Mu Kona ku Fumana Cwañi Bulapeli bwa Niti?

1. Jesu n’a kalisize bulapeli bwa Sikreste bwa niti bu li buñwi. Kacwalo kacenu ku lukela ku ba fela ni sitopa, kamba sikwata, si li siñwi sa balapeli ba Jehova Mulimu. (Joani 4:23, 24; Maefese 4:4, 5) Bibele i luta kuli ki batu ba sikai fela ba ba mwa nzila ye kumbani ye isa kwa bupilo.—Mateu 7:13, 14.

2. Bibele ne i bulezi cimo kuli hamulaho wa lifu la baapositola, lituto ze fosahezi ni likezo ze si za Sikreste ne li ka taha hanyinyani-hanyinyani mwa puteho ya Sikreste. Batu ne ba ka hoha balumeli kuli ba ba latelele mwa sibaka sa ku latelela Kreste. (Mateu 7:15, 21-23; Likezo 20:29, 30) Ki ka libaka leo ha lu bona bulapeli bo buñata hahulu bo bu fitana-fitana bo bu ipapata ku ba bwa Sikreste. Lu kona ku ziba cwañi Bakreste ba niti?

3. Sizibelo se si zwile mubano ka ku fitisisa sa Bakreste ba niti ki sa kuli ba latana luli. (Joani 13:34, 35) Ha ba si ka lutiwa ku nahana kuli ki ba bande ku fita batu ba mishobo kamba mibala ya litalo i sili. Hape ha ba lutiwi ku toya batu ba ba zwa kwa linaha li sili. (Likezo 10:34, 35) Kacwalo ha ba abani mwa lindwa. Bakreste ba niti ba sebelisana sina banabamba.—1 Joani 4:20, 21.

Bakreste ba niti ba latana, ba kuteka Bibele, mi ba kutaza ka za Mubuso wa Mulimu

4. Sizibelo se siñwi sa bulapeli bwa niti ki sa kuli lilama za bona ba kuteka hahulu Bibele. Ba i amuhela sina Linzwi la Mulimu mi ba lumela se i bulela. (Joani 17:17; 2 Timotea 3:16, 17) Ba nga Linzwi la Mulimu ku ba la butokwa ku fita mihupulo kamba lizo za batu. (Mateu 15:1-3, 7-9) Ba lika ku pila ka Bibele mwa bupilo bwa bona bwa ka zazi. Kacwalo ha ba kutazi nto ye ñwi ni ku eza i sili.—Tite 1:15, 16.

5. Bulapeli bwa niti hape bu lukela ku kuteka libizo la Mulimu. (Mateu 6:9) Jesu n’a tahisize kuli libizo la Mulimu, la Jehova, li zibwe ki ba bañwi. Bakreste ba niti ba lukela ku eza nto ye swana. (Joani 17:6, 26; Maroma 10:13, 14) Ki batu bafi mwa silalanda sa mina ba ba bulelelanga ba bañwi ka za libizo la Mulimu?

6. Bakreste ba niti ba lukela ku kutaza ka za Mubuso wa Mulimu. Jesu n’a ezize cwalo. Kamita n’a bulela ka za Mubuso. (Luka 8:1) N’a laezi balutiwa ba hae ku kutaza lushango lo lu swana l’o mwa lifasi-mubu kamukana. (Mateu 24:14; 28:19, 20) Bakreste ba niti ba lumela kuli ki Mubuso wa Mulimu fela o ka tisa kozo ni buiketo za niti fa lifasi-mubu le.—Samu 146:3-5.

7. Balutiwa ba Jesu ba lukela ku sa ba ba lifasi le li maswe le. (Joani 17:16) Ha ba ikenyi mwa litaba za bupolitiki za lifasi ni mikwangalakanyi ya za mipilelo ya nyangela. Ba pima mizamao, likezo, ni mibonelo ye holofaza ili ze atile mwa lifasi. (Jakobo 1:27; 4:4) Kana mwa kona ku ziba sikwata sa bulapeli mwa silalanda sa mina ili se si na ni lizibelo zeo za Bukreste bwa niti?

Copyright © 2008 Watch Tower Bible and Tract Society of Pennsylvania. All rights reserved.