O ā A‘oa‘oga Moni a le Tusi Paia?

IA TAGA‘I i se nusipepa. Ia maimoa i le TV, pe faafofoga fo‘i i le leitiō. O loo iai le tele o tala i solitulafono, taua ma faiga faatupu faalavelave. Ia mafaufau i mea o loo e atugalu ai. Atonu o loo e mafatia ona ua gasegase po ua maliu fo‘i se tasi e pele iā te oe. E ono pei oe o Iopu, o lē na fai mai ua ‘tumu ia i puapuaga.’—Iopu 10:15.

Fesili ifo iā te oe lava:

• Po o le finagalo lea o le Atua mo a‘u ma isi tagata?
• O fea ou te maua ai se fesoasoani mo o‘u faafitauli?
• Pe e iai ea se taimi o le a filemu ai le lalolagi?

E maua i le Tusi Paia tali faamalieloto i fesili nei.

O MEA NEI O LE A SUIA E LE ATUA I LE LALOLAGI, E TUSA AI MA LE A‘OA‘OGA A LE TUSI PAIA.

“E sōloiesea fo‘i e le Atua loimata uma i o latou mata; e leai fo‘i se toe oti, po o se faanoanoa, po o se auē, e leai fo‘i se toe puapuaga.”—Faaaliga 21:4

‘O le a osooso le pipili e pei o le aila.’ —Isaia 35:6

‘O le a faapupulaina mata o ē tauaso.’—Isaia 35:5

“E oo mai le aso e faalogo ai i lona leo o i latou uma ua i tuugamau, ma latou ō mai ai.”—Ioane 5:28, 29

“E lē fai mai fo‘i se tasi ua mau ai, Ou te ma‘i.” —Isaia 33:24

‘E tumutumu taumafa o saito i mauga.’—Salamo 72:16

AOGĀ O A‘OA‘OGA A LE TUSI PAIA

O mea o loo ta‘ua i inei, e lē na o ni mea o moomoo i ai. O folafolaga na a le Atua, ma ua ta‘ua i le Tusi Paia le auala o le a ia faataunuu ai.

E tele aogā o le Tusi Paia. E mafai ona e olioli i se olaga faamalieloto i le taimi nei ona o le Tusi Paia. Se‘i manatu ifo i mea o loo e fā‘atu ai ma ou faafitauli. Atonu ua lē lava lau faasoa, o faafitauli i lou aiga, ua apoia i ma‘i po ua maliu sē e pele iā te oe. E mafai ona fesoasoani le Tusi Paia iā te oe e faafetaia‘ia faafitauli i aso nei, ma saunia se mapusaga e ala i le taliina o fesili nei:

• Aiseā ua tatou mafatia ai?
• E faapefea ona tatou feagai ma popolega o le olaga?
• E faapefea ona fiafia atili o tatou aiga?
• O le ā le mea e tupu pe a tatou feoti?
• Po o le a tatou toe feiloa‘i ma ē pele ua maliliu?
• E faapefea ona tatou mautinoa o le a faataunuu e le Atua ana folafolaga i le lumana‘i?

O lou faitauina o lenei tusi, e faaalia ai o loo e fia malamalama i a‘oa‘oga a le Tusi Paia. O le a fesoasoani lenei tusi iā te oe. Ia mātau, e iai fesili o palakalafa i le pito i lalo o le itulau. E to‘atele tagata e fiafia e taga‘i i fesili na ma su‘e le tali, pe a talanoa ma Molimau a Ieova i le Tusi Paia. Matou te faamoemoe o le a e fiafia e fetufaa‘i faapena. Ia faamanuia le Atua iā te oe a o e su‘esu‘eina a‘oa‘oga moni a le Tusi Paia, lea e maua ai le lotomalie ma le olioli!

IA FAAMASANI I LAU TUSI PAIA

E 66 tusi o le Tusi Paia ua vaevaeina i mataupu ma fuaiupu ina ia faigofie ona e su‘eina. O loo tusia mau i totonu o lenei tusi, ma o le numera e sosoo i le igoa o le tusi o lona uiga o le mataupu lenā o le tusi, a o le isi numera o le fuaiupu. O se faaa‘oa‘oga, o le “2 Timoteo 3:16” o lona uiga o le tusi lona lua o Timoteo, mataupu e 3, fuaiupu e 16.

E vave lava ona e masani i lau Tusi Paia pe a su‘eina mau o loo iai i le tusi lenei. E faalaeiau fo‘i oe ina ia fai sau faasologa e faitau le Tusi Paia i aso ta‘itasi. Afai e tolu pe fā ni mataupu e te faitauina i aso ta‘itasi, e uma ane le tausaga, ua māe‘a ona e faitauina le Tusi Paia atoa.