Mulimu Ki Mañi?

1. Batu ba lapela lika ze ñata. Kono Bibele i lu bulelela kuli ku na ni Mulimu wa NITI a li muñwi fela. N’a bupile lika kamukana ze kwa lihalimu ni ze fa lifasi-mubu. Bakeñisa kuli u lu file bupilo, ki Yena fela ye lu swanela ku lapela.—1 Makorinte 8:5, 6; Sinulo 4:11.

2. Mulimu u na ni malumbatina a mañata kono u na ni libizo li li liñwi fela. Lona libizo leo ki JEHOVA. Mwa Libibele ze ñata, libizo la Mulimu li zwisizwe mwateñi mi se li yolisizwe ka malumbatina a MULENA kamba MULIMU. Kono Bibele ha ne i ñozwi, libizo la Jehova ne li fumaneha mwateñi ka buñata bo bu bat’o ba ha 7,000!—Exoda 3:15; Samu 83:18.

3. Jehova u na ni mubili, kono ha u swani ni ya luna. “Mulimu ki Moya,” ki mo i bulelela Bibele. (Joani 4:24) Moya ki muinelo wa bupilo bo bu pahami hahulu ku fita bwa luna. Ha ku na mutu ya kile a bona Mulimu. Jehova u pila kwa lihalimu, kono u kona ku bona lika kaufela. (Samu 11:4, 5; Joani 1:18) Cwale he, moya o kenile ki nto mañi? Haki mutu sina Mulimu. Ka ku fapahana, ki m’ata a’ sebeza a Mulimu.—Samu 104:30.

4. Bibele i patulula butu bwa Jehova ku luna. I bonisa kuli tulemeno twa hae to tu zwile mubano ki lilato, katulo ye lukile, butali, ni m’ata. (Deuteronoma 32:4; Jobo 12:13; Isaya 40:26; 1 Joani 4:8) Bibele i lu bulelela kuli hape ki y’a mukekecima, sishemo, ya swalela, ya fana ka butuna, ni ya na ni pilu-telele. Luna, ka ku swana sina bana ba ba ipeya ku utwa, lu swanela ku lika ku mu likanyisa.—Maefese 5:1, 2.

Lu ituta ka za Mulimu kwa pupo ni mwa Bibele

5. Kana lwa swanela ku kubamela ni ku lapela maswaniso a ku panga, a ku swanisa kamba lisupo mwa bulapeli bwa luna? Batili! (Exoda 20:4, 5) Jehova u bulela kuli lu lukela ku lapela yena fela. H’a na ku abana kanya ya hae ni mutu u sili ufi kamba ufi kamba nto isili ifi kamba ifi. Maswaniso h’a na m’ata a ku lu tusa.—Samu 115:4-8; Isaya 42:8.

6. Lu kona cwañi ku fita fa ku ziba hande Mulimu? Nzila ye ñwi ki ka ku talimisisa lika zeo a bupile ni ku nahana ka butungi ka za seo li lu taluseza. Ze bupilwe ki Mulimu li lu bonisa kuli u na ni m’ata a matuna ni butali. Lu bona lilato la hae ku zeo a tahisize kaufela. (Samu 19:1-6; Maroma 1:20) Nzila ye ñwi yeo lu kona ku ituta ka yona ka za Mulimu ki ka ku ituta Bibele. Ka yona u lu bulelela ze ñata hahulu ka za mufuta wa Mulimu y’o a li yena. Hape u lu bulelela ka za mulelo wa hae ni seo a bata kuli lu si eze.—Amosi 3:7; 2 Timotea 3:16, 17.

Copyright © 2008 Watch Tower Bible and Tract Society of Pennsylvania. All rights reserved.