Tuso Ye Sebeza ya Taba Ye Nde fa Silalanda sa Mina
MWA lifasi la kacenu hañata lu utwanga batu ba bulela kuli: “Likuka za Sikreste ha li na tuso. Ha li koni ku sebeza ni hanyinyani mwa nyangela ya kacenu ye t’ata.” Nihakulicwalo, ne ku bulezwi nto ye shutana ni yeo mwa ngambolo ye ne i bihilwe ya n’a bile ni yona mueteleli wa Muhindu yena Mohandas K. Gandhi ni Muñali Irwin ya n’a kile a ba Mubusisi wa India ya yemela Britain. Kutwi Muñali Irwin n’a buzize Gandhi za n’a nahana kuli ki lifi ze ne ka tatulula butata mwahal’a Great Britain ni India. Gandhi a nopa Bibele ni ku apula kauhanyo ya buketalizoho ya Mateu mi a li: “Naha ya henu ni ya ka ha li ka swalisana ka lituto za n’a lutile Kreste mwa Ngambolo ye ya fa Lilundu, lu ka be lu tatuluzi butata bwa lifasi kamukana isiñi bwa linaha za luna fela.”
Yona ngambolo yeo i bulela za ku bata za Mulimu ni ku ishuwa, ku lata kozo, ku ba ni sishemo, ku lata za ku luka. I nyaza ku nyemela maswe ba bañwi, isi fela bubulai, i nyaza mihupulo ya buhule, isi fela bubuki. I hanyeza likezo za ka bomu za telekano ze shandaula mabasi ni ku nyandisisa bana. I lu bulelela kuli: ‘Mu late nihaiba ba ba sa mi lati, mu tuse ba ba shebile, mu tuhele ku atula ba bañwi ka ku tokwa sishemo, mu eze ba bañwi mo ne mu ka latela kuli ba mi ezeze.’ Zona likelezo zeo kaufela ne li ka tusa hahulu-hulu ha ne li ka mamelwa. Ba bañata mwa silalanda sa mina ha ne ba ka itwaeza ku eza cwalo, silalanda sa mina ne si ka na si ba hande ni ku fita!
Lipaki za Jehova ba susueza hahulu zeo. Bibele i ba luta ku kuteka linyalo. Bana ba bona ba lutiwa likuka ze lukile. Butokwa bwa lubasi bwa koñomekwa. Ki tohonolo silalanda sa mina, kamba mane naha, ha i na ni mabasi a’ swalisani. Litaba za kwakale li tezi mitala ya mibuso ye mituna mwa lifasi ye ne i shandauzwi ki ku fokola kwa swalisano ya lubasi ni ku ekezeha kwa buhule. Lipaki za Jehova ha ba nze ba tusa batu ni mabasi a mañata ku pila ka likuka za Sikreste, buipanguli, buhule, ni bukebenga li ka be li fukuzehile mwa silalanda sa mina.
| Ba mishobo ni mibala kaufela ba sebeza hamoho
|
Bo buñwi bwa butata bo bu unjami lilalanda ni linaha ze ñwi ki saluluti sa mubala. Ka ku fapana, muapositola Pitrosi n’a ize: “Ni lemuha kuli Mulimu h’a yi ka ku keta batu; kono mwa sicaba ni sicaba, ya mu saba mi a eza se si lukile, u lumelelwa ki Yena.” Mi Paulusi n’a ñozi kuli: “Ha ku sa na Mujuda, nihaiba Mugerike; ha ku sa na mutanga kamba mulukuluhi; ha ku sa na munna kamba musali; kakuli kamukan’a mina mu nto i liñwi ku Jesu Kreste.” (Likezo 10:34, 35; Magalata 3:28) Lipaki za Jehova ba lumela taba yeo. Batu ba mishobo ni mibala kaufela ba pila hamoho ni ku sebeza hamoho kwa sibaka sa bona se situna sa tamaiso ya mwa lifasi, kwa mitai, ni mwa liputeho.
| Bukreste bwa tusa. Ha ku na ze ñwi ze sebelize.
|
Mwa Africa mishobo ye miñwi ha i koni ku kopana hamoho ku si na mingalato. Kono kwa mikopano ya Lipaki za Jehova teñi k’o, batu ba mishobo ye fitana-fitana ba ca, ku lobala, ni ku lapela hamoho ka swalisano ye tezi ni silikani se si lilato. Makwambuyu ba muso ba makala ha ba bona zeo. Mutala wa swalisano ye tiswa ki Bukreste bwa niti ne u bulezwi mwa mutende wa kwa New York wa Amsterdam News wa la August 2, 1958. Taba yeo ne i tisizwe ki ku bona mukopano wa mwahal’a macaba o s’o bulezwi, k’o Lipaki ba ba fitelela 250,000 ne ba putehani mwa tolopo ya New York City.
“Kai ni kai batu ba bansu, makuwa, ba kwa upa, ba mayemo kaufela mwa bupilo ili ba ba zwa mwa likalulo kaufela za lifasi, ne ba shobana-shobana ka tabo ni ka tukuluho. . . . Lipaki ba ba lapela be ne ba zwa mwa linaha ze 120 se ba pilile hamoho ni ku lapela hamoho ka kozo, ku bonisa ba mwa America mo ku bezi bunolo ku pila cwalo. . . . Mukopano w’o ki mutala sakata wa m’o batu ba konela ku sebeza hamoho ni ku pila hamoho.”
Ba bañata ba kana ba bulela kuli likuka za Bukreste ha li na tuso mwa lifasi le la cwale. Kono ki likuka lifi ze ñwi ze sebelize kamba ze ka sebeza? Likuka za Sikreste za kona ku tusa luli ha ne li ka sebeliswa mwa silalanda sa mina cwale, mi li ka ba zona mutomo wa ku swalisanisa ‘macaba, mishobo, ni masika’ ote mwa lifasi kaufela mwatas’a puso ya Mubuso wa Mulimu fahalimw’a batu.—Sinulo 7:9, 10.
|
