Akavaitataanga ki te Atua na Roto i te Pure

1. Ko te pure e tuatuaanga akaaka ia ki te Atua. Ka tau koe kia pure putuputu ki te Atua. Na reira ka manako ngakau piri vaitata koe kiaia mei tetai oa akaperepere ra. E maata a Iehova e te ririnui, inara te akarongo maira aia ki ta tatou pure! Te pure putuputu ra ainei koe ki te Atua?—Salamo 65:2; 1 Tesalonia 5:17.

2. E tuanga te pure no ta tatou akamori. No reira, ka tau tatou kia pure anake ki te Atua, ko Iehova. I to Iesu ra tuatau i te enua nei, kua pure aia ki tona Metua, kare ki tetai ke atu ra. Ka tau tatou kia rave pera katoa. (Mataio 4:10; 6:9) Inara, ka tau ta tatou au pure ravarai kia tuatuaia na roto i te ingoa o Iesu. Te akaari ra teia e te akangateitei ra tatou i te turanga o Iesu e e akarongo to tatou i tona atinga oko.—Ioane 14:6; 1 Ioane 2:1, 2.

3. Me pure tatou ka tau tatou kia tuatua ki te Atua mei to tatou ngakau mai. Kare tatou e tau kia pure mou manako ua me kare tatau ua mei roto mai i te puka pure. (Mataio 6:7, 8) Ka rauka ia tatou te pure i tetai ua atu turanga ngateitei, i tetai ua atu taime, e i tetai ua atu ngai. Ka rongo te Atua i te pure muteki ua tei tuatuaia i roto i to tatou ngakau. (1 Samuela 1:12, 13) E meitaki i te kimi i te ngai kare e maniania kia mamao ke atu i etai atu tangata ke ra kia tuatua i ta tatou uaorai au pure.—Mareko 1:35.

4. Eaa te au tumu taau ka rauka i te pure? Tetai ua atu apinga te ka akatupu i toou oa anga ma ia katoa ra. (Philipi 4:6, 7) I te pure akara anga te akaari maira e ka tau tatou kia pure no te ingoa o Iehova e tana akakoro anga. Ka rauka katoa ia tatou i te pati no ta tatou apinga anoano ra kia orongaia mai, no ta tatou au ara kia akakoreia, e no te tauturu no te patoi i te timataanga. (Mataio 6:9-13) Kare e tau kia noinoi ta tatou pure anga. Ka tau anake tatou kia pure no te au apinga te rotai ra ma te anoano o te Atua.—1 Ioane 5:14.

5. Ka meitaki ua koe kia pure me akakeu to ngakau kia akameitaki e kia akapaapaa i te Atua ra. (1 Paraleipomeno 29:10-13) Ka tau koe kia pure me e au manamanata toou e te timataia ra toou akarongo. (Salamo 55:22; 120:1) Te tau ra kia pure i mua ake ka kai koe i taau manga. (Mataio 14:19) Te pati maira Iehova ia tatou kia “pure tukumoe kore.”—Ephesia 6:18.

6. Ka tau tikai tatou kia pure me kua rave tatou i tetai ara kino. I taua au taime ra ka tau tatou kia pati akatenga no to Iehova aroa ua e te akakore anga ara. Me ka aaki tatou i ta tatou au ara kiaia e ka rave ei i te meitaki e rauka ia tatou kia kore e rave akaou i te tarevake, “kua tika i [te Atua] i te aka kore mai i te ara.”—Salamo 86:5; Maseli 28:13.

7. Te akarongo anake ra Iehova i te pure a te aronga tuatua tika. No taau pure kia akarongoia mai e te Atua ra, ka tika koe kia tauta i toou meitaki kia noo ma tana au ture. (Maseli 15:29; 28:9) E mea tau kia taakaaka koe ia koe e pure ra. (Luka 18:9-14) Ka anoanoia koe kia tauta i taau e pure ra. Na reira ka akapapu koe e e akarongo toou e te manako tika ra koe i taau i tuatua ana. Ei reira anake ka pau a Iehova i taau au pure.—Ebera 11:6.

Copyright © 2008 Watch Tower Bible and Tract Society of Pennsylvania. All rights reserved.