San Bijbel e leri wi trutru?

TE YU e leisi koranti, te yu e luku telefisi, noso te yu e arki radio, dan yu e si noso e yere so furu nyunsu fu ogridu, orloku, nanga ogri-ati sani di sma e du fu gens tirimakti. Prakseri yu eigi broko-ede. Kande yu e sari trutru fu di yu siki, noso fu di wan lobiwan fu yu kon dede. A kan taki yu e firi leki a bun man Yob, di ben taki dati a ben „sungu na ini bigi pina”.—Yob 10:15, The Holy Bible in the Language of Today.

Aksi yusrefi:

• Na disi Gado ben abi na prakseri gi mi èn gi a heri libisma famiri?
• Pe mi kan feni yepi fu lusu den problema fu mi?
• Wi kan abi a howpu taki oiti wi sa si vrede na grontapu?

Bijbel e gi krin piki tapu den aksi disi.

BIJBEL E LERI WI TAKI GADO SA TYARI DEN KENKI DISI KON NA GRONTAPU.

„A o figi ala watra puru na den ai, èn dede no sa de moro; nowan sari, noso krei, noso pen no sa de moro.”—Openbaring 21:4

„A malengriwan sa kren neleki wan dia.”—Yesaya 35:6

„Den ai fu den breniwan sa kon opo.”—Yesaya 35:5

„Ala den sma di de na ini den grebi . . . o komopo drape.”—Yohanes 5:28, 29

„Nowan sma di e libi drape sa taki: ’Mi siki.’”—Yesaya 33:24

„Aleisi sa de bogobogo na grontapu.”—Psalm 72:16

KISI WINI FU DEN SANI DI BIJBEL E LERI WI

No de gaw fu taki dati den sani disi, na sani di no kan kon tru noiti. Gado pramisi fu du den sani disi, èn Bijbel e sori fa a o du dati.

Ma Bijbel e meki yu kisi wini na tra fasi tu. Bijbel e sori san yu musu du fu libi wan trutru koloku libi na ini a ten disi srefi. Prakseri pikinso fu den broko-ede nanga den problema di yu abi. Kande yu abi problema na moni sei, noso problema na ini yu osofamiri, kande yu siki, noso kande wan lobiwan fu yu kon dede. Bijbel kan yepi yu fu lusu den problema fu a ten disi, èn a kan trowstu yu fu di a e gi piki tapu aksi leki den wan di e kon now:

• Fu san ede wi e pina?
• San kan yepi wi te wi e kisi fu du nanga den broko-ede fu a libi?
• Fa wi kan abi wan moro koloku osofamiri-libi?
• San e pasa nanga wi te wi dede?
• Oiti wi sa kisi na okasi baka fu si den lobiwan fu wi di dede?
• Fa wi kan de seiker taki Gado sa du san a pramisi fu du na ini a ten di e kon?

A leisi di yu e leisi a buku disi, e sori taki yu wani kon sabi san Bijbel e leri wi. A buku disi o yepi yu. Luku taki na ondrosei fu den bladzijde, yu abi aksi gi ibri paragraaf. Milyunmilyun sma e nyan bun fu a fasi fa Yehovah Kotoigi e studeri Bijbel nanga den, nanga yepi fu wan aksi-nanga-piki takimakandra. Wi e howpu taki yu sa nyan bun fu dati tu. Meki a de so taki Gado blesi yu, te yu e ondrofeni now o moi èn o switi a de fu kon sabi san Bijbel e leri wi trutru!

KON SABI YU BIJBEL MORO BUN

BIJBEL abi 66 buku nanga brifi na ini. Den buku nanga den brifi disi prati na ini kapitel nanga vers, so taki yu kan feni den tekst makriki. Te bijbeltekst kari na ini a buku disi, dan a fosi nomru di skrifi baka a nen fu a Bijbel buku noso a brifi, na a kapitel, èn a nomru baka dati na a vers. Fu eksempre, te yu si „2 Timoteyus 3:16”, dan dati e sori go na a di fu tu brifi gi Timoteyus, kapitel 3, vers 16.

Te yu e suku den bijbeltekst di kari na ini a buku disi, dan heri esi yu o sabi fa fu wroko nanga yu Bijbel. We, fu san ede yu no e seti sani tu fu leisi Bijbel ibri dei? Efu yu e leisi dri te go miti feifi kapitel na ini wan dei, dan yu kan leisi a heri Bijbel na ini wán yari.