¿Imataj Diospaj Reinonqa?

1. Jallp’api kashaspa Jesúsqa, khatijkunasninman yachacherqa oracionpi mañakunankuta Diospaj Reinonta jamunanpaj. Castellano simipi “Reino” nisqa kanman uj reypaj kamachiynin jina. Diospaj Reinonqa uj sumaj kamachej. Janajpachapi sayasqa kashan, chaymantapacha Jallp’ata kamachimunqa. Diospaj sutinta ch’uyanchanqa, nisunman, santo nisqaman tukuchenqa. Diospaj munayninta kay Jallp’api ruwachenqa janajpachapi jina. (Mateo 6:9, 10.)

2. Diosqa nerqapuni Reinonpi Jesúsqa Rey kananpaj. (Lucas 1:30-33.) Jallp’api kashaspa Jesúsqa, rikucherqa k’acha, cheqan, ch’uya kamachimuj kananta. Janajpachaman kutispaqa, manaraj Reyjina tiyaykusqachu Diospaj Reinonpeqa. (Hebreos 10:12, 13.) 1914 watapi, Jehováj nisqanmanjina Jesúsman kamachiyninta qorqa. Chaymantapacha, Reynin jina sutichasqa Jesúsqa janajpachapi kamachishan. (Daniel 7:13, 14.)

3. Jehováqa ajllallantaj Jallp’amanta wakin junt’a sonqo qharikunata warmikunatapis janajpachaman rinankupaj. Paykuna Jesúswan kuska runakunata kamichimunqanku reyes, jueces, sacerdotes nisqakuna jina. (Lucas 22:28-30; Revelación 5:9, 10.) Jesúswan kuska kamachejkunata payqa suticharqa “juchuy juñu”. Tukuyninpeqa 144.000 kanku. (Lucas 12:32; Revelación 14:1-3.)

4. Rey kaytawan Jesúsqa, janajpachamanta kay Jallp’aman Satanásta, sajra angelkunatawan wijch’umun. Chayrayku 1914 watamantapacha llakiykunaqa astawan yapakun. (Revelación 12:9, 12.) Maqanakuykuna, yarqaykuna, onqoykuna, millay kawsaykuna yapakuj. . . , tukuy kaykuna “señalqa” rikuchin Jesúsqa kamachimushasqantaña, kay kawsayqa tukukuy p’unchaypiña kasqanta. (Mateo 24:3,7,8, 12; Lucas 21:10, 11; 2 Timoteo 3:1-5.)

5. Jesúsqa runakunata juchanman jina qopunqa, michej jina cabrakunamanta ovejakunata ajllanqa. Kamachisqanta junt’a sonqoyuj kasujkunata payqa “ovejas” jinata rikunqa, paykunamantaj kay Jallp’api wiñay wiñaypaj kawsayta qonqa. Diospaj Reinonta mana munajkunataj “cabras” jina kanqanku. (Mateo 25:31-34, 46.). Jesúsqa jamuj qayllapiña, cabras jinaman rijch’akuj runakunata chinkachenqa. (2 Tesalonicenses 1:6-9.) Jesúspaj “ovejan” jina kayta munaspaqa, Reinomanta willaykunata uyariy, yachasqaykiman jinataj ruwaypis. (Mateo 24:14.)

Jesúspaj kamachiyninpeqa, chejninakuy millay qhawanakuypis manaña kanqachu

6. Jallp’aqa ashkha suyukunapi t’aqasqa kashan, sapa ujtaj kamachiyniyoj. Paykuna pura maqanakunku. Aswanqa tukuy runakunaj kamachiyninpeqa Diospaj Reinollan sayanqa. Jinamanta tukuy Jallp’api Diospaj k’ata kamachiynillan kanqa. (Daniel 2:44.) Chantaqa manaña kanqachu maqanakuy, wañuchinakuy, sajra phiñanakuypis. Ujllapi mana phiñanakuspa tukuy runakuna kawsanqanku. (Miqueas 4:3, 4.)

7. Jesúspaj Waranqa wata Reinonpeqa, junt’a sonqo runakunaqa ch’uyaman chayanqanku, t’ikapachaman tukuy Jallp’ataj tijrakapunqa. Waranqa wata tukukushajtenqa Jesúsqa ruwanqaña Diospaj imaymana munasqanta. Chaymantaqa Tatanman Reinota jaywanqa. (1 Corintios 15:24.) ¿Willawajchu masiykikunaman familiaykikunamanpis Diospaj Reinon ruwananmanta?

Copyright © 2008 Watch Tower Bible and Tract Society of Pennsylvania. All rights reserved.