Ino ma Fanjakagnan’ny Zagnahary Zegny?

1. Tamy Jesosy tambony tany teto, nampianatra mpianatranany hivavaka mikasiky Fanjakagnan’ny Zagnahary. Fanjakagna zegny fitondrasagnan’ny mpanjaka araiky. Fanjakagnan’ny Zagnahary ndraiky hafa. Izio an-dagnitry agny fa hamehy tany jiaby ty. Izio hankamasigny agnaran’ny Zagnahary. Izio hagnatantairaka raha tian’ny Zagnahary hatao amy tany, karaha nahavitany an-dagnitry agny koa.—Matio 6:9, 10.

2. Zagnahary nampagnantaigna fa Jesosy hanjary Mpanjakan’ny Fanjakagna io. (Lioka 1:30-33) Tamin’izy tambony tany teto, hita tsarabe fa Mpanjaka tsara fagnahy sady marigny. Tsy niaraka navy tan-dagnitry tagny Jesosy fa mpanjaka edy. (Hebreo 10:12, 13) Tamy 1914 Jehovah vo nagnamia izy fahifagna nivolagniny io. Rango tamy fotoagna io Jesosy nitaondra tamy naha-Mpanjaka.—Daniela 7:13, 14.

3. Nisy lelahy ndraiky magnangy tsy nivadiky tamy Jehovah koa nifidiny handaiha an-dagnitry. Irô hiaraka hitaondra amy Jesosy amy maha-mpanjaka, mpitsara sady mpisôrogno. (Lioka 22:28-30; Apokalypsy 5:9, 10) “Ondry vitsy” nikahian’i Jesosy irô hiaraka manjaka aminany. Aifatra arivo sy aifatra aligny sy iray hetsy isan-drô.—Lioka 12:32; Apokalypsy 14:1-3.

4. Izikoa fa nanjary Mpanjaka Jesosy, nandroaka Satana ndraiky anjely ratsy jiaby niaraka taminany boaka tan-dagnitry tagny. Boaka iô, natsipiny tan-tany taty irô. Zegny aviany fiaignana mahairatsy fo rango tamy 1914. (Apokalypsy 12:9, 12) Lagaira, mosary, aretigny tsisy fagnafany ndraiky tsy fagnarahagna lalàgna, samy “lamariky” ahaizagna fa aifa mitaondra Jesosy, sady fara andra iziô.—Matio 24:3, 7, 8, 12; Lioka 21:10, 11; 2 Timoty 3:1-5.

5. Teteky iô Jesosy hitsara, hagnavaka olo karaha ataon’ny mpiambigny ôndrikôndriky magnavaka ôndrikôndriky ndraiky bengy. “Ôndrikôndriky” ivolagnana olo magneky fitondrasagnanany, kaila hahazo fiaignana tsisy farany. “Bengy” ndraiky ivolagnana olo tsy magneky Fanjakagnan’ny Zagnahary. (Matio 25:31-34, 46) Hifoagnan’i Jesosy irô jiaby io teteky iô. (2 Tesalonianina 1:6-9) Izikoa tianao agnisan’ny ‘ôndrikôndrikin’i Jesosy’, anao tsy maintsy mitandregny hafatra mikasiky Fanjakagna io, boaka iô magnaraka raha nianaranao.—Matio 24:14.

Laira mitaondra Jesosy, tsy hisy eky tsy fifankatiavagna na fagnavakavahagna

6. Amy ziôty, tany voazarazara faritry maro samy amy fanjakagnanany aby. Matetiky firenena miady amy firenena. Fa kanaifa, Fanjakagnan’ny Zagnahary hisolo pilasin’ny fanjakagnan’olombelogno jiaby. Izio zaraiky fo fanjakagna hitaondra tany jiaby ty. (Daniela 2:44) Tsy hisy eky lagaira, olo tsy fankatia na olo kafiry amy lairan’izegny. Olo jiaby hiaigny milamigny ndraiky hiadagna.—Mika 4:3, 4.

7. Agnatin’ny Fanjakagna Arivo Taognon’i Jesosy, olo hanjary tantairaka, tany jiaby paradisa. Amy faran’ny arivo taogno, vitan’i Jesosy raha jiaby nirahin’i Jehovah hataony. Hampodiny amy Babany amy zay Fanjakagna. (1 Korintianina 15:24) Tsy mba tianao hikoragna raha tsara hataon’ny Fanjakagnan’ny Zagnahary zegny amy kamaradinao ndraiky havanao?

Copyright © 2011 Watch Tower Bible and Tract Society of Pennsylvania. All rights reserved.