 |
Beliefs | Future | Medical | Topics | Contact Us | Publications | Languages |
Lukim tu
TRU samting abaotem wanem? Abaotem olketa important kwestin wea pipol askem from bifor kam kasem distaem. Maet iu tu ting raonem olketa kwestin hia:
Hu nao bae iu askem for ansarem olketa kwestin hia? Nomata hu nao iu askem, olketa bae talem iu olketa difren ansa. Sapos iu askem pipol wea gogo long church or bigman long church, samting wea olketa talem bae no semsem. Samfala ansa wea olketa talem bae here stret long datfala taem, bat no longtaem bihaen hem no stret nao.
Bat wanfala buk hem stap wea garem olketa gudfala ansa for olketa kwestin hia. Disfala buk hem talem nomoa olketa tru samting. Taem Jesus Christ prea long God, hem talem olsem: “Toktok bilong iu nao tru.” (John 17:17) Bible nao datfala toktok. Long disfala pepa, iu bae lanem tru samting wea Bible talem for ansarem olketa kwestin hia.
WHY NAO DISFALA KWESTIN KAMAP: Iumi stap long world wea pipol raf tumas and no duim stret samting. Samfala religion talem hao God nao mekem iumi safa.
SAMTING WEA BIBLE TALEM: God no savve duim rabis samting. Job 34:10 talem olsem: “Hard tumas for tru God duim rabis samting, and for Olmaeti duim samting wea no stret!” God garem plan for showimaot hem lovem olketa man. Dastawe Jesus lanem iumi for prea olsem: “Dadi bilong mifala long heven, mifala . . . laekem kingdom bilong iu for kam. Duim samting wea iu plan for duim long earth, long sem wei wea iu duim datwan long heven.” (Matthew 6:9, 10) God barava tingim iumi tumas, dastawe hem duim evri samting for mekem plan bilong hem kamap tru.—John 3:16.
Lukim tu Genesis 1:26-28; James 1:13; and 1 Peter 5:6, 7.
WHY NAO DISFALA KWESTIN KAMAP: Staka pipol dae long olketa war wea gohed distaem. Iumi evriwan lukim and herem hao pipol safa.
SAMTING WEA BIBLE TALEM: God promisim hao peace bae kamap evriwea long earth. Taem Kingdom bilong Hem rulim earth, pipol bae no “lanem moa hao for faet.” Bat olketa bae “hammerim naef for faet bilong olketa for kamap hou.” (Isaiah 2:4) God bae finisim wei for safa and evri nara nogud samting. Bible talem disfala promis: “[God] bae aotem evri wata from eye bilong olketa, and no eniwan bae dae moa, and no eniwan bae sorre or krae or feel pain moa. Olketa samting long bifor [wea diswan hem wei for safa and evri nara nogud samting] bae nomoa nao.”—Revelation 21:3, 4.
Lukim tu Psalm 37:10, 11; 46:9; and Micah 4:1-4.
WHY NAO DISFALA KWESTIN KAMAP: Klosap evri religion lanem pipol hao bihaen wanfala man hem dae wanfala samting gohed for laef. Samfala tingse olketa wea dae finis savve spoelem olketa wea laef or God panisim rabis pipol long hellfire for olowe.
SAMTING WEA BIBLE TALEM: Taem man dae hem nomoa nao. Ecclesiastes 9:5 talem olsem: “Olketa wea dae finis no savve long eni samting.” Olketa wea dae finis no feelim eni samting, no savve duim eni samting, dastawe olketa no savve spoelem or helpem olketa wea laef.—Psalm 146:3, 4.
Lukim tu Genesis 3:19 and Ecclesiastes 9:6, 10.
WHY NAO DISFALA KWESTIN KAMAP: Iumi no laek for dae and iumi hapi for stap witim olketa wea iumi lovem. Hem stret nomoa for iumi barava laek lukim moa olketa wea iumi lovem wea dae finis.
SAMTING WEA BIBLE TALEM: Klosap evriwan wea dae finis bae laef bak. Jesus promisim hao olketa “wea God rememberim wea stap long grev bae . . . kamaot.” (John 5:28, 29) For fitim plan wea God garem firstaem, olketa wea laef bak bae garem chance for stap long paradaes earth. (Luke 23:43) Long paradaes, olketa wea obeyim God bae no sik and bae laef olowe. Bible talem olsem: “Olketa gudfala pipol nomoa bae stap long earth, and olketa bae stap long hem for olowe.”—Psalm 37:29.
Lukim tu Job 14:14, 15; Luke 7:11-17; and Acts 24:15.
WHY NAO DISFALA KWESTIN KAMAP: Pipol long staka religion olketa prea. Bat staka tingse no eniwan ansarem prea bilong olketa.
SAMTING WEA BIBLE TALEM: Jesus lanem iumi for no talem sem prea evritaem. Hem sei: “Taem iu prea, no talem sem samting evritaem.” (Matthew 6:7) Sapos iumi laekem God for herem prea bilong iumi, iumi mas prea long wei wea hem laekem. For duim olsem, iumi mas savve wanem nao God plan for duim and prea for datwan. Wan John 5:14 storyim olsem: “Sapos iumi askem eni samting followim wanem [God] plan for duim, hem bae herem iumi.”
Lukim tu Psalm 65:2; John 14:6, 14; and 1 John 3:22.
WHY NAO DISFALA KWESTIN KAMAP: Staka pipol tingse selen, bignem, or for luk naes hem savve mekem olketa hapi. So olketa aftarem olketa samting hia, bat olketa nating hapi nomoa.
SAMTING WEA BIBLE TALEM: Jesus talem trufala wei for man hapi: “Olketa wea luksavve olketa needim God bae hapi.” (Matthew 5:3) For iumi barava hapi iumi mas barava laek for savve long tru samting abaotem God and plan bilong hem for iumi. Bible nomoa storyim tru samting olsem. For savve long tru samting hia bae helpem iumi for luksavve wanem nao important and wanem nao no important. Taem iumi followim tru samting wea Bible talem, datwan bae helpem iumi for disaedem and duim samting wea mekem iumi hapi.—Luke 11:28.
Lukim tu Proverbs 3:5, 6, 13-18 and 1 Timothy 6:9, 10.
Iumi storyim samfala ansa nomoa from Bible for sixfala kwestin hia. Waswe, iu laek for savve long samfala ansa moa? Sapos iu “luksavve [iu] needim God,” iu bae laek for savve. Maet iu laek for savve tu long ansa long olketa nara kwestin olsem: ‘Sapos God tingim iumi, why nao hem letem olketa barava nogud samting gohed for longfala taem finis? Wanem nao mi savve duim for famili bilong mi stap gudfala moa?’ Bible garem olketa gudfala ansa for olketa kwestin hia and for staka nara kwestin moa.
Bat distaem, staka pipol no laek for studyim Bible. Olketa ting long hem olsem wanfala big buk wea hem no isi for minim. Waswe, iu laekem eniwan for helpem iu faendem olketa ansa long Bible? Olketa Jehovah’s Witness laek givim tufala samting for helpem iu.
Wanfala nao hem disfala buk Wanem Nao Really Samting wea Bible Teachim? Olketa wakem buk hia for helpem pipol for lukim stretfala ansa long Bible for olketa important kwestin. And mek-tu samting hem wanfala free Bible study. Wanfala Jehovah’s Witness wea savve hao for teachim Bible savve kam long haos bilong iu or long ples wea fitim and iusim lelebet taem evri week for storyim Bible witim iu and diswan hem free nomoa. Plande million pipol evriwea long world kasem gudfala samting finis from wanfala Bible study olsem. Staka long olketa hia hapi tumas and talem olsem: “Distaem nao mi savve long tru samting!”
No eni nara samting bae winim wanem iumi lanem long Bible. Tru samting long Bible savve mekem iumi for no fraet long olketa kastom biliv, for no konfius, and for no fraetem eni nogud samting. And tu hem savve mekem iumi hapi and for garem hope. Jesus talem olsem: “Iufala bae savve long tru samting, and tru samting bae mekem iufala free.”—John 8:32.
Olketa printim long 2008 |
 |