Lipaki za Jehova—Ki Batu Ba Ba Cwañi? Ba Lumelañi?

MULIMU u tuhelezi bumaswe, mi bolule-lule fa lifasi ba sweli ku bu eza ka bomu. Ka mutala, ba kalanga lindwa, ku tunyiseza banana limbomba, ku sinya lifasi-mubu, ni ku tahisa lukupwe. Bolule-lule ba zuba kwai mi i ba kulisa butuku bwa maswafu, ba sweli ku buka ni ku yambula matuku a sihule, ba imbotisa maswe macwala mi a ba tiseza butuku bwa sibiti, ni cwalo-cwalo. Batu ba ba cwalo ha ba tabeli luli kuli bumaswe kaufela bu feliswe. Ba bata fela kuli ze maswe ze bu tisa li feliswe. Ha ba kutula se ba cezi, ba liloka kuli: “Na kwa bumai!” Mi ba nyaza Mulimu, ka mo i bulelela Liproverbia 19:3 kuli: “Butanya bwa mutu bu mu kenya mwa nzila ye maswe, ibe pilu ya hae i nyemela [Muñ’a] Bupilo.” Mi Mulimu ha n’a ka yemisa bumaswe bo ne ba eza, ne ba ka bilaela kuli ha ba sa na tukuluho ya ku bu eza!

Libaka le lituna Jehova h’a tuhelezi bumaswe kikuli a alabe kañi ya Satani. Satani Diabulosi n’a bulezi kuli Mulimu n’a si ke a beya batu fa lifasi-mubu be ne ba ka sepahala ku Yena ha ba likiwa. (Jobo 1:6-12; 2:1-10) Jehova u tuhelela Satani ku zwelapili ku ba teñi kuli a be ni kolo ya ku pakela kañi ya hae. (Exoda 9:16) Satani u zwelapili ku tisa butata cwale, ku kwenula batu ku ba zwisa ku Mulimu, h’a nze a lika ku pakela kañi ya hae. (Sinulo 12:12) Nihakulicwalo, Jobo n’a zwezipili ku sepahala. Jesu ni yena n’a sepahalile. Bakreste ba niti cwale ba sepahala ni bona.—Jobo 27:5; 31:6; Mateu 4:1-11; 1 Pitrosi 1:6, 7.

Taba yeo i bonahala ku ba tolo fela ka libaka la kuli batu ba pilile mwa bumaswe ka lilimo ze mianda ye miñata-ñata, mi ka ku ya ka Bibele nto yeo haki tolo fela. Jehova n’a bupile lifasi-mubu ni ku bulelela batu kuli ba li taze ka banna ni basali ba ba lukile be ne ba ka babalela limela ni lifolofolo ze ku lona ni ku bukeleza ku buheha kwa lona mwa sibaka sa ku li shandaula. (Mu bone litaba ze li “Ba Lumelañi?” ni “Taba Ye Nde Ye Ba Bata Kuli Mu I Utwe.”) Ku fita k’u nga kuli Paradaisi yeo ye sepisizwe ki ye nde hahulu kuli mane ha i koni ku ba teñi, taba kikuli muinelo wa cwale o swabisa u maswe hahulu kuli mane ha u lukeli ku zwelapili. U ka yoliwa ki Paradaisi.

Tumelo mwa lisepiso zeo haki ku lumela-lumela kwa fela. “Tumelo i zwa kwa ku utwa.” Ka ku ituta Linzwi la Mulimu, butali bo bu ku lona bu fita fa ku bonahala mi tumelo ya hula.—Maroma 10:17; Maheberu 11:1.

Ze pumbuzwi mwa mubu ze ama Bibele li koñomeka ku nepahala kwa buñata bwa litaba ze mwa Bibele. Sayansi ya niti i lumelelana ni Bibele. Litaba za niti ze, ne li li mwa Bibele kale pili bocaziba ba silifasi ba si ka fita kale fa ku li ziba: ona mutatamanelo wa lika mo li fitile lifasi-mubu ha li nze li eziwa, kuli lifasi ki le li cica, kuli li mwa mbyumbyulu fela ku si na fo li tomile, ni kuli linyunywani za tutanga.—Genese, kauhanyo 1; Isaya 40:22; Jobo 26:7; Jeremia 8:7.

Bupolofita bo bu talelelizwe ki nto ye bonisa kuli Bibele i tahile ka moya wa Mulimu. Daniele n’a polofitile cimo za ku taha ni ku wa kwa mibuso ye m’ata mwa lifasi, hamoho ni nako ya n’a ka taha Mesiya ni ku bulaiwa. (Daniele, likauhanyo 2, 8; 9:24-27) Kacenu, bupolofita bo buñwi bu sa talelezwa, bo bu bonisa kuli a, ki “mazazi a maungulelo.” (2 Timotea 3:1-5; Mateu, kauhanyo 24) M’ata a ku zibela cimo lika cwalo h’a yo ku mutu. (Isaya 41:23) Haiba mu bata bupaki bo buñwi, mu bone libuka za The Bible—God’s Word or Man’s? ni Is There a Creator Who Cares About You?, ze hasanyizwe ki Watchtower Bible and Tract Society.

Mu lukela ku ituta Bibele ni ku i nahanisisa, inze mu kupa ku fiwa moya wa Mulimu kuli u mi etelele. (Liproverbia 15:28; Luka 11:9-13) Bibele i li: “Mutu ku mina h’a tokwa butali, a bu kupe ku Mulimu ya fanga batu kamukana ka bufani bo butuna, a sa kanani; mi u ka bu fiwa.” (Jakobo 1:5) Hape, ku na lihatiso ze tusa ku ituta Bibele ze ne mu ka eza hande ku li bala. Hañata tuso ya ba bañwi ya tokwahalanga, sina fani Filipi ha n’a lutile Muetopia. (Likezo 8:26-35) Lipaki za Jehova ba luta batu Bibele ili ba ba tabela, mwa mandu a bona, ku si na tifo. Mu lukuluhe ku kupa sebelezo yeo.

Bukutazi bwa Jesu ne bu lwanisizwe, mi n’a ize balateleli ba hae ni bona ne ba ka lwaniswa. Ba bañwi ha ne ba tabezi hahulu mulutelo wa Jesu, balwanisi ba bulapeli ne ba ba fetuzi kuli: “Kikuli ni mina mu pumilwe? Kwa manduna ni kwa bafalisi, kana ku na ni ya lumezi ku yena?” (Joani 7:46-48; 15:20) Ba bañata ba ba mi eleza kuli mu si ke mwa ituta ni Lipaki ha ba zibi hande za teñi kamba ba ba toile fela. Mu itute ni Lipaki mi mu iponele haiba kutwisiso ya mina ya Bibele i ka ekezeha kamba kutokwa.—Mateu 7:17-20.

Ha ba eza cwalo ba latelela mutala wa Jesu. N’a yanga kwa Majuda. Majuda ne ba na ni kale ni bulapeli bwa bona, kono mwa linzila ze ñata ne bu keluhile kwa Linzwi la Mulimu. (Mateu 15:1-9) Linaha kaufela li na ni bulapeli bo buñwi, ibe bo bu twi ki Bukreste kamba bo bu si bwa Sikreste. Ki kwa butokwa hahulu kuli batu ba be ni litumelo ze zamaelela ni Linzwi la Mulimu ka sibili, mi buikatazo bwa Lipaki bwa ku lika ku ba tusa ku eza cwalo bu bonisa kuli ba lata batu ba bañwi.

Mañi ni mañi ya sa keshebisi bulapeli bwa hae u nahana kuli ki bwa niti. Hakusicwalo, u swalisanelañi ni bona? Bakreste ba elezwa kuli: “Mu like linto kaufela, mi mu swale ze nde.” (1 Matesalonika 5:21) Mutu u swanela ku bona teñi kuli z’a lumela za kona ku yemelwa ki Mañolo, kakuli tumelo ya niti ki i liñwi fela. Maefese 4:5 i koñomeka taba yeo, ka ku bulela kuli “Mulena ki a li muñwi, tumelo ki i liñwi, kolobezo ki i liñwi.” Jesu n’a si ka lumelelana ni muhupulo wa miteñi ye wa ku nolofaza lika wa kuli ku na ni linzila ze ñata, ili bulapeli bo buñata, bo bu isa kwa puluso kaufela bona. Za n’a bulezi kikuli: “Munyako wa bupilo wa kumbana, nzila ye ya mwateñi ki ye sisani, mi ki ba banyinyani ba ba i fumana.” Lipaki za Jehova ba lumela kuli ba i fumani. Hakusicwalo, ne ba ka bata bulapeli bu sili.—Mateu 7:14.

Bolule-lule be se ba pilile mwa lilimo ze mianda-nda ye felile ili be ne ba si Lipaki za Jehova ba ka zuha kwa bafu ni ku ba ni kolo ya ku fumana bupilo. Ba bañata ba ba pila cwale ba kana ba yema kwa lineku la niti ni ku luka pili ‘ñalelwa ye tuna’ i si ka taha kale, mi ba ka piliswa. Hape, Jesu n’a ize lu si ke lwa nyazana. Luna lu talimela fela fahalimu; Mulimu u talima mwa pilu. U bona lika ka mo li inezi mi u atula ka mufelañeke. U siile ku atula mwa mazoho a Jesu, isiñi a luna.—Mateu 7:1-5; 24:21; 25:31.

Ka za linubu za mali, muapositola Paulusi n’a ize: “Mutu ni mutu a zwise mw’a hupulezi mwa pilu ya hae, isi ka ku bilaela, kamba ka ku hapelezwa; kakuli Mulimu u lata ya fana a tabile.” (2 Makorinte 9:7) Kwa Mandu a Mubuso ni libaka za mikopano ye mituna ya Lipaki za Jehova, ha k’u ngiwangi likoleko. Ku beiwanga tukwakwati ilikuli mutu ni mutu ya bata ku fa nubu ku mu bele bunolo ku i fa. Ha ku na ya ziba ze ba fa ba bañwi kamba haiba ku na ni ze ba fa. Ba bañwi ba kona ku fa ze ñata ku fita ba bañwi; ba bañwi ba kana ba sa kona ku fa nto ni ye kana. Jesu n’a bonisize mubonelo o munde ha n’a bulezi za sikwakwati sa pulukelo kwa tempele mwa Jerusalema ni bona be ne ba fa linubu, kuli: Sa butokwa ki buikoneli bwa mutu bwa ku fa ni moya wa ku fana, isiñi buñata bwa mali.—Luka 21:1-4.

Mutu h’a fita fa ku ba ni zibo ye ñata ka za Paradaisi ye sepisizwe ya fa lifasi-mubu mwatas’a Mubuso wa Kreste, u bata ku i taluseza ba bañwi. Ni mina mu ka bata ku eza cwalo. Yeo ki taba ye nde!—Likezo 5:41, 42.

Ku eza cwalo ki nzila ya butokwa ya ku bonisa ka yona kuli mu balutiwa ba Jesu Kreste. Mwa Bibele, Jesu u bizwa kuli ki “paki ye sepahala, ya niti.” Ha n’a li fa lifasi, n’a kutalize kuli: “Mubuso wa kwa lihalimu u sutelezi fakaufi,” mi n’a lumile balutiwa ba hae kuli ba eze nto ye swana. (Sinulo 3:14; Mateu 4:17; 10:7) Hasamulaho, Jesu a laela balateleli ba hae kuli: “Mu ye cwale, mu lute macaba kaufela, . . . mu ba lute.” Hape n’a polofitile kuli mafelelezo a si ka taha kale, “Evangeli ye ya mubuso i ka bulelwa mwa lifasi kaufela, ibe bupaki mwa macaba kamukana.”—Mateu 24:14; 28:19, 20.

Mikwa ya ku shaela ka yona taba ye nde yeo ki ye miñata. Ku ambola ni balikani ni lindambo hañata ku fanga kolo ya ku eza cwalo. Ba bañwi ba eza cwalo ka ku ñola mañolo kamba ka luwaile. Ba bañwi ba lumelanga ka poso libuka ze na ni litaba ze ba hupula kuli ndambo n’a ka li tabela hahulu. Kabakala ku bata kuli ba si ke ba tula mutu ni yo mukana, Lipaki ba ya fa ndu ni ndu ka yona taba yeo.

Bibele i fa memo ye lilato ye, ye li: “Moya ni munyaliwa ba li: Taha! Mi ni yena ya utwa a bulele, a li: Taha! Mi ya shwile linyolwa a tahe; ya lata, a nge fela kwa mezi a bupilo.” (Sinulo 22:17) Ku bulelela ba bañwi ka za lifasi-mubu le li li Paradaisi ni limbuyoti za lona ku na ni ku ezwa ka ku itatela, ili ka ku zwelela kwa pilu ye tezi takazo ya ku bata ku zibahaza yona taba ye nde yeo.

Lu kolwa kuli mu na ni lipuzo ze ñwi ka za Lipaki za Jehova ni ze ba lumela. Mwendi litaba ze ñwi li t’ata ku li utwisisa. Ne lu ka tabela ku alaba lipuzo za mina. Ha ku na hande sibaka mwa bukanyana ye, kacwalo lu mi mema ku buza Lipaki fa silalanda sa mina. Mwa kona ku eza cwalo ibe kwa mikopano ya bona ya kwa Ndu ya Mubuso kamba ha ba mi potela fa ndu ya mina. Kamba mwa kona ku lumela lipuzo za mina kwa Watch Tower, ka ku itusisa keyala ye swanela.