Lipaki za Jehova—Ki Batu Ba Ba Cwañi? Ba Lumelañi?

Ka Mo Ba Hasanyeza Taba Ye Nde

Hawaii

Venezuela

Yugoslavia

BAKRESTE ba laezwi kuli ba “lute macaba kaufela,” kono f’o ha ku talusi kuli ba ka siniliketa batu kamba ku ba hapeleza ku sikuluha. Musebezi wa Jesu ne li wa kuli a “tiseze babotana litaba ze nde,” “ku tiisa ba ba lobehile lipilu,” “ku omba-omba ba ba lila kaufela.” (Mateu 28:19; Isaya 61:1, 2; Luka 4:18, 19) Lipaki za Jehova ba eza cwalo ka ku zibahaza taba ye nde ye mwa Bibele. Sina mupolofita Ezekiele wa kwakale, Lipaki za Jehova kacenu ba lika ku fumana “ba ba tonga, ni ba ba lila, kabakala bumaswe kaufela bo bu eziwa.”—Ezekiele 9:4.

Mukwa o zibahala hahulu o ba fumana ka ona ba ba ziyelizwe ki miinelo ya cwale ki ka ku ya fa ndu ni ndu. Kacwalo ba ikataza hande ku kutaza nyangela, sina mwa n’a ezelize Jesu ha n’a ile “mwa minzi ni minzinyana, a nz’a luta batu, a bulela Evangeli ya mubuso wa Mulimu.” Balutiwa ba hae ba kwa makalelo ne ba ezize nto ye swana. (Luka 8:1; 9:1-6; 10:1-9) Kacenu, fo ku konahalela kaufela, Lipaki za Jehova ba lika ku pota fa ndu ni ndu hañatanyana ka silimo, ka mulelo wa ku lika ku ambola ni beñi ba mandu ka mizuzunyana, ka za taba ya fa silalanda kamba ya mwa lifasi ye hoha mamelelo kamba ye bilaeza. Ku kana kwa fiwa liñolo li li liñwi kamba a mabeli kuli a nyakisiswe, mi haiba muñ’a ndu wa bonisa kuli wa isa pilu, Paki y’o a kana a lukisa ku t’o pota hape ka nako ye swanela kuli puhisano i zwelepili. Libibele ni lihatiso ze talusa Bibele za boniswa, mi haiba muñ’a ndu a lata, tuto ya Bibele ya mwa ndu ya zamaiswa ku si na tifo. Lituto za Bibele zeo ze tusa ze eza bolule za zamaiswanga kamita kwa batu ni mabasi mwa lifasi kaufela.

Mukwa o muñwi w’o “Evangeli ya mubuso” i bulelelwa ba bañwi ki ka mikopano ye eziwa kwa Mandu a Mubuso a fa silalanda. Lipaki ba ezanga mikopano kwateñi ka viki ni viki. Mukopano o muñwi ki ngambolo ya nyangela ye ama taba ya cwale ye hoha mamelelo, mi i latelelwa ki tuto ya taba ye ñwi ya mwa Bibele kamba bupolofita bwa yona, ka ku toma fa magazini ya Tora ya ku Libelela. Mukopano o muñwi ki sikolo se si luta Lipaki ku ziba hande mwa ku zibahaleza taba ye nde, mi si latelelwa ki kalulo ye lukiselizwe ku buhisana musebezi wa ku paka mwa kalulo ya fa silalanda. Hape, hañwi ka viki Lipaki ba kopananga mwa mandu, ka likwata ze nyinyani, ili ku ba ni lituto za Bibele.

Mutu kaufela u lukuluhile ku taha kwa mikopano yeo kaufela. Ha ku ngiwangi likoleko. Mikopano ye cwalo i tusa bote. Bibele i li: “A lu babalelane, kuli lu susumezane mwa lilato ni mwa misebezi ye minde. Lu si ke lwa tuhela liputeho za luna, mo ba ezeza ba bañwi; kono lu kutazane, sihulu ka ku bona kuli lizazi le lituna li sutelezi.” Tuto ya ka butu ni patisiso za tokwahala, kono ku kopana ni ba bañwi kwa susueza: “Sina sipi ha i shenga sipi, ni mutu u shenga cwalo lingana za yo muñwi.”—Maheberu 10:24, 25; Liproverbia 27:17, toloko ya The New English Bible.

Ha ku ba ni kolo, Lipaki ba bulelanga taba ye nde ha ba kopana ni batu ba bañwi mwahal’a lizazi. Neikana ya ba litabanyana ze ambolwa ni bomuyahwa ni bona kamba ye ba zamaya ni yena mwa mbasi kamba mwa fulai, ngambolo ye telelenyana ni mulikani kamba wahabo, kamba puhisano ni ye ba beleka ni yena ka nako ya ku ca sico sa musihali. B’o ki bona bukutazi bwa n’a ezize hahulu Jesu ha n’a li fa lifasi-mubu—ha n’a zamayanga fa likamba la liwate, ku ina kwa mukulo wa lilundu, ku lalela sico mwa ndu ya mutu yo muñwi, kwa mukiti wa linyalo, kamba a nz’a li mwa mukolo wa bandui mwa Liwate la Galilea. N’a lutile batu mwa masinagoge ni kwa tempele mwa Jerusalema. Kwa n’a inzi kaufela, n’a fumana kolo ya ku bulela za Mubuso wa Mulimu. Lipaki za Jehova ba lika ka t’ata ku latelela mihato ya hae ni ku zeo.—1 Pitrosi 2:21.

KU KUTAZA KA MUTALA

Mwa bupilo bwa bona bwa mwa lubasi, hamohocwalo ni ha ba kopana ni batu ba bañwi, Lipaki ba lika ka buniti ku eza lika ze ba luta

Ha ku na ni ye mikana kwa mikwa yeo ya ku mi bulelela taba ye nde ye ne i ka mi tusa haiba ya mi bulelela yona h’a sebelisi z’a luta. Ku sa eza lika zeo mutu a luta ba bañwi ki buipi, mi buipi mwa bulapeli bu tisize kuli bolule-lule ba sinuhe Bibele. Bibeli ha i lukeli ku nyazwa. Bañoli ni Bafalisi ne ba na ni Mañolo a Siheberu, kono Jesu n’a ba nyazize patalaza kuli ki baipi. N’a bulezi za kuli ne ba bala Mulao wa Mushe, kihona a bulelela balutiwa ba hae kuli: “Mu eze ze ba mi bulelela kaufela, mi mu ye ka zona; kono mu si ke mwa ya ka likezo za bona; kakuli ku bulela ba bulela, kono ha ba ezi.” (Mateu 23:3) Nto ye kolwisa hahulu ki haiba Mukreste a ba mutala wa mupilelo o lukile ku fita ku tanda lihora-na-lihora inz’a kutaza. Taba yeo ne i taluselizwe Bakreste ba basali be ne ba na ni banna ba ba si balumeli, kuli: “Ba koliswe ki mizamao ya basali ba bona, ku si na manzwi a’ bulelwa; ha ba nze ba lemuha mizamao ya mina ye kenile.”—1 Pitrosi 3:1, 2.

Kacwalo, Lipaki za Jehova ba lika ku babaza taba ye nde ku ba bañwi ka ona mukwa wo hape: ili ku fa mutala o munde wa muzamao wa Sikreste o ba taluseza ba bañwi. Ba lika ‘ku eza ba bañwi ka mo ba latela kuli ba eziwe ki bona.’ (Mateu 7:12) Ba lika ku eza cwalo kwa batu kaufela, isiñi fela kwa Lipaki ba bañwi, balikani, be ba yahile ni bona, kamba bahabo. Bakeñisa kuli ha ba si ka petahala, haki kamita ba kwanisa lika kaufela. Kono takazo ye mwa lipilu za bona kikuli ba eze hande batu kaufela isi fela ka ku ba bulelela taba ye nde ya Mubuso kono hape ni ka ku ba tusa fo ku konahalela kaufela.—Jakobo 2:14-17.