¿Imatapunitaq Biblia Yachachin?

¿IMA willaykunatataq telepi, radiopi ima uyarinki? ¿Manachu maqanakuymanta, suwakuymanta, wañuchinakuymanta ima uyarikun? Chantapis llakiykunasniykipi t’ukuriy. Ichapis, amigoyki chayri familiaykimanta pillapis unquykun chayri wañupun, chaytaq llakichichkasunki. Ichapis Jobjina llakiywan jinata ninki: “Ima p’unchaypis llakiyllaña noqapajqa”, nispa (Job 30:16).

Chayrayku ichapis tapukunki:

• ¿Kayjinata kawsananchiktachu Dios munarqa?
• ¿Maypitaq llakiyniyta atipanaypaq yanapata tariymanrí?
• ¿Mayk’aqllapis maqanakuykuna Jallp’amanta chinkanmanchu?

Biblialla kay tapuykunaman kutichiwanchik.

BIBLIAQA, ALLIN KAWSAYTA DIOS KAY JALLP’AMAN APAMUNANTA NIWANCHIK.

“Payqa tukuy waqayta ñawisninkumanta pichanqa, manañataj wañuy kanqachu, nitaj waqaypis, nitaj qhapariypis, nitaj nanaypis.” (Apocalipsis 21:4)

“Cojosqa tarukas jina phinkiykachanqanku.” (Isaías 35:6)

“Ciegospis rikuyta atenqanku.” (Isaías 35:5)

“Tukuy p’ampasqa kajkunaqa [...] jatarimonqanku.” (Juan 5:28, 29)

“Mana pipis nenqachu: Onqosqa kani, nispaqa.” (Isaías 33:24)

“Nacionnimpeqa ashkha trigo [chayri mikhuna] ka[nqa].” (Salmo 72:16)

BIBLIAMANTA YACHAKUNAYKIQA ALLINNIYKIPAQ

Tawa, phichqa kaq paginapi imachus rikukusqanqa mana juk cuentollachu, imaraykuchus Diosllataq ajina kananta nirqa, Bibliataq imaynatachus junt’akunanta willawanchik.

Astawanpis llakiypi kaspa imaynatachus kusisqa kawsakunata yachachillawanchiktaq. Ch’ampayniykipi, llakiyniykipi ima t’ukuriy, ichapis qullqimanta, familiaykimanta pillapis unqusqa kasqanmanta chayri wañupusqanmanta phutisqa kachkanki. Bibliaqa, chay tukuy llakiykunata atipanapaq yanapawanchik, chantapis kay tapuykunaman kutichispa sunquchawanchik:

• ¿Imaptintaq ñak’arinchik?
• ¿Imaynatataq llakiyninchikta atipasunman?
• ¿Imatataq familianchik kusisqa kawsakunanpaq ruwasunman?
• ¿Maymantaq wañuspa ripunchik?
• ¿Wañusqa familiaresninchikwan watiqmanta tinkukapusunmanchu?
• ¿Imaptintaq Diospa nisqan junt’akunanta suyasunman?

Kay librota ñawirisqaykiqa, Bibliamanta yachakuyta munasqaykita rikuchin, kay librotaq Bibliamanta yachakunaykipaq yanapasunqa. Sapa paginap ura kantunpi tapuykunata tarinki, parrafopi ñawirisqaykimanjina kutichinaykipaq. Achkha runastaq, Jehovamanta sut’inchaqkuna ajinamanta Bibliamanta yachachisqankuta allinpaq qhawanku, qampis allinpaq qhawanaykita suyayku. Imatapunichus Biblia yachachisqanta yachanaykipaq Dios yanapasunanta munayku.

BIBLIATA ALLINTA RIQSIY

BIBLIAQA 66 librosniyuq, sapa librotaq t’aqakunapi, p’itikunapi ima rak’isqa kachkan. Bibliapi mask’anapaq rikhuriptin, ñawpaq kaq numeroqa t’aqa niyta munan, qhipan kaq numerotaq p’iti niyta munan. Sut’incharinapaq, “2 Timoteo 3:16” rikhuriptin, 2 kaq carta Timoteoman, 3 t’aqa, 16 p’iti niyta munan.

Kay libropi Bibliamanta p’itikunata mask’anki chayqa, Bibliata allinta riqsinki. Chantapis Bibliata ñawiriyta qallarinki chayqa, sapa p’unchay kimsa chayri phichqa t’aqata ñawirispaqa, juk watapi Bibliata ñawiriyta tukunki.