Imanöraq tarinkiman razompa religionta

1. Jesusqa patsätserqan hukllella razompa religiontam. Tsemi kanampis kanan hukllella razompa Jehová adoraqkuna (Juan 4:23, 24; Efesios 4:4, 5). Wallkaqllash kayan kaweman, kichki nänipa ewaqkunaqa, ninmi Bibliaqa (Mateo 7:13, 14).

2. Apostolkuna wanuriyaptenqa, ichikllapayanmi yekatsiyanqa mana alli yachatsikikunata, rurëkunatapis, congregacionman nikarqannam Bibliaqa. Kayänaqshi nunakuna, pekunawan ewkuyananta munarnin, creikoqkunata willapaq, tsenopa Cristopa qateqninkunata rakiyarqan (Mateo 7:15, 21-23; Hechos 20:29, 30). Tsemi tükilaya cristianotukoq religionkunata rikantsik. ¿Imanöraq reqishwan razompa cristianokunata?

3. Razompa cristianokunata reqintsik kikinkunapura kuyanakuyaptinmi (Juan 13:34, 35). Pekunaqa yachakuyashqa llapan nunakunapis pekunanolla kayanqantam. Hina manam yachakuyashqatsu huk naciompa nunankuna chikita (Hechos 10:34, 35). Tsemi ni ima guerrakunaman ewayantsu. Razompa cristianokunaqa rikänakuyan pani turinomi (1 Juan 4:20, 21).

Razompa cristianokunaqa kikinkunapuram kuyanakuyan, Bibliatam respetayan, Diospa Reinompitam yachatsikuyan

4. Hina razompa religiontaqa reqintsik, nunankuna Bibliata alleq respetayaptinmi. Diospa Palabrantanomi chaskiyan, creiyanmi nenqanman (Juan 17:17; 2 Timoteo 3:16, 17). Pekunapaqqa, Diospa Palabranqa más allim nunakunapa penseninkunapitapis o costumbrenkunapitapis (Mateo 15:1-3, 7-9). Llapan kawëninkunachomi tïrayan Biblia nenqanno kaweta. Tsemi kawayan predicayanqanno (Tito 1:15, 16).

5. Razompa religioncho kaqkunaqa hina honrayänanmi Diospa shutinta (Mateo 6:9). Jesusqa reqitserqam nunakunata Diospa shutinta, Jehová, tsemi razompa cristianokunapis tsenolla rurayanan (Juan 17:6, 26; Romanos 10:13, 14). ¿Pikunataq Diospa shutinta willapäkur puriyan täranqekipa?

6. Diospa Reinompitam willapäkuyanan razompa cristianokunaqa. Jesuspis tsenomi rurarqan. Pëqa imepis Reinopitam willapakoq (Lucas 8:1). Hinamampis discipulonkunatam mandarqan kë Reinopita hinantin Patsacho willapakuyänampaq (Mateo 24:14; 28:19, 20). Razompa cristianokunaqa creiyan Diospa Reinonlla shumaq kushikita, kawakita kë Patsaman apamunantam (Salmo 146:3-5).

7. Jesuspa discipulonkunaqa manam kë mana alli mundopa kaqtsu kayan (Juan 17:16). Manam takukäyantsu politicakunaman ni kë nunakunapa liryakïninkunaman. Witikuyanmi mana alli kë nunakunapa lluta rurëninkunapita, mana alli portamientonkunapitapis (Santiago 1:27; 4:4). Kë llapan yachakonqantsiktam razompa religionqa ruran, ¿reqinkiku markëkicho tseno ruraqkunata?

Copyright © 2008 Watch Tower Bible and Tract Society of Pennsylvania. All rights reserved.