Lipaki za Jehova—Ki Batu Ba Ba Cwañi? Ba Lumelañi?

Taba Ye Nde Ye Ba Bata Kuli Mu I Utwe

JESU ha n’a li fa lifasi-mubu, balutiwa ba hae ne ba tile ku yena ku t’o mu buza kuli: “Ki sifi se si ka ba sisupo sa ku ba teñi kwa hao ni sa ku fela kwa muinelo wa linto?” (New World Translation) N’a alabile kuli ne ku ka ba ni lindwa mwahal’a macaba a mañata, lukupwe, matuku a yambukela, lizikinyeho za lifasi, kekezeho ya kutokwa mulao, baluti ba bulapeli ba buhata ba ba yembulula ba bañata, ku toiwa ni ku nyandiswa kwa balateleli ba hae ba niti, ni kuli lilato la ba bañata la ku lata ku luka ne li ka fola. Lika zeo ha ne li ka kalisa ku ezahala, ne li ka bonisa kuli Kreste s’a li teñi a sa bonahali ni kuli Mubuso wa kwa lihalimu n’o li fakaufi. Yeo neikaba taba ye nde luli! Kacwalo Jesu a ekeza manzwi a, a’ li kalulo ya sisupo seo: “Evangeli ye ya mubuso i ka bulelwa mwa lifasi kaufela, ibe bupaki mwa macaba kamukana; kihona ku ka taha mafelelezo.”—Mateu 24:3-14.

Lika ze sa z’o ezahala mwa lifasi ki ze maswe ka ili zona, kono ze li yemela ki ze nde. Ze li yemela zeo ki ku ba teñi kwa Kreste. Lika ze bulezwi fahalimu ne li kalile ku bonahala mwa silimo se si zibahalizwe hahulu sani sa 1914! Ne si bile ona mafelelezo a Linako za Bamacaba ni makalelo a linako za cinceho ya ku zwa mwa puso ya batu ku ya kwa Puso ya Kreste ya Lilimo Ze Sikiti.

Taba ya kuli ne ku ka ba ni nako ya cinceho yeo i bonisizwe kwa Samu 110, litimana 1 ni 2, ni Sinulo 12:7-12. Teñi k’o ku bonisizwe kuli Kreste n’a ka ina kwa lizoho la bulyo la Mulimu mwa lihalimu ku fitela nako ya n’a ka ba Mulena. Mi cwale ndwa ya mwa lihalimu ne i ka tumbuka ye ne i ka tisa kuli Satani a lundulelwe fa lifasi, ili ku tisa butata fa lifasi, mi Kreste n’a ka busa mwahal’a lila za hae. Mafelelezo a bumaswe kaufela n’a ka taha ka ‘ñalelwa ye tuna,’ ye ne ka fita fa kaungu-ungu ka ndwa ya Harmagedoni ni ku latelelwa ki Puso ya Kreste ya Lilimo Ze Sikiti, ya kozo.—Mateu 24:21, 33, 34; Sinulo 16:14-16.

Bibele i li: “Hape u zibe kuli, mwa mazazi a maungulelo, ku ka taha linako ze tata. Kakuli batu ba ka ba baitati, ba ba lata mali, ba ba itumbaeta ni ku ikuhumusa; ikaba banyefuli, ba ba sa utwi bashemi ba bona, ba ba si na buitumelo, ba ba hana za Mulimu; ikaba batu ba ba si na lilato la taho, ba ba na ni ñole, ba ba seba batu ka buhata, ba ba sa koni ku iswala, ba ba na ni buhali, ba ba toya batu ba bande; ikaba lishembi ni matanya, ni ba ba inuneka, ni ba ba lata minyaka, isi Mulimu; ikaba batu ba ba eza mukwa wa bulumeli, kono se si eza mata a bulumeli ba si latuzi. U sabe kwa batu ba ba cwalo.”—2 Timotea 3:1-5.

Ba bañwi mwendi ba ka kanana kuli lika zeo li kile za ezahala ni kwamulaho, kono niti fela kikuli ne li si ka ezahala ka mo li ezahalela cwale. Ka mo ba taluseza baituti ba litaba ze ezahezi ni batalusi ba likezahalo, kwa li ku simwa ku sa bi ni nako fa lifasi ye swana ni ye ne bile teñi ku kala ka 1914 ku isa cwalo kwapili. (Mu bone taba ye li “Zwelopili ni Kulo ya Bona ya mwa Miteñi Ye.”) Butata se bu bile bo butuna hahulu-hulu ku fita haisali. Hape, ka za likalulo ze ñwi za sisupo sa Kreste sa za mazazi a maungulo, lisupo ze li swanela ku hupulwa: Ku zibahaza mwa lifasi kamukana za ku ba teñi kwa Kreste ni Mubuso wa hae ku bile ko kutuna hahulu ku fita nako ifi kamba ifi ya kwamulaho. Nyandiso kabakala ku kutaza ya li ku ba i likane ni ye wezi Lipaki za Jehova. Mianda-nda ya bona ne ba bulailwe mwa minganda ya tukufazo ya ba Nazi. Ku t’o fita ni la kacenu le Lipaki za Jehova ba sa kwalezwi mwa libaka ze ñwi, mi ku ze ñwi ba tamiwanga, ku lengiwa mwa tolongo, ku tukufazwa, ni ku bulaiwa. Zeo kaufela ki kalulo ya sisupo sa n’a file Jesu.

Ka mo ku bulelezwi cimo kwa Sinulo 11:18, ‘macaba a halifezi’ Lipaki za Jehova ba ba sepahala, mi taba yeo i bonisa kuli “buhali” bwa Jehova bu ka tulukela ona macaba ao. Lona liñolo le li swana leo li bulela kuli Mulimu u ka “yundisa ba ba shandaula lifasi.” Kwa li ku simwa buikoneli bwa lifasi-mubu bwa ku konahalisa bupilo bu sa bi mwa lubeta sina cwale. Nihakulicwalo, lika za shutana cwale! Ba sayansi ba bañata ba lemusize kuli haiba batu ba zwelapili ku silafaza lifasi-mubu, muta o muñwi ha ku na ku konahala ku pila teñi. Kono Jehova u li “bupile . . . ilikuli li yahiwe,” mi u ka zwisa basilafazi bao ba si ka li shandaulelela kale.—Isaya 45:18.

LIMBUYOTI ZA FA LIFASI-MUBU MWATAS’A MUBUSO

Taba ya kuli batu ba ka pila fa lifasi-mubu ba li babusiwa ba Mubuso wa Mulimu i kana ya bonahala ku ba ye komokisa ku ba bañata ba ba lumela mwa Bibele ba ba hupula kuli bote ba ba piliswa ba ya kwa lihalimu. Bibele i bonisa kuli ki ba sikai fela ba ba ya kwa lihalimu ni kuli ba ba ka pila ku ya ku ile fa lifasi-mubu ikaba buñata bo butuna bwa palo ye si na maciñekelo. (Samu 37:11, 29; Sinulo 7:9; 14:1-5) Taba ya kuli Mubuso wa Mulimu mwatas’a Kreste u ka ambeka lifasi-mubu ni ku li busa i boniswa ki bupolofita bo buñwi mwa buka ya Daniele ye mwa Bibele.

Mwateñi Mubuso wa Kreste u boniswa ku ba inge licwe le li ketuzwi kwa bubusi bwa Jehova bo bu swana sina lilundu. Licwe leo li nata ni ku lobaka siswaniso se si yemela macaba a’ m’ata a lifasi-mubu, mi “licwe le li natile fa siswaniso la fetuha lilundu le lituna, mi la tala lifasi kaufela.” Bupolofita b’o bu zwelapili kuli: “Mwa mazazi a malena ao, Mulimu wa mwa lihalimu u ka tahisa mubuso o si na ku sinyeha ku ya ku ile; mi bulena bwa ona ha bu na ku shimbulukela kwa sicaba si sili. Mubuso wo, u ka ketula ni ku feza mibuso kaufela; kono ona u ka ba teñi kamita ni ku ya ku ile.”—Daniele 2:34, 35, 44.

Netherlands

Nigeria

W’o ki ona Mubuso o ba bata ku mi taluseza za ona Lipaki za Jehova, hamoho ni sepo ye yemelwa ki Mañolo ya bupilo bo bu sa feli fa lifasi-mubu le li kenisizwe ni ku buhehiswa. Bolule-lule ba ba pila cwale ni bolule-lule ba bañata-ñata ba ba li mwa mabita a bona cwale ba ka ba ni kolo ya ku pila teñi ku ya ku ile. Cwale, mwatas’a Puso ya Kreste Jesu ya Lilimo Ze Sikiti, ku ka talelezwa mulelo wa Jehova wa kwa makalelo wa n’a bupezi lifasi-mubu ni ku beya teñi bosinyalana ba pili. Paradaisi ya fa lifasi-mubu yeo ha i na ku ba ye nyikwisa ni kamuta. Sina Adama ha n’a filwe musebezi mwa simu ya Edeni, batu ba ka ba ni misebezi ye mituna mwa ku babalela lifasi-mubu ni limela ni lifolofolo ze ku lona. “Ba ka ikola misebezi ya mazoho a bona nako ye telele.”—Isaya 65:22; Genese 2:15.

Ku kona ku fiwa mañolo a mañata a bonisa mo li ka bela lika, tapelo ya n’a lu lutile Jesu ha i ka talelezwa, ye li: “Ku tahe mubuso wa hao; Se si latwa ki Wena si ezwe mwa lifasi, mo si ezezwa kwa lihalimu.” (Mateu 6:10) Kono le, li likani ka nako ye: “Na utwa linzwi le lituna le li zwa mwa Lubona, li li: Mu bone Tabernakele ya Mulimu, i inzi ni batu; U ka yaha ni bona, ba be macaba a hae; mi Mulimu u ka ba ni bona, Yena luli, ibe Mulimu wa bona; mi u ka takula miyoko kaufela kwa meto a bona; mi lifu ha li sa na ku ba teñi; nihaiba ku tahelwa ki maswabi ni ku lila, ni ku utwa butuku; kakuli za pili li felile. Cwale Ya inzi mwa Lubona a li: A mu bone, linto kaufela ni li eza ze nca. Hape a li: Ñola; kakuli manzwi ao a sepahala, ki a niti.”—Sinulo 21:3-5.