So i e Devleskiri namera e Phuvjaja?

1. O Jehova kergja e manušenge i Phuv te dživdinen večno ki late. Ov manglja ki Phuv te dživdinen sekogaš pravedna, bahtale manuša (Psalmi 115:16; Isaija 45:18). I Phuv nae te ovel nikjed uništimi; oj ka ačhol večno (Psalmi 104:5; Propovednik 1:4).

2. Angleder te kjerel e manuše, Ov ko jek than tari Phuv kjergja raj. Odole thaneske čhivgja anav Eden. Odothe čhivgja te dživdinel o prvo manuš hem leskiri romni, o Adam hem i Eva. E Devle sinele namera te ovelen čhave thaj te phergjol celo Phuv manušencar. Hari pohari ola valjani sine te kjeren celo Phuv te ovel raj (1. Mojseeva 1:28; 2:8, 15).

O raj so našavdilo

3. O Adam hem i Eva namerno grešingje agjaar so našungje e Devleskoro lafi. Bašo odova o Jehova paldingjalen taro Eden. O raj tari Phuv, od tegani našavdilo (1. Mojseeva 3:1-6, 23). Ama o Jehova na bistergja pli namera e Phuvjaja. Ov dela lafi kaj ka kjerela palem raj, kote so šaj o manuša te dživdinen večno. Sar ka kjerel odova? (Psalmi 37:29).

4. Angleder i Phuv te ovel palem raj, o bilačhe manuša ka valjani te oven uništime (Psalmi 37:38). Odova ka ovel ko Armagedon, o Baro Dive e Jehovaskoro, ko kova so ka cidel sa o bilačhipe tari Phuv. Palo odova, o Beng ka ovel cidimo tari Phuv bašo 1.000 berša. Odova značinela, kaj nae te ačhon o bilačhe manuša te uništinen i Phuv. Ka ačhol samo e Devleskoro narodo (Otkrovenie 16:14, 16; 20:1-3).

5. O Isus Hrist ka thagarel 1.000 berša sar thagar upri Phuv (Otkrovenie 20:6). Hari pohari, ka cidel amendar o grevo hem pobuter nae te mislina hem te kjera o bilačhe bukja. Ka ova manuša bizo greške sar so sine o Adam hem i Eva angleder te grešinen. Tegani nae te ovel nasvalipe, phuripe hem meribe. O nasvale manuša ka oven saste hem o phure palem ka oven terne (Jov 33:25; Isaija 33:24; Otkrovenie 21:3, 4).

6. Ko vakti kjeda o Isus ka thagarel 1.000 berša, o manuša so i verna e Devleske ka kjeren celi Phuv te ovel raj (Luka 23:43). Isto agjaar, milionja so mule, ka oven vazdime te dživdinen palem sar manuša ki Phuv (Dela 24:15). Te kjergje odova so o Devel rodela lendar, ka ačhon te dživdinen večno ki Phuv. A ako na kjergje, ka oven uništime (Jovan 5:28, 29; Otkrovenie 20:11-15).

7. E Devleskiri prvo namera e Phuvjaja, palem ka ovel. Mangjeja li tu te uživine ko šukar bukja so ka aven poodorig? Te i agjaar, valjani i poodorig te sikljove bašo Jehova hem te kjere odova so Ov rodela. Ko odova ka pomožineltu ako redovno džaja ko sostanokija kote so kjedenape e Jehovaskere svedokija, ki Thagaripaskiri Sala (Isaija 11:9; Evreite 10:24, 25).

Palo Armagedon, i Phuv ka ovel raj

Copyright © 2009 Watch Tower Bible and Tract Society of Pennsylvania. All rights reserved.