Eaha te opuaraa a te Atua no te Fenua?

1. Ua poiete Iehova i teie fenua ia ora te taata i nia iho e a muri noa ’tu. Ua opua oia e ia faaea-noa-hia te fenua e te feia parau-tia e te oaoa. (Salamo 115:16; Isaia 45:18) E ore roa te fenua e mou; e vai oia e a muri noa ’tu.—Salamo 104:5; Koheleta 1:4.

2. Hou te Atua i hamani ai i te taata, ua maiti Oia i te tahi vahi iti o te fenua e ua faariro ihora ei paradaiso nehenehe mau. Ua pii a‘era oia i teie vahi, te ǒ i Edene ra. I reira to ’na tuuraa i te tane e te vahine matamua, Adamu raua Eva. Ua opua te Atua e ia fanau raua i te tamarii e ia î te fenua. I te roaraa o te tau, e faariro ïa ratou i te fenua taatoa ei paradaiso.—Genese 1:28; 2:8, 15.

Paradaiso i moe

3. Ua hara Adamu raua Eva i to raua ofatiraa i te ture a te Atua ma te hinaaro mau. Ua tiahi ihora Iehova ia raua i rapae i te ǒ i Edene ra. Ua moe ïa te Paradaiso. (Genese 3:1-6, 23) Aita râ i moehia ia Iehova ta ’na opuaraa no teie fenua. Te tǎpǔ nei oia e faariro ia ’na ei paradaiso, i reira te taata e ora ’i e a muri noa ’tu. Nafea oia e faatupu ai i te reira?—Salamo 37:29.

4. Hou teie fenua e riro mai ai ei paradaiso, e tia ia tatarahia te feia iino. (Salamo 37:38) E tupu te reira i Aramagedo, oia hoi te tama‘i a te Atua no te faaore i te ino. I muri iho, e ruuruuhia Satani e 1 000 matahiti te maoro. Te auraa ra, aita e feia iino faahou no te faaino i te fenua nei. O te nunaa ana‘e o te Atua o te ora mai.—Apokalupo 16:14, 16; 20:1-3.

5. I reira ïa Iesu Mesia e faatere ai ei Arii i nia i te fenua nei e 1 000 matahiti noa ’tu. (Apokalupo 20:6) E faaore mǎrû noa oia i te hara mai roto mai i to tatou feruriraa e to tatou tino. E riro mai tatou ei mau taata tia mai ia Adamu raua Eva hou raua a hara ’i. I reira, aita faahou te ma‘i, te ruhiruhiaraa, e te pohe. E ora te feia ma‘i, e e apî faahou te feia paari.—Ioba 33:25; Isaia 33:24; Apokalupo 21:3, 4.

6. I roto i te Faatereraa Tausani Matahiti a Iesu, e ohipa te feia haapao maitai no te faariro i te fenua taatoa ei paradaiso. (Luka 23:43) Oia atoa, e mau mirioni taata pohe o te faatiahia mai no te ora i nia i te fenua nei. (Ohipa 24:15) Mai te peu e e rave ratou i ta te Atua e titau ra ia ratou, e tamau noa ïa ratou i te ora i nia i te fenua e a muri noa ’tu. Mai te peu e aita ra, e haamouhia ïa ratou e a muri noa ’tu.—Ioane 5:28, 29; Apokalupo 20:11-15.

7. I reira ïa te opuaraa matamua a te Atua no te fenua nei e manuïa ’i. Te hinaaro ra anei oe e fana‘o atoa i teie mau haamaitairaa i mua nei? Mai te peu e e, e tia ia oe ia tamau noa i te haapii no nia ia Iehova e ia auraro i ta ’na mau titauraa. E tauturu te haereraa i te mau putuputuraa i te Piha no te Basileia a te mau Ite no Iehova no to oe vahi, ia oe ia na reira.—Isaia 11:9; Hebera 10:24, 25.

I muri a‘e ia Aramagedo, e faarirohia te fenua ei paradaiso

Copyright © 2010 Watch Tower Bible and Tract Society of Pennsylvania. All rights reserved.