 |
Beliefs | Future | Medical | Topics | Contact Us | Publications | Languages |
NITI yañi? Niti ya lipuzo za butokwa hahulu ze ba buzanga batu. Mwendi ni mina mu kile mwa ipuza lipuzo ze cwale ka ze:
Ki kai ko mu kona ku fumana likalabo kwa lipuzo ze? Kuli mu buze batu mu ka fumana likalabo ze shutana-shutana. Kuli mu buze baluti ba likeleke mu ka fumana likalabo ze lwanisana. Mi mwa lifalana za libuka kamba mwa lintolo za libuka mu ka yo fumana libuka ze ñata-ñata ze twi li na ni likalabo. Kono mu ka fumana kuli libuka ze ñata za itwanisa. Ze ñwi li kona ku bonahala ku ba ze tusa kono hamulaho wa nakonyana fela li tokwanga ku ñolololwa sinca kamba ku yoliselelezwa.
Kono ku na ni buka i liñwi ye na ni likalabo ze sa cinci. Ki buka ya litaba za niti. Jesu Kreste ha na lapela ku Mulimu na ize: “Linzwi la hao ki yona niti.” (Joani 17:17) Linzwi leo kacenu ki yona Bibele. Fa makepe a latelela mu ka fumana likalabo ze utwahala za niti ze i fa Bibele kwa lipuzo ze fahalimu zeo.
LIBAKA BATU HA BA BUZA PUZO YE: Lu pila mwa lifasi le li tezi situhu, le li si ka luka. Bulapeli bo buñata bu luta kuli manyando e lu talimana ni ona a tile kabakala ku lata kwa Mulimu.
ZE I LUTA BIBELE: Mulimu ha tahisangi bumaswe. Jobo 34:10 i li: “Taba ya kuli Mulimu u ka eza bumaswe i kwahule, kamba Ya-Mata-Kaufela ku fosisa litaba.” Mulimu ka lilato la hae u lelezi batu lika ze nde. Kona libaka Jesu ha na lu lutile ku lapela kuli: “Ndat’a luna ya kwa lihalimu, . . . ku tahe mubuso wa hao; se si latwa ki Wena si ezwe mwa lifasi, mo si ezezwa kwa lihalimu.” (Mateu 6:9, 10) Mulimu u na ni taba ni luna luli kakuli mane u lu file mpo ya butokwa hahulu ilikuli a pete se si latwa ki yena.—Joani 3:16.
Mu bale ni Genese 1:26-28; Jakobo 1:13; ni 1 Pitrosi 5:6, 7.
LIBAKA BATU HA BA BUZA PUZO YE: Lindwa li sweli ku tutula batu. Kaufela luna lu utwa butuku kabakala manyando a batu.
ZE I LUTA BIBELE: Mulimu u sepisa kuli kwapili u ka tahisa kozo mwa lifasi kaufela. Mubuso wa Mulimu ha u ka kalisa ku busa lifasi kaufela, batu “ha ba sa na ku ituta ndwa.” Kono “ka mikwale ya bona ba ka tula mihuma.” (Isaya 2:4) Mulimu u ka felisa lika kaufela ze si ka luka ni manyando kaufela. Bibele i sepisa kuli: “[Mulimu] u ka takula miyoko kaufela kwa meto a bona; mi lifu ha li sa na ku ba teñi; nihaiba ku tahelwa ki maswabi ni ku lila, ni ku utwa butuku; kakuli za pili [ze kopanyeleza ni manyando ni ku sa luka kwa kacenu] li felile.”—Sinulo 21:3, 4.
Mu bale ni Samu 37:10, 11; 46:9; ni Mika 4:1-4.
LIBAKA BATU HA BA BUZA PUZO YE: Buñata bwa bulapeli bu luta kuli mutu u na ni nto ye ñwi ye zwelangapili ku pila hamulaho wa lifu. Ba bañwi ba lumela kuli ba ba shwile b’a kona ku holofaza ba ba pila mi ba bañwi ba li Mulimu u atulelanga ba ba maswe ku ya mwa lihele la mulilo mo ba yo tukufazwa ku ya ku ile.
ZE I LUTA BIBELE: Mutu ha shwile ha sa li yo. Muekelesia 9:5 i bulela kuli: “Ba ba shwile ha ba na se ba ziba.” Kabakala kuli bafu ha ku na se ba ziba mi ha ku na mo ba ikutwela, ha ba koni ku holofaza ba ba pila, kamba nihaiba ku ba tusa se siñwi.—Samu 146:3, 4.
Mu bale ni Genese 3:19 ni Muekelesia 9:6, 10.
LIBAKA BATU HA BA BUZA PUZO YE: Lu bata ku pila, mi lu bata ku ikola bupilo hamoho ni balatiwa ba luna. Kona libaka ha lu nyolelwa ku bonana hape ni balatiwa ba luna ba ba shwile.
ZE I LUTA BIBELE: Buñata bwa ba ba shwile ba ka zuha. Jesu na sepisize kuli ba ba li mwa mabita ba ka zuha. (Joani 5:28, 29) Ka ku lumelelana ni mulelo wa Mulimu wa kwa makalelo, ba ba ka zusezwa kwa bupilo ba ka fiwa kolo ya ku pila mwa paradaisi fa lifasi. (Luka 23:43) Ka ku ya ka sepiso yeo ba ba ka utwa Mulimu ba ka petahala mwa mubili ni ku pila ku ya ku ile. Bibele i li: “Ba ba na ni niti ba ka yola sanda sa naha, ni ku yaha mwateñi ku ya ku ile.”—Samu 37:29.
Mu bale ni Jobo 14:14, 15; Luka 7:11-17; ni Likezo 24:15.
LIBAKA BATU HA BA BUZA PUZO YE: Batu b’a lapelanga ibata iba mwa bulapeli kaufela. Niteñi ba bañata ba ikutwa kuli litapelo za bona ha li alabiwi.
ZE I LUTA BIBELE: Jesu na lu lutile ku sa kutela-kutelanga manzwi a swana ha lu lapela. Na ize: “Ha mu lapela, mu si ke mwa bulela-bulela.” (Mateu 6:7) Haiba lu bata kuli Mulimu a utwe litapelo za luna lu lukela ku lapela ka mukwa wa lumelelize. Kuli lu eze cwalo, lu swanela ku ituta tato ya Mulimu ni ku lapela ka ku lumelelana ni tato yeo. Liñolo la 1 Joani 5:14 li talusa kuli: “Ha lu kupa nto ka ku lata kwa [Mulimu], wa lu utwa.”
Mu bale ni Samu 65:2; Joani 14:6, 14; ni 1 Joani 3:22.
LIBAKA BATU HA BA BUZA PUZO YE: Ba bañata ba lumela kuli masheleñi, libubo, kamba bunde bwa ponahalo, za kona ku ba fa tabo. Kacwalo ba tukufalezwi linto zeo kono niha ba li fumana ha ba bangi ni tabo ye ne ba bata.
ZE I LUTA BIBELE: Jesu na patuluzi mwa ku fumanela tabo ha na ize: “Tabo ki ya ba ba lemuha butokwi bwa bona bwa kwa moya.” (Mateu 5:3, NW ) Tabo sakata i kona ku fumaneha fela haiba lu nga mihato ya ku felisa butokwi bwa luna bo butuna—bona bwa ku bata ku ziba niti ka za Mulimu ni za lelezi luna batu. Niti yeo i fumaneha mwa Bibele. Ku ziba niti yeo ku ka lu tusa ku lemuha lika za butokwa luli ni ze si za butokwa. Ka ku amuhela niti ya mwa Bibele kuli i lu zamaise ha lu eza likatulo ni mwa likezo za luna, lu ka pila bupilo bwa tabo.—Luka 11:28.
Mu bale ni Liproverbia 3:5, 6, 13-18 ni 1 Timotea 6:9, 10.
Lu nyakisisize fela ka bukuswani likalabo za mwa Bibele kwa lipuzo ze silezi ze lu fumani kwa makalelo. Kana mu sa tabela ku ziba ze ñata? Haiba mu ba bañwi ba batu “ba ba lemuha butokwi bwa bona bwa kwa moya,” mu zibe he mwa tabela. Mwendi mu sa na ni lipuzo ze ñwi ze cwale ka ze: ‘Haiba nji Mulimu u na ni taba ni luna, ki kabakalañi ha tuhelezi bumaswe ni manyando ku ata cwalo ku zwa kwamulaho ko? Ni swanela ku ezañi kuli ni kondolokise bupilo bwa lubasi lwa ka?’ Bibele i alaba lipuzo zeo ni ze ñwi ze ñata ka nzila ye kolwisa.
Kono ba bañata kacenu ba zina-zina ku bala Bibele. Ba i nga kuli ki buka ye tuna ye li t’ata ku i utwisisa fokuñwi. Kana mwa tabela ku tusiwa ku fumana likalabo mwa Bibele? Lipaki za Jehova li kona ku mi tusa ka linzila ze peli.
Nzila ya pili ki ya ku mi fa buka ya Bibele I Lutañi Luli? ye lukiselizwe ku tusa batu ba ba patehile kuli ba nyakisise likalabo ze namile ze i fa Bibele kwa lipuzo za butokwa. Ya bubeli ki tukiso ye si na tifo ya ku ituta Bibele fa ndu. Yo muñwi wa Lipaki za Jehova ya pila bukaufi ni mina ya ziba hande ku luta Bibele wa kona ku tahanga kwa ndu ya mina kamba kwa sibaka se mu tabela ni ku to nyakisisanga ni mina Bibele ka nakonyana sunda ni sunda mu sa tokwi ku lifa se siñwi. Bolule-lule ba batu mwa lifasi kaufela ba fumani tuso ka yona tukiso ye. Buñata bwa bona ba fitile fa ku bulela ka tabo kuli: “Ye kona niti!”
Ha ku na nto ya butokwa ye fita ku fumana niti ya mwa Bibele. Niti yeo i lu lukulula kwa litumelo za mioya, linto ze lyanganisa sicaba, ni kwa sabo ya ze sa swaneli. Hape ka yona niti yeo lu fumana sepo mwa bupilo, libaka le lu pilela, ni tabo. Jesu na ize: “Mu ka ziba niti, mi niti i ka mi lukulula.”–Joani 8:32.
I hatisizwe ka 2008 |
 |