Lekel zot bann Temwen Zeova? Ki zot Krwayans?

Ki zot krwar?

TEMWEN ZEOVA i krwar dan Bondye Tou pwisan, Zeova, Kreater lesyel ek later. Legzistans sa bann kreasyon merveye otour nou i endik klerman ki en Kreater pwisan e vreman entelizan in fer tousala. Zis parey travay en dimoun i reflekte son kalite, i osi parey avek Zeova. Labib i dir nou ki “son bann kalite envizib . . . in ganny revele par bann keksoz ki in fer.” Osi, san lavwa oubyen parol, “lesyel pe anons laglwar Bondye.”—Romen 1:20; Psonm 19:1-4.

LATER . . . travay Zeova . . . okipe par zonm . . . pou toultan annan dimoun lo la

Dimoun pa fer bann po, televizyon ek konpiter san okenn rezon. Plannet later avek bann plant ek zannimo ki lo la i bokou pli merveye. Lekor imen avek son plizyer bilyon selil i en keksoz ki nou pa kapab zanmen fini konpran. Menm sa laservel ki nou servi pour reflesir i telman merveye! Si zonm i annan en rezon pour fer sa bann keksoz ki mwen enportan ki sa ki Zeova in fer, sirman Zeova ti annan en plan ler i ti kree son kreasyon merveye! Proverb 16:4 i dir ki: “Zeova in fer tou keksoz pour son plan.”

Zeova ti fer later avek en bi, e i ti revel son plan avek sa de premye imen: “Fer zanfan e vin bokou, ranpli later . . . , annan kontrol lo bann pwason dan lanmer ek bann kreatir ki anvole dan lesyel ek tou kreatir vivan ki pe marse lo later.” (Zenez 1:28) Vi ki zot ti dezobei, sa koup pa ti arive ranpli later avek bann dimoun drwat ki ti pou byen pran swen avek later ek son bann plant ek zannimo. Me zot dezobeisans pa’n fer plan Zeova tonm dan delo. Plizyer milye lannen plitar, sa parol ti ganny ekrir: “Bondye, sa enn ki’n form later . . . , pa’n kree li pour nanryen ditou.” I’n “fer li pour dimoun reste lo la.” Later pa pou ganny detrir, me “later i dir pour touzour.” (Izai 45:18; Eklezyast 1:4, The New English Bible) Plan Zeova pour later pou ganny akonpli: “Mon konsey pou realize, e tou sa ki fer mwan plezir, mon pou fer.”—Izai 46:10.

Alor, bann Temwen Zeova i krwar ki later pou reste la pour touzour e en zour tou dimoun ki viv an armoni avek plan Zeova pour later pou viv lo la pour leternite. Tou imen in erit lenperfeksyon avek Adan ek Ev e alor nou tou nou bann peser. (Romen 5:12) Labib i dir nou: “Rekonpans pour pese i lanmor.” “Bann vivan i konnen ki zot pou mor, me bann mor, zot pa konn nanryen ditou.” “Sa nanm ki pe fer pese, li menm li ki pou mor.” (Romen 6:23; Eklezyast 9:5; Ezekyel 18: 4, 20) Me ki mannyer zot pou kapab viv ankor pour benefisye avek sa bann benediksyon lo later? I selman atraver sakrifis Kris Zezi, akoz i ti dir: “Mwanmenm, larezireksyon ek lavi, sa ki krwar dan mwan, menm si i a’n mor, i pou viv.” “Tou bann mor ki dan tonbo pou tann son lavwa e zot pou sorti.”—Zan 5:28, 29; 11:25; Matye 20:28.

Ki mannyer sa pou arive? Tousala i ganny eksplike dan sa “Bonn Nouvel konsernan Rwayonm Bondye,” ki Zezi ti konmans anonse ler i ti lo later. (Matye 4:17-23) Me ozordi bann Temwen Zeova pe anons sa bon nouvel dan en fason tre spesyal.

KI TEMWEN ZEOVA I KRWAR?

Krwayans	Rezon baze lo Labib
Labib i Parol Bondye e i laverite	2 Tim. 3:16, 17; 2 Pyer 1:20, 21; Zan 17:17
Nou kapab annan plis konfyans dan Labib ki dan tradisyon zonm	Mat. 15:3; Kol. 2:8
Bondye i apel Zeova	Ps. 83:18; Iza. 26:4; 42:8, AS; Egz. 6:3
Kris i Garson Bondye e Bondye i pli gran ki li	Mat. 3:17; Zan 8:42; 14:28; 20:17; 1 Kor.11:3; 15:28
Kris i premye kreasyon Bondye	Kol. 1:15; Rev. 3:14
Kris ti mor lo en poto, pa lo en lakrwa	Gal. 3:13; Akt 5:30, NW
Zezi Kri ti donn son lavi konman en pri pour imen obeisan	Mat. 20:28; 1 Tim. 2:5, 6; 1 Pyer 2:24
Sakrifis ki Kris ti ofer i sifi	Rom. 6:10; Ebre 9:25-28
Kris ti ganny leve parmi bann mor konman en lespri imortel	1 Pyer 3:18; Rom. 6:9; Rev. 1:17, 18
Kris i prezan konman en lespri	Zan 14:19; Mat. 24:3; 2 Kor. 5:16; Ps. 110:1, 2
Nou dan ‘letan lafen’	Mat. 24:3-14; 2 Tim. 3:1-5; Lik 17:26-30
Kris dan Rwayonm Bondye pou diriz later avek ladrwatir ek lape	Iza. 9:6, 7; 11:1-5; Dan. 7:13, 14; Mat. 6:10
Rwayonm Bondye pou anmenn bann bon kondisyon lo later	Ps. 72:1-4; Rev. 7:9, 10, 13-17; 21:3, 4
Later pa pou zanmen ganny detri oubyen reste vid	Ekle. 1:4; Iza. 45:18; Ps. 78:69
Bondye pou met en lafen avek sa lemonn mesan zour lager Armagedon	Rev. 16:14, 16; Tsef. 3:8; Dan. 2:44; Iza. 34:2; 55:10, 11
Mesanste pou ganny detri pour touzour	Mat. 25:41-46; 2 Tesa. 1:6-9
Bann ki annan laprouvasyon Bondye pou ganny lavi eternel	Zan 3:16; 10:27, 28; 17:3; Mark 10:29, 30
I annan zis en sel semen ki anmenn ver lavi	Mat. 7:13, 14; Efe. 4:4, 5
Dimoun i mor akoz pese Adan	Rom. 5:12; 6:23
Nanm i aret egziste ler en dimoun i mor	Ezek. 18:4; Ekle. 9:10; Ps. 6:5; 146:4; Zan 11:11-14
Lanfer i latonm kot tou imen i ale	Zob 14:13, Dy; Rev. 20:13, 14, AV (margin)
Bann mor pou resisite	1 Kor. 15:20-22; Zan 5:28, 29; 11:25, 26
Lanmor koze par pese Adan pou fini	1 Kor. 15:26, 54; Rev. 21:4; Iza. 25:8
Selman 144,000 dimoun ki al dan lesyel e diriz avek Kris	Lik 12:32; Rev. 14:1, 3; 1 Kor. 15:40-53; Rev. 5:9, 10
Sa 144,000 i ne ankor konman bann garson spirityel Bondye	1 Pyer 1:23; Zan 3:3; Rev. 7:3, 4
Nouvo lalyans i ganny fer avek Izrael spirityel	Zer. 31:31; Ebr. 8:10-13
Kongregasyon Kris i ganny batir lo li	Efe. 2:20; Iza. 28:16; Mat. 21:42
Lapriyer i ganny adrese zis avek Zeova atraver Kris	Zan 14:6, 13, 14; 1 Tim. 2:5
Bann zidol pa devret ganny servi dan ladorasyon	Egz. 20:4, 5; Lev. 26:1; 1 Kor. 10:14; Ps.115:4-8
Grigri i devret ganny rezete	Det. 18:10-12; Gal. 5:19-21; Lev. 19:31
Satan ki kontrol sa lemonn	1 Zan 5:19; 2 Kor. 4:4; Zan 12:31
En Kretyen pa devret asosye avek lezot larelizyon	2 Kor. 6:14-17; 11:13-15; Gal. 5:9; Det. 7:1-5
En Kretyen i devret reste separe avek lemonn	Zak 4:4; 1 Zan 2:15; Zan 15:19; 17:16
En Kretyen i obeir lalwa imen ki pa an konfli avek lalwa Bondye	Mat. 22:20, 21; 1 Pyer 2:12; 4:15
Met disan dan lekor ki swa par labous oubyen dan lavenn i kont lalwa Bondye	Zen. 9:3, 4; Lev. 17:14; Akt 15:28, 29
Bezwen obeir lalwa Labib konsernan moralite	1 Kor. 6:9, 10; Ebr. 13:4; 1 Tim. 3:2; Prov. 5:1-23
Lalwa Saba ti ganny donnen zis avek Izrael e i ti ganny aboli ansanm avek lezot Lalwa Moiz	Det. 5:15; Egz. 31:13; Rom. 10:4; Gal. 4:9, 10; Kol. 2:16, 17
En group pret ek bann tit spesyal pa apropriye	Mat. 23:8-12; 20:25-27; Zob 32:21, 22
Zonm pa’n vin par evolisyon me i’n ganny kree	Iza. 45:12; Zen. 1:27; Mat. 19:4
Bezwen swiv legzanp Kris ler pe servi Bondye	1 Pyer 2:21; Ebr. 10:7; Zan 4:34; 6:38
Ganny plonze anba delo zour batenm i reprezant dedikasyon	Mark 1:9, 10; Zan 3:23; Akt 19:4, 5
Bann Kretyen i pres piblikman laverite dan Labib	Rom. 10:10; Ebr. 13:15; Iza. 43:10-12

Lannen pibliye : 2006
Copyright © 2007 Watch Tower Bible and Tract Society of Pennsylvania. All rights reserved.