Imayna organizasqam Jehovapa testigonkuna

1. Kunan tiempopi Jehovapa testigonkunapa llamkayninqa 1870 watapim qallarirqa. Estudiantes de la Biblia nispam sutichakurqaku, 1931 watapitaqmi Bibliapa nisqanman hina Jehovapa testigon sutiwan sutichakurqaku. (Isaías 43:10.) Asllamantam achkaman yapakun, kunanqa 230 masnin nacionpim millonninpi Testigokuna predicachkanku.

2. Yaqa llapan congregacionkunapim Jehovapa testigonkunaqa semanapi kimsa kutita huñunakunku. Invitasqam kanki chay reunionkunaman rinaykipaq. (Hebreos 10:24, 25.) Bibliamantam chay reunionkunapiqa yachachinku. Huñunakuyqa oracionwanmi qallarinpas tukunpas, yaqa llapan reunionkunapim tukuy sonqowan takinku “espiritual takikunata”. (Efesios 5:18, 19.) Gratismi yaykunku manam qollqetapas mañankuchu. (Mateo 10:8.)

3. Salón del Reinopim yaqa llapan congregacionkunaqa huñunakunku. Kikin Testigokunam Salón del Reinotaqa ruranku, salonkunaqa yachanapaq wasi hinallam. Chaypiqa manam rikunkichu imagenkunatapas, cruzkunatapas. Gastokunatapas sonqonkupa munasqanman hina qosqankuwanmi pagakun. Qoy munaqkunaqa caja de contribuciones nisqamanmi churanmanku. (2 Corintios 9:7.)

4. Sapakama congregacionpim kan ancianokuna, otaq superintendentekuna, paykunam yachachinku. (1 Timoteo 3:1-7; 5:17.) Siervo ministerialkunam paykunata yanapanku. (1 Timoteo 3:8-10, 12, 13.) Manam pipas jefe hinaqa congregacionpi kamachinchu. (2 Corintios 1:24.) Manam ima titulotapas chaskinkuchu. (Mateo 23:8-10.) Manam hukniraqtachu pachakunkupas. Manam yachachisqankumanta pagota chaskinkuchu. Congregacionpi espiritual necesidadkunatapas ancianokunaqa gustowanmi yanapanku. Problemanku kaptinpas yanapaspam consolanku. (Santiago 5:14-16; 1 Pedro 5:2, 3.)

5. Sapa watam Jehovapa testigonkunaqa hatun asambleakunapi huñunakunku. Achka congregacionkunam huñunakunku Bibliapa yachachisqan especial programata uyarinankupaq. Chay asambleakunapim mosoq discipulokunapas bautizakunku. (Mateo 3:13-17; 28:19, 20.)

6. Nueva Yorkpim kachkan Jehovapa testigonkunapa oficina centralqa. Chaypim kachkan Cuerpo Gobernante, paykunaqa ancha experienciayoq ancianokunam, mundontinpi congregacionkuna yanapaq. Mundontinpim kantaq pachak masnin sucursalkuna. Chaypi llamkaq voluntariokunam yanapanku, Bibliata librokunata ruraypi congregacionkunaman apachiypipas. Sucursalpim organizakun predicanapaqpas. ¿Allichawaqchu tiempoykita llaqtayki cercapi sucursalta visitanaykipaq?

Copyright © 2008 Watch Tower Bible and Tract Society of Pennsylvania. All rights reserved.