Mga Toloohan Ngan mga Kustomre nga Nagpapasubo ha Dios

An Dios diri Trinidad

1. Diri an ngatanan nga mga toloohan ngan mga kustomre maraot. Kondi diri inuuyonan ito han Dios kon nagtikang ito ha buwa nga relihiyon o nakontra ha mga katutdoan han Biblia.—Mateo 15:6.

2. Trinidad: Usa ka Trinidad ba hi Jehova—tulo nga persona ha usa nga Dios? Diri! Hi Jehova, an Amay, “an amola matuod nga Dios.” (Juan 17:3; Markos 12:29) Hi Jesus an Iya suhag nga Anak, ngan nagpapasakop hiya ha Dios. (1 Korinto 11:3) An Amay durudaku kay ha Anak. (Juan 14:28) An baraan nga espiritu diri usa nga persona; amo ito an aktibo nga puwersa han Dios.—Genesis 1:2; Buhat 2:18.

An Pasko ngan Easter nagtikang ha kadaan buwa nga mga relihiyon

Waray hinungdan nga singbahon an mga patay o mahadlok ha ira

3. Pasko ngan Easter: Hi Jesus waray matawo ha Disyembre 25. Natawo hiya han mga Oktubre 1, ha panahon han tuig han an mga magbarantay han mga karnero nagbabantay ha ira mga panon ha gawas ha gab-i. (Lukas 2:8-12) Hi Jesus waray gud magsugo ha mga Kristiano nga isaurog an iya katawo. Lugod, iya ginsumatan an iya mga disipulo nga isaurog, o hinumduman, an iya kamatayon. (Lukas 22:19, 20) An Pasko ngan an mga kustomre hito nagtikang ha kadaan buwa nga mga relihiyon. Pariho man han Easter nga mga kustomre, sugad han paggamit hin mga bunay ngan mga koneho. An siyahan nga mga Kristiano waray magsaurog han Pasko o Easter, sugad man an totoo nga mga Kristiano yana nga adlaw.

4. Mga Adlaw nga Natawhan: An duha la nga mga pagsaurog han adlaw nga natawhan nga gin-unabi ha Biblia amo an ginhimo han mga tawo nga waray magsingba kan Jehova. (Genesis 40:20-22; Markos 6:21, 22, 24-27) An siyahan nga mga Kristiano waray magsaurog han mga adlaw nga natawhan. An kustomre nga pagsaurog han mga adlaw nga natawhan nagtikang ha kadaan buwa nga mga relihiyon. An totoo nga mga Kristiano naghahatag hin mga regalo ngan mayada malipayon nga mga panahon nga tarampo ha iba nga mga panahon durante han tuig.

5. Kahadlok ha Patay: An patay diri makakahimo hin bisan ano o makakaabat hin bisan ano. Diri kita makakabulig ha ira, ngan diri hira makakadaot ha aton. (Salmo 146:4; Eklesiastes 9:5, 10) An kalag namamatay; diri ito nabubuhi katapos han kamatayon. (Esekiel 18:4) Kondi usahay an magraot nga mga anghel, tinatawag nga mga demonyo, nagpakunokuno nga amo an mga espiritu han mga patay. Sayop an bisan ano nga mga kustomre nga may kalabutan ha kahadlok o pagsingba ha patay.—Isaias 8:19.

6. Krus: Hi Jesus waray mamatay ha krus. Namatay hiya ha usa nga poste, o kahoy. An Griego nga pulong nga iginhubad nga “krus” ha damu nga mga Biblia nangangahulogan hin usa nga kahoy. An simbolo han krus nagtikang ha kadaan buwa nga mga relihiyon. An krus waray gamita o singbaha han siyahan nga mga Kristiano. Salit, naghuhunahuna ka ba nga magigin husto an paggamit hin krus ha pagsingba?—Deuteronomio 7:26; 1 Korinto 10:14.

7. Bangin makuri hinduro an pagbaya ha pipira hini nga mga toloohan ngan mga kustomre. An mga paryente ngan kasangkayan bangin mangalimbasog ha pagkombinse ha imo nga diri bag-ohon an imo mga toloohan. Kondi an pagpalipay ha Dios an mas importante kay ha pagpalipay ha mga tawo.—Proberbios 29:25; Mateo 10:36, 37.

Copyright © 2012 Watch Tower Bible and Tract Society of Pennsylvania. All rights reserved.