Lipaki za Jehova—Ki Batu Ba Ba Cwañi? Ba Lumelañi?

Ba mi isa pilu

Ki Batu Ba Ba Cwañi?

LIPAKI ZA JEHOVA ba lakaza kuli mu zibane hande ni bona. Mwendi se mu ba zibile ka ku ba be mu yahile ni bona ni be mu beleka ni bona kamba mwendi ka ku kopana ni bona mwa litaba ze ñwi za ka zazi ni zazi. Mwendi se mu ba boni mwa likululu ba nze ba fa limagazini za bona ku ba ba fita mwa nzila. Kamba mwendi se mu ambozi ni bona ka bukuswani fa ndu ya mina.

Taba kikuli, Lipaki za Jehova ba isa pilu ku mina ni kwa buiketo bwa mina. Ba bata ku ba balikani ba mina ni ku mi bulelela ze ñata ka za bona, litumelo za bona, kopano ya bona, ni mo ba ikutwela ka za batu ni lifasi mo lu pila kaufel’a luna. Kuli ba pete zeo, ba mi lukiselize yona bukanyana ye.

Mwa buñata bwa lika Lipaki za Jehova ba swana sina mañi ni mañi. Ba na ni butata bo ba na ni bona batu kaufela, ili bwa za mali, kwa mubili, ni mwa maikuto. Ba fosanga fokuñwi, kakuli ha ba si ka petahala, ku buyelelwa, mi ha ba na m’ata a ku sa fosa. Kono ba lika ku ituta ku ze ba ipumana ku zona mi ba ituta Bibele ka tukufalelo kuli ba eze licinceho ze tokwahala. Ba ineezi ku Mulimu kuli ba eze tato ya hae, mi ba itiisa ku eza za buineelo bo. Mwa misebezi ya bona kaufela ba bata ketelelo mwa Linzwi la Mulimu ni kwa moya wa hae o kenile.

Ku bona, ku butokwa hahulu kuli litumelo za bona li be ze tomile fa Bibele mi isiñi fa litaba za butu za ku nuhelela kamba milao ya bulapeli. Ba ikutwa sina mwa n’a ikutwezi muapositola Paulusi ha n’a bulezi ka puyelelo kuli: “Mulimu a bonahale kuli ki ya na ni niti, mi mutu kaufela a bonahale kuli ki ya na ni lishano.” (Maroma 3:4, Bibele ye Kenile, hatiso ya 1951*) Ka za lituto ze fiwa ka ku ba niti ye mwa Bibele, Lipaki ba yemela hahulu mukwa o ne ba na ni ona ba kwa Berea ha ne ba utwile muapositola Paulusi a nz’a kutaza: “Ba amuhela Linzwi ka ku li tukufalelwa, mi ba batisisa mwa Mañolo, ka mazazi kaufela, ba lemuhe litaba ze ba bulelelwa kana ki mo li inezi.” (Likezo 17:11) Lipaki za Jehova ba lumela kuli lituto kaufela za bulapeli li swanela ku likiwa cwalo ku bona haiba za lumelelana ni Mañolo a’ buyelezwi, ibe kuli tuto yeo i fiwa ki bona kamba ki mutu yo muñwi. Ba mi mema, ee, ba mi susueza ku eza cwalo ha mu buhisana ni bona.

Taba yeo i bonisa kuli Lipaki za Jehova ba lumela kuli Bibele ki Linzwi la Mulimu. B’a nga libuka za yona ze 66 kuli li tahile ka moya mi litaba za yona li nepahezi. Kalulo ye biziwa hañata kuli ki Testamente Ye Nca bona ba i biza kuli ki Mañolo a Sigerike a Sikreste, mi Testamente Ya Kale ba i biza kuli ki Mañolo a Siheberu. Ba sepile sibeli sa likalulo zeo, ili Mañolo a Sigerike hamoho ni a Siheberu, mi ba a’ nga ka mw’a inezi luli konji haiba lipulelo kamba litaba ze bulelwa li bonisa hande-nde kuli mañolo ao ki mitala kamba lisupo. Ba utwisisa kuli buñata bwa bupolofita bwa Bibele se bu talelelizwe, bo buñwi bu sweli bwa talelezwa, ni kuli bo buñwi bu sa libelezi ku talelezwa.

LIBIZO LA BONA

Ki Lipaki za Jehova? Ee, ki mona mo ba ipizeza. Ki libizo le li na ni taluso leo, le li bonisa kuli ba paka za Jehova, Bumulimu bwa hae, ni milelo ya hae. “Mulimu,” “Mulena,” ni “Mubupi” ki malumbatina mi a kona ku itusiswa kwa batu ba sikai, sina mw’a itusisezwa a “Prezidenti,” “Muñali,” ni “Muzamaisi.” Kono “Jehova” ki libizo la ka butu mi ki la Mulimu ya m’ata ote ili Mubupi wa pupo kamukana. Taba yeo i bonisizwe kwa Samu 83:18, ye bulela cwana ka ku ya ka toloko ya Bibele ya King James: “Kuli batu ba zibe kuli wena, u nosi wa libizo la JEHOVA, ki wena ya pahami ka ku fitisisa fahalimu a lifasi kaufela.”

Libizo la ka butu la Mulimu mwa Siheberu sa kwaikale

Libizo leo, ona Jehova (kamba Yahweh, le i itusisa toloko ya Jerusalem Bible ya ba Roma Katolika ni bocaziba ba bañwi) li fumaneha ibat’o ba h’a 7,000 mwa Mañolo a Siheberu a kwa makalelo. Buñata bwa Libibele ha li bonisi libizo leo cwalo kono li yolisize teñi “Mulimu” kamba “Mulena.” Niteñi, nihaiba mwa Libibele zeo, mutu hañata wa kona ku lemuha k’o litaba za Siheberu za kwa makalelo li itusisa Jehova, kakuli mwa mañolo ao manzwi a’ yolisizwe a ñozwi mwa litaku ze tuna, inge cwana: MULIMU, MULENA. Litoloko li sikai za miteñi ye li itusisize libizo la Jehova kamba libizo la Yahweh. Kacwalo, New World Translation i bulela cwana kwa Isaya 42:8, “Ki na Jehova. Leo ki lona libizo la ka.”

Taba ya mwa Mañolo fo ba zwisize libizo la bona Lipaki za Jehova i mwa kauhanyo 43 ya Isaya. Mwateñi, lifasi li bonwa sina mo ku belanga mwa kuta: Milimu ya macaba i memiwa kuli i tahise lipaki za yona ilikuli li pakele mizeko ya yona ya kuli i lukile kamba ku t’o utwa lipaki ze yemela Jehova ni ku lumela niti. Teñi k’o, Jehova u zibisa batu ba hae kuli: “Ki mina lipaki za ka, ku bulela Jehova, ni mutang’a ka ye ni ketile; kuli mu ni zibe ni ku ni lumela, ni ku utwisisa kuli ki na: ha ku na Mulimu u sili ya n’a ezizwe pili kwand’a ka, mi ha ku na ku ba ni yo mukana mwamulaho wa ka. Na, Na luli, ki na Jehova; mi ha ku na mupilisi u sili kwand’a ka.”—Isaya 43:10, 11, toloko ya American Standard Version.

Jehova Mulimu n’a na ni lipaki fa lifasi-mubu mwa lilimo ze likiti-kiti ze ne fitile pili Jesu a si ka pepwa kale. Maheberu kauhanyo 11 ha se i bulezi ba bañwi ba bona balumeli bao, Maheberu 12:1 i li: “Cwalehe, ha lu bona kuli lu beilwe mwahali ki lilu le lituna la lipaki, lu tuhele kaufela ze lu imela, ni sibi se si lu hanelela fakaufi; mi lu zamaye inze lu mata ka ku itiisa mwa siyano ye lukiselizwe luna.” Jesu n’a bulezi fapil’a Ponse Pilato kuli: “Ki sona se ni pepezwi, ni se ni tezi mwa lifasi: kuli ni t’o paka niti.” Jesu u bizwa kuli “paki ye sepahala, ya niti.” (Joani 18:37; Sinulo 3:14) Jesu n’a taluselize balutiwa ba hae kuli: “Mu ka amuhela mata, Moya o Kenile ha u ka ta ku mina; mi mu ka ba lipaki za ka mwa Jerusalema, ni mwa naha kaufela ya Judea ni ya Samaria, ni ku isa kwa mafelelezo a lifasi.”—Likezo 1:8.

Kabakaleo, batu ba ba bat’o eza 6,000,000 kacenu ba ba shaela taba ye nde ya Mubuso wa Jehova ka Kreste Jesu mwa linaha ze fitelela 230 ba ikutwa kuli ba swanela ku ipiza kuli Lipaki za Jehova.

Lipaki ba ba bat’o eza 6,000,000 mwa linaha ze fitelela 230

* Mañolo a Bibele mwa broshuwa ye a zwa mwa toloko ye, konji haiba ku bonisizwe Bibele i sili.