¿Pitaj Jesucristoqa?

1. Manaraj Jallp’aman jamushaspa, Jesúsqa janajpachapi tiyakorqa espíritu jina. Diospaj ñawpa ruwasqan karqa; chayrayku sutikun Diospaj “phiwi” Churin. (Colosenses 1:15; Revelación 3:14.) Diospuni uj k’ata churinta jina Jesústa ruwarqa, mana pipis yanaparqachu. Janajpachapi Jesúsqa kashaspa Jehová Diospaj “llank’aj masin” karqa, janajpachapi Jallp’apipis imaymana kajta paywan ruwarqa. (Proverbios 8:22-31; Colosenses 1:16, 17.) Chaymanta Diosqa aswan rimajninta jina kamacherqa. Chayrayku Jesúsqa sutikun “Rimaj”. (Juan 1:1-3; Revelación 19:13.)

2. Diosqa Churinta Jallp’aman kachamun, kawsayninta Maríaj wisanman astamuspa. Chayrayku Jesúspaj tatanqa mana runachu; chayraykutaj mana juchayojchu, ch’uya cheqan runa. Kinsa kamachiypaj Diosqa Jesústa Jallp’aman kachamun: 1) Diosmanta cheqa kajta yachachiwananchispaj (Juan 18:37), 2) Diospaj junt’a sonqo kananpaj, chayta rikuspa payta yachapayanapaj (1 Pedro 2:21), 3) kawsayninta wañuyman churananpaj, juchamanta wañuymantawan kacharichiwananchispaj. ¿Imaraykutaj chay wañuyta churanan karqa? (Mateo 20:28.)

3. Diospaj kamachisqanta mana kasukuspa, Adán, ñawpa runa, juchachaqorqa; chayta Bibliaqa sutichan “jucha”. Chayrayku, wañuyman Diosqa jaywarqa. (Génesis 3:17-19.) Diospaj kamachisqanta manaña junt’aspaqa, ch’uya kaynin tukukun. Pisi pisimanta machuyaspa wañuypi tukun. Adantaj tukuy wawankunaman juchata saqen. Chayrayku machuyanchis, onqonchis, wañunchispis. ¿Imaynatataj runakunata kacharichikunman karqa? (Romanos 3:23; 5:12.)

4. Jesúsqa Adán jina ch’uya runa karqa. Mana juchallikorqachu Adán jinaqa, aswan jatun muchuypipis Jesúsqa Diosta kasukujpuni. Chayrayku, payqa aterqa wañuyman churayta ch’uya kawsayninta Adanpaj juchanta rantinanpaj. Chay ruwayta Bibliaqa sutichan “rescate” nispa. Ajinamanta Adanpaj wawankuna wañunamantaña kacharichikunku. Tukuy Jesúspi iñiyta churajkuna, juchankuta atinku panpachayta, wiñay wiñaypaj kawsayta jap’iytapis. (1 Timoteo 2:5, 6; Juan 3:16; Romanos 5:18, 19.)

Diospaj llank’ayninpeqa Jesúsqa yachacherqa, milagrokunata ruwarqa, kawsaynintapis ñoqanchisrayku qorqa

5. Jallp’api kashaspa, Jesúsqa onqojkunata janpin, yarqhayojkunata mikhuchin, jatun wayrakunatapis sayachin. Wañujkunatapis kawsachin. ¿Imaraykutaj milagrokunata ruwarqa? 1) Muchujkuna runata khuyaqorqa yanapaytataj munarqa. 2) Milagrosninqa rikuchin Diospaj Churin kasqanta. 3) Qhawacherqa Rey jina Jallp’ata kamachimujtin imatachus kasukuj runakunapaj ruwanqa. (Mateo 14:14; Marcos 2:10-12; Juan 5:28, 29.)

6. Jesúsqa wañun, espiritual cuerpopitaj Diosqa kawsacherqa, janajpachamantaj kutipun. (1 Pedro 3:18.) Chaymantaqa Diosqa Reyta ruwan. Jesúsqa tukurpachenqaña Jallp’amanta tukuy sajra kaj muchuykunatapis. (Salmo 37:9-11; Proverbios 2:21, 22.)

Copyright © 2008 Watch Tower Bible and Tract Society of Pennsylvania. All rights reserved.