Diospaj llank’ajkunaqa llimphu kananku tiyan

1. Jehová Diosqa llimphu, santo nisqataj. Yupaychajninkunamanta suyan llimphu kanankuta espiritualmente nisqapi, kawsayninkupi, yuyayninkupi, ukhunkupipis. (1 Pedro 1:16.) Diospaj ñawinpi llimphu kanapajqa anchata kallpachakuna. Ch’ichi mundopi kawsanchis. Aswanpis, sajra aychaj munayninwan uj maqanakuy kapuwanchis. Chaywanqa manapuni atipachikunachu.

2. Espiritual nisqapi llimphu kay: Jehovápaj llank’ayta munaspaqa, mana ch’ipakunachu ima pantasqa religionmanta yachachiyninwan costumbrenwanpis. Llojsipuna pantasqa religionmanta manataj ni imawanpis yanapanachu. (2 Corintios 6:14-18; Revelación 18:4.) Diosmanta sut’i cheqanta yachaspaqa, manaña ch’awkiyachikunachu llulla yachachejkunawan. (2 Juan 10, 11.)

3. Kawsaypi llimphu kay: Jehováqa munan yupaychajkunasninmanta cheqa cristiano jina maypipis sumaj kawsayniyoj kanankuta. (1 Pedro 2:12.) Payqa rikun tukuy ima ruwasqanchista, pakayllapi ruwasqanchistapis. (Hebreos 4:13.) Ayqekuna khuchichakunamanta tukuy millay ruwaykunamantapis kay mundomanta. (1 Corintios 6:9-11.)

4. Yuyaypi llimphu kay: Umanchista llimphu yuyaykunawan junt’achisun chayqa, kawsayninchispis llimphu kanqa. (Filipenses 4:8.) Millaykunallapi yuyasunchej chayqa, millay ruwaykunapi urmasun. (Mateo 15:18-20.) Wakin rijch’aj ruwaykunaqa atinman yuyayninchista ch’ichichayta chaymantaqa ayqekuna. Diospaj Rimayninta yachaspaqa, umanchista junt’achisun llimphu yuyaykunawan.

5. Ukhupi llimphu kay: Cristianokunaqa Diospaj sutinpi purinchis, chayrayku ukhuta p’achatapis llimphuchananchis tiyan. Mayllakuna makinchista mikhunapaj, mikhunata jap’inapaj, baño nisqaman yaykuspapis. Wasiykipi mana baño kajtenqa, p’anpanayki jatun jisp’ayniykita. (Deuteronomio 23:12, 13.) Ukhunchis llimphu kajtenqa mana onqoypis kanqachu. Cristianoj wasinqa ukhunpi, jawanpis sumaj allinchasqa llimphuchaskataj kanan tiyan. Comunidadpi rikuchinanku tiyan qhatinapaj jina kasqankuta.

6. Llimphu rimay: Diospaj llank’ajkunaqa cheqatapuni mana llullakuspa rimananku. Llullakojkunaqa Diospaj Reinonman mana yaykunqankuchu. (Efesios 4:25; Revelación 21:8.) Cristianokunaqa mana khuchi-simi rimayniyoj. Mana uyarinkuchu nitaj willanakunkuchu khuchi-rimayta, millay chansakunatapis. Allin rejsisqa kanku llank’aypi, yachaywasipi, comunidadpipis llimphu rimayniyoj kasqankurayku. (Efesios 4:29, 31; 5:3.)

Diospaj llank’ajkunaqa tukuy imapi llimphu kananku tiyan

Copyright © 2008 Watch Tower Bible and Tract Society of Pennsylvania. All rights reserved.