana religionta?

Copyright © 2008 Watch Tower Bible and Tract Society of Pennsylvania. All rights reserved.