Eaa te Patireia o te Atua?

1. I tona tuatau i te enua nei, kua apii a Iesu i tana au pipi kia pure no te Patireia o te Atua. Ko tetai patireia e kavamani ia tei aratakiia e tetai ariki. Ko te Patireia o te Atua e kavamani taka ke ia. Kua akanooia ki te rangi e ka tutara mai ki rungao i te enua nei. Ka akataka ke, me kare ka akatapu te reira, i te ingoa o te Atua. Ka akatupu te reira kia akonoia to te Atua anoano ki runga i te enua nei mei to te rangi katoa ra.—Mataio 6:9, 10.

2. Kua taputou te Atua e ka riro ko Iesu te Ariki no Tona Patireia. (Luka 1:30-33) Ia Iesu i runga i te enua nei, kua akapapu mai aia e ka akono aia ei tetai Tutara takinga meitaki, tuatua tau e te apa kore. I tona oki anga ki te rangi, kare aia i akateronoia ei Ariki no te Patireia o te Atua i reira tikai. (Ebera 10:12, 13) I te 1914, kua oronga atu a Iehova kia Iesu i te mana Tana i taputou ra kiaia. Mei reira maira, kua tutara a Iesu ki te rangi ei Ariki akataoongaia o Iehova.—Daniela 7:13, 14.

3. Kua iki katoa a Iehova i etai au tangata e te au vaine mei te enua nei kia aere ki te rangi. Ka tutara ratou ma Iesu ei au ariki, ei au akava, e ei kautaunga i rungao i te au tangata. (Luka 22:28-30; Apokalupo 5:9, 10) Kua tapaia e Iesu teia aronga tutara kapiti i tona Patireia e ko te “anana iti.” E 144,000 to ratou numero.—Luka 12:32; Apokalupo 14:1-3.

4. I muri poto mai i to Iesu riro anga ei Ariki, kua uriia mai e ia a Satani ratou ko tana au angera rave kino ki vao i te rangi e ki raro i te enua nei. No reira i kino rava’i te au apinga i konei i te enua nei mei te 1914 mai ra. (Apokalupo 12:9, 12) Te au tamaki, te onge kai, te maki mate, te tupuanga te rave kino—pouroa teia e tuanga no te “akairo” te akakite maira e te tutara ra a Iesu e kua tae teia akatereanga ki tona tuatau openga.—Mataio 24:3, 7, 8, 12; Luka 21:10, 11; 2 Timoteo 3:1-5.

5. Kare e roa atu ka akava a Iesu i te au tangata e ka akataka ia ratou mei tetai tiaki mamoe e akataka ke i te mamoe mei te au puaka nio ra. Te au “mamoe” ko te aronga tei akapapu ra ia ratou uaorai ei au tangata tiratiratu nona ra. Ka rauka ia ratou te ora mutu kore i te enua nei. Ko te au “puaka-nio” ko te aronga tei kopae ke i te Patireia o te Atua ra. (Mataio 25:31-34, 46) I te tuatau vaitata ki mua, ka akapou a Iesu i te aronga katoa mei te puaka nio rai te tu. (2 Tesalonia 1:6-9) Me te anoano ra koe ei tetai “mamoe” na Iesu, ka tika koe kia akarongo i te tuatua no te Patireia e kia rave i taau ka apii.—Mataio 24:14.

I raro ake i ta Iesu tutara anga, kare e makitakita akaou me kare e akamoupuku

6. I teianei kua veeveeia te enua ki roto i te au pa enua e manganui. E kavamani tataki tai to ratou uaorai. E putuputu teia au pa enua i te tamaki tetai i tetai. Inara ka komonoia teia au kavamani tangata ravarai e te Patireia o te Atua ra. Ka tutara ia ei kavamani anake ua ki runga ake i te enua katoa. (Daniela 2:44) Ei reira kare e tamaki akaou, kare e rave kino, e te ta ua. Ka noo kapiti te au tangata ravarai ma te au e te taokotai.—Mika 4:3, 4.

7. A te tuatau o to Iesu Tutara Anga no te Tauatini Mataiti, ka riro mai te au tangata tiratiratu kia apa kore, e ka riro te enua katoa ei parataito. Kia tae ki te openga o te tauatini mataiti ra, kua oti ia Iesu te au mea ravarai ta te Atua i pati kiaia ki rave. Ei reira aia e oronga atu ei i te Patireia ki tona Metua. (1 Korinetia 15:24) Eaa ka kore ei koe e akakite atu ki toou au oa e taau aronga akaperepere no te ka raveia e te Patireia o te Atua ra?

Copyright © 2008 Watch Tower Bible and Tract Society of Pennsylvania. All rights reserved.