Lipaki za Jehova—Ki Batu Ba Ba Cwañi? Ba Lumelañi?

Ba Lumelañi?

LIPAKI ZA JEHOVA ba lumela ku Mulimu ya M’ata Ote, Jehova, yena Mubupi wa mahalimu ni lifasi-mubu. Kona ku ba teñi kwa lika ze makaza za mubupehelo o zinga mwa pupo ye lu bona, ku bonisa hande kuli lika zeo kaufela li tahisizwe ki Mubupi ya butali ka ku fitisisa ili ya m’ata hahulu. Sina ze ba pangile banna ni basali ha li bonisa mo ba inezi, ni z’a ezize Jehova Mulimu za bonisa mw’a inezi. Bibele i lu bulelela kuli “za Mulimu ze sa bonwi, . . . ki ze bonahala hande haisamba lifasi li ezwa, inze li lemuhiwa mwa misebezi ya hae.” Hape, ku si na linzwi, “mahalimu a bulela kanya ya Mulimu.”—Maroma 1:20; Samu 19:1-4.

LIFASI-MUBU . . . li bupilwe ki Jehova . . . li babalelwa ki batu . . . li ka yahiwa ku ya ku ile

Batu ha ba bupangi lipiza kamba ku panga litelevishini ni likompyuta ku si na mulelo. Lifasi-mubu ni ze bupilwe ze ku lona, ili limela ni lifolofolo, za makaza hahulu ku fita zeo. Ha lu koni ku utwisisa mubupehelo wa mubili wa mutu ni liselusi za ona ze bolule ba bolule. Mane nihaiba booko bo lu nahana ka bona bu makaza hahulu mi ha lu koni ku bu utwisisa! Haiba batu ku na ni ze ba lela ha ba panga-panga lika ze nyinyani hahulu ha li bapanywa ni zeo, kaniti Jehova Mulimu n’a na ni za n’a lelezi lika ze mbwetukisa z’a bupile! Liproverbia 16:4 i bulela kuli ku cwalo, i li: “[Muñ’a] Bupilo u ezize linto kamukana ka libaka la zona.”

Jehova n’a na ni za n’a lelezi lifasi-mubu ha n’a li bupile, ka mw’a n’a taluselize bosinyalana ba pili kuli: “Mu tahise lusika, mu ate, mu tale mwa lifasi, . . . mu buse litapi za mwa liwate, ni ze fufa mwa mbyumbyulu kaufela, ni ze pila kaufela, ni ze zamaya ka mba fafasi.” (Genese 1:28) Bakeñisa kuli ne ba til’o ipangula, bona bosinyalana bao ne ba si ka kona ku taza lifasi ka mabasi a’ lukile a n’a ka babalela hande lifasi-mubu ni limela ni lifolofolo ze ku lona. Kono bupalelwi bwa bona ha bu talusi kuli mulelo wa Jehova u palezwi. Lilimo ze likiti-kiti ku zwa f’o, ne ku ñozwi kuli: “Mulimu ya bupile lifasi . . . , [ha] si ka li bupa fela.” U li bupile “ilikuli li yahiwe.” Ha li na ku sinyiwa, kono “lifasi ki la kamita.” (Isaya 45:18; Muekelesia 1:4) Zeo Jehova a bupezi lifasi-mubu li ka petahala: “Mulelo wa ka u ka tiya, ni ka eza se ni lata kaufela.”—Isaya 46:10.

Kabakaleo, Lipaki za Jehova ba lumela kuli lifasi-mubu li ka ina ku ya ku ile ni kuli batu kaufela ba ka kona ku pila fateñi ku ya ku ile, ili ba ba pila ni ba ba shwile, ba ba ka lumelelana ni mulelo wa Jehova wa kuli lifasi-mubu li buhehe, mi li yahiwe. Batu kaufela ba hozize ku sa petahala ku Adama ni Eva mi, kabakaleo, ki baezalibi. (Maroma 5:12) Bibele i lu taluseza kuli: “Mupuzo wa sibi ki lifu.” “Ba ba pila ba ziba kuli ba ka shwa; kono ba ba shwile ha ba na se ba ziba.” “[Moyo, NW] o eza sibi, ki ona o ka shwa.” (Maroma 6:23; Muekelesia 9:5; Ezekiele 18:4, 20) Cwale ba kona ku pila hape kamukwaufi ilikuli ni bona ba fumane kwa limbuyoti ze ka fiwa batu fa lifasi? Ki ka sitabelo fela sa tiululo sa Kreste Jesu, kakuli n’a bulezi kuli: “Ki na zuho ni bupilo; ya lumela ku na, nih’a shwile u ka pila.” “Ba ba li mwa mabita kaufela, ba ka utwa linzwi la hae, mi ba zwe.”—Joani 5:28, 29; 11:25; Mateu 20:28.

Nto yeo i ka ezahala cwañi? I talusizwe mwa “Evangeli ya mubuso,” yeo Jesu n’a kalisize ku i zibahaza ha n’a sa li fa lifasi-mubu. (Mateu 4:17-23) Kono kacenu Lipaki za Jehova ba kutaza taba ye nde ka nzila ye ipitezi hahulu.

ZE BA LUMELA LIPAKI ZA JEHOVA