Mga Buhat nga Kinangangalasan han Dios

1. An mga surugoon han Dios nahigugma ha maopay. Kondi kinahanglan hibaroan liwat nira an kangalas ha maraot. (Salmo 97:10) Nangangahulogan ito nga ginlilikyan an mga buhat nga kinangangalasan han Dios. Ano an pipira hito nga mga buhat?

2. Pakighilawas: An sekso antes han kasal, pag-adulteryo, bestialidad, insesto, ngan homoseksuwalidad ngatanan seryoso nga mga sala ha Dios. (Lebitiko 18:6; Roma 1:26, 27; 1 Korinto 6:9, 10) Kon an magpadis diri kasal kondi nagtatampo, sadang magbulag hira o legal nga magpakasal.—Hebreo 13:4.

Kinangangalasan han Dios an paghubog, pangawat, paghuygo, ngan mga buhat nga madarahog

3. Pagbuwa, Paghuygo, Pangawat: Hi Jehova nga Dios diri makakagbuwa. (Tito 1:2) An mga tawo nga karuyag han iya pag-uyon kinahanglan maglikay ha pagbuwa. (Proberbios 6:16-19; Kolosas 3:9, 10) An tagsa nga porma han paghuygo nahuhugawan han kahakog. Salit an mga Kristiano diri nakikigbahin ha bisan ano nga klase han paghuygo, sugad han mga loterya, karera ha kabayo, ngan bingo. (Efeso 5:3-5) Ngan an mga Kristiano diri nangangawat. Diri hira napalit hin mga butang nga maaram hira nga kinawat o kinukuha an mga butang nga waray permiso.—Eksodo 20:15; Efeso 4:28.

4. Daku nga Kasina, Kamadarahog: An diri-mapugngan nga kasina mahimo magtugway ha mga buhat han kamadarahog. (Genesis 4:5-8) An madarahog nga tawo diri mahihimo nga magin sangkay han Dios. (Salmo 11:5; Proberbios 22:24, 25) Sayop an pagpanimalos o pagbulos hin maraot ha maraot nga mga butang nga bangin buhaton han iba ha aton.—Proberbios 24:29; Roma 12:17-21.

5. Mahiko nga mga Orasyon ngan Espiritismo: An pipira nga mga tawo nagtatawag ha gahum han mga espiritu ha pangalimbasog nga matambal an mga sakit. An iba naghihimo hin mga orasyon ha ira mga kaaway basi hira magkasakit o patayon pa ngani hira. An gahum ha luyo hini ngatanan nga mga buhat amo hi Satanas. Salit an mga Kristiano kinahanglan diri makigbahin ha bisan ano hito. (Deuteronomio 18:9-13) An pagpabilin nga duok kan Jehova amo an gimaopayi nga panalipod tikang ha mga orasyon nga bangin himoon ha aton han iba.—Proberbios 18:10.

6. Paghubog: Diri sayop an pag-inom hin gutiay nga alaksiw, serbesa, o iba nga mga irinmon nga may alkohol. (Salmo 104:15; 1 Timoteo 5:23) Kondi an sobra nga pag-inom o paghubog amo an sayop ha mga mata han Dios. (1 Korinto 5:11-13; 1 Timoteo 3:8) An pag-inom hin sobra makakadaot ha imo kahimsog ngan makakasamok ha imo pamilya. Makakahimo liwat ito ha imo nga madagmit sumunod ha iba nga mga pagsulay.—Proberbios 23:20, 21, 29-35.

7. An mga tawo nga nagbubuhat han mga butang nga ginsisiring han Dios nga maraot “diri makakapanunod ha ginhadian han Dios.” (Galasia 5:19-21) Kon tinuod nga nahigugma ka ha Dios ngan karuyag lipayon hiya, mahimo ka makapalagiw tikang hini nga mga buhat. (1 Juan 5:3) Hibaroi an kangalas ha ginsisiring han Dios nga maraot. (Roma 12:9) Makig-upod ha mga tawo nga mayada diosnon nga mga pangawi. (Proberbios 13:20) An hamtong Kristiano nga mga kaupod mahimo magin usa ka surok han bulig. (Jakobo 5:14) Labaw ha ngatanan, sarig ha bulig han Dios pinaagi han pag-ampo.—Filipos 4:6, 7, 13.

Copyright © 2012 Watch Tower Bible and Tract Society of Pennsylvania. All rights reserved.