Ifa An Kot we Kokkot ngeni Fonufan?

1. Jiowa a forata ei fonufan pwe aramas repwe tongeni pwapwaesini manauer tori feilfeilo chok. Seni le poputaan a mochen ewe fonufan an epwe ur ren aramas mi pwung me pwapwa. (Kol Fel 115:16; Aisea 45:18) Ewe fonufan esap talo; epwe nomofochelo.—Kol Fel 104:5; An Salomon Afalafal 1:4.

2. Mwen an Kot forata aramas, A filata eu kukkun kinikinin fonufan me awilalo ngeni eu paratis mi ling. A eita ngeni ewe manamanen Ichen. A aleenia ikewe ie ewe aemonun mwan me fefin, Atam me If. Kot a akkota pwe repwe nounou me auralo unusen ewe fonufan. Ekis me ekis repwe ita awilalo unusen fonufan pwe epwe eu paratis.—Keneses 1:28; 2:8, 15.

A poutulo ewe paratis

3. Atam me If ra tipis ren ar atai an Kot we alluk. Ina minne Kot a atowuur seni ewe manamanen Ichen. A poutulo ewe paratis. (Keneses 3:1-6, 23) Nge Jiowa ese monukalo an kokkot ngeni ei fonufan. A pwonei epwe wor paratis, ikewe aramas repwe tongeni manau ie tori feilfeilo chok. Epwe ifa ussun epwe fori ei mettoch?—Kol Fel 37:29.

4. Me mwen ei fonufan epwe tongeni wiliiti eu paratis, epwe lamot pwe ekkewe aramas mi ngau resap chuen nom. (Kol Fel 37:38) Ena mettoch epwe fis lon Armaketon, ina ewe maunen Kot epwe awesalo minne mi ngau ren. Mwirin, Setan epwe kalapus ukuukun 1,000 ier. Weween pwe esap chuen wor ekkewe mi ngau repwe aingaua fonufan. Noun Kot kewe aramas chok repwe nonnom.—Pwarata 16:14, 16; 20:1-3.

5. Iwe, Jises Kraist epwe wiiseni ewe wis King me nemeni fonufan ukuukun 1,000 ier. (Pwarata 20:6) Ekis me ekis epwe limetau tipis seni ach ekiek me inisich. Sipwe wiliiti aramas mi unusoch ussun chok Atam me If me mwen ar we ra tipis. Iwe, esap chuen wor semmwen, an aramas chinnapelo, me malo. Ekkewe aramas mi semmwen repwe pochokkulsefal, me ekkewe mi chinnap repwe sarafosefal.—Hiop 33:25; Aisea 33:24; Pwarata 21:3, 4.

6. Atun an Jises Nemenem ukuukun Engerou Ier, ekkewe aramas mi tuppwol repwe angang pwe unusen fonufan epwe wiliiti eu paratis. (Luk 23:43) Pwal eu, fitu milion aramas mi malo repwe manausefal won fonufan. (Fofor 24:15) Ika repwe foffori minne Kot epwe kutta seniir, repwe manau won fonufan tori feilfeilo chok. Ika resap, repwe maafochelo.—Jon 5:28, 29; Pwarata 20:11-15.

7. Ina minne epwe sopwoch an Kot kokkot ngeni fonufan. En mi mochen kuna ekkena feioch repwe fis lon fansoun mwach kkan? Ika ina, epwe lamot om kopwe kakkaeo ussun Jiowa me alleasochisi an kewe alluk. Kopwe tongeni kuna alillis le fori ena ren om fiffiti ekkewe mwich lon ewe Kingdom Hall an Chon Pwarata Jiowa.—Aisea 11:9; Ipru 10:24, 25.

Mwirin Armaketon, ewe fonufan epwe wiliiti eu paratis

Copyright © 2006 Watch Tower Bible and Tract Society of Pennsylvania. All rights reserved.