Jesu Kreste Ki Mañi?

1. Jesu n’a pilile mwa lihalimu a li mutu wa moya pili a si ka taha kale fa lifasi-mubu. N’a li yena pupo ya pili ya Mulimu, mi kacwalo u bizwa “mweli” wa Mulimu. (Makolose 1:15; Sinulo 3:14) Jesu ki yena fela Mwana y’o Mulimu n’a bupile a nosi. Jehova n’a itusisize Jesu ya n’a si ka ba kale mutu wa fa lifasi-mubu sina ‘mubeleki wa hae yo mutuna’ mwa ku bupa lika ze ñwi kaufela ze kwa lihalimu ni fa lifasi-mubu. (Liproverbia 8:22-31; Makolose 1:16, 17) Mulimu hape n’a itusisize yena sina mubuleli wa Hae yo mutuna. Ki kabakaleo Jesu a bizwa “Linzwi.”—Joani 1:1-3; Sinulo 19:13.

2. Mulimu n’a lumile Mwan’a Hae fa lifasi-mubu ka ku shimbululela bupilo bwa hae mwa mba ya Maria. Kacwalo Jesu n’a si ka pepwa ki ndate ya li mutu wa fa lifasi-mubu. Ki kabakaleo n’a si ka hoza sibi kamba ku sa petahala kufi kamba kufi. Mulimu n’a lumile Jesu fa lifasi-mubu ka mabaka a malalu a: (1) Ku t’o lu luta niti ka za Mulimu (Joani 18:37), (2) ku t’o buluka busepahali bo bu petehile, ili ku fa mutala o na ni ku latelelwa ki luna (1 Pitrosi 2:21), ni (3) ku fana bupilo bwa hae sina sitabelo ili ku lu lukulula kwa sibi ni lifu. Ki kabakalañi seo ha ne si tokwahala?—Mateu 20:28.

3. Ka ku sa ipeya ku utwa taelo ya Mulimu, mutu wa pili, Adama, n’a ezize seo Bibele i biza “sibi.” Kacwalo Mulimu n’a mu atulezi lifu. (Genese 3:17-19) N’a fitile fa ku sa kwanisa lipimo za Mulimu, kacwalo n’a tuhezi ku ba ya petehile. A supala hanyinyani-hanyinyani mi a shwa. Adama n’a hozisize bana ba hae kaufela sibi. Ki kabakaleo ni luna ha lu supala, ku kula, ni ku shwa. Mufuta wa mutu ne u ka puluswa cwañi?—Maroma 3:23; 5:12.

4. Jesu n’a li mutu ya petehile inge mwa n’a bezi Adama. Niteñi, ka ku sa swana ni Adama, Jesu n’a ipeile ku utwa Mulimu ka bupetehi mane ni mwatas’a tiko ye tuna ka ku fitisisa. Kacwalo n’a kona ku fa sina sitabelo bupilo bwa hae bwa butu bwa fa lifasi-mubu ili ku lifa sibi sa Adama. Seo ki sona se i talusa Bibele kuli ki ‘tiululo.’ Bana ba Adama ne ba ka konwa ku lukululwa cwalo mwa katulo ya lifu. Batu kaufela ba ba lumela ku Jesu ba kona ku swalelwa libi za bona ni ku fumana bupilo bo bu sa feli.—1 Timotea 2:5, 6; Joani 3:16; Maroma 5:18, 19.

Bukombwa bwa Jesu ne bu kopanyelelize ku luta, ku eza limakazo, mi mane ni ku fana bupilo bwa hae kwa neku la luna

5. Ha n’a li fa lifasi-mubu Jesu n’a folisize bakuli, ku fepa ba ba lapile, ni ku kuzisa mañungwa. Mane n’a zusize ni bafu. Ki kabakalañi ha n’a ezize limakazo? (1) N’a utwela batu makeke ba ne ba nyanda, mi n’a bata ku ba tusa. (2) Limakazo za hae ne li file bupaki bwa kuli n’a li Mwan’a Mulimu. (3) Ne li bonisize s’a ka ezeza mufuta wa mutu o ipeya ku utwa ha ka busa sina Mulena wa lifasi-mubu.—Mateu 14:14; Mareka 2:10-12; Joani 5:28, 29.

6. Jesu n’a shwile mi n’a zusizwe ki Mulimu sina sibupiwa sa kwa moya, mi n’a kutezi kwa lihalimu. (1 Pitrosi 3:18) Mwa nako ya hamulaho wa f’o, Mulimu u mu bisize Mulena. Ona cwale-cwale fa Jesu u ka zwisa bumaswe ni manyando kaufela fa lifasi-mubu le.--Samu 37:9-11; Liproverbia 2:21, 22.

Copyright © 2008 Watch Tower Bible and Tract Society of Pennsylvania. All rights reserved.