Magnataogna Zagnahary amy Vavaka

1. Dikan’ny mivavaka zegny, mikoragna amy Zagnahary. Anao tôkony mivavaka amy Zagnahary isan’andra beky tsy lavitry izy, karaha ataon’ny kamaradinao araiky tianao igny. Managna angôvo be Jehovah, kanaifa ndraiky zegny tsy misakana izy tsy itandregny vavaka ataotsika. Akôry anao, mba mivavaka aminany edy isan’andra?—Salamo 65:2; 1 Tesalonianina 5:17.

2. Vavaka agnisan’ny fanompoatsika Zagnahary. Dikan’izegny, Jehovah zaraiky fo tôkony hivavahatsika. Tamy Jesosy tambony tany teto, tamy Babany fo nivavahany fa tsy tamin’olo hafa. Zegny koa tôkony hataotsika. (Matio 4:10; 6:9) Kanaifa, vavaka ataotsika jiaby tsy maintsy atao amin’agnaran’i Jesosy. Zegny magnambara fa atsika magnaja toairagna Jesosy sady mino fagnatitry nataony hagnavaotagna atsika.—Jaona 14:6; 1 Jaona 2:1, 2.

3. Izikoa atsika mivavaka amy Zagnahary, koragnatsika tôkony boaka amy fô, fa tsy hatao tsianjery na vakigna amy boky. (Matio 6:7, 8) Tsy mifidy laira ndraiky pilasy fivavahagna amy Zagnahary, fa mila izy boaka amy fô ndraiky magnaja fo. Regnin’i Jehovah nata tsy mivolagna mare. (1 Samoela 1:12, 13) Tsara amy tany mangigny, tsisy tabataba izikoa magnano vavaka manaokana.—Marka 1:35.

4. Ino aby raha mety koragniny izikoa anao mivavaka? Raha jiaby mahatsara fihavagnanarô. (Filipianina 4:6, 7) Misy aohatra amy vavaka nampianarin’ny Tompo igny. Hitatsika ao fa atsika tôkony hivavaka mikasiky agnaran’i Jehovah ndraiky fikasagnanany. Atsika mety mangataka zay raha ilaitsika, familan-keloko ndraiky fagnampiagna beky tsy voantsory hagnano ratsy. (Matio 6:9-13) Tsy tôkony feno fitiavan-taigna koa fangatahagna ataotsika. Tôkony raha mifagnaraka amy sitrapôn’ny Zagnahary fo hangatahitsika amy vavaka.—1 Jaona 5:14.

5. Mety mivavaka anao isaka ti hankasitraka raha nataon’ny Zagnahary taminao, na ti hagnamia voninahitry izy. (1 Tantara 29:10-13) Anao tôkony hivavaka laira tôjo raha manahiragna ndraiky laira tsapaigna finoagnanao. (Salamo 55:22; 120:1) Anao mety mivavaka alohan’ny hihinagna. (Matio 14:19) Jehovah mikaiky atsika am-pitiavagna hikoragna aminany “amy fotoagna jiaby.”—Efesianina 6:18.

6. Taigna mila mivavaka amy Jehovah atsika izikoa nagnano fahotagna mahafaty. Atsika, amy fotoagna io, tôkony hangataka mare famindram-pô ndraiky familan-keloko. Izikoa atsika mifôno kay vôgnono tsy hagnampody eky, Zagnahary “vôgnono hagnambaila hadisovagna[tsika].”—Salamo 86:5; Ohabolana 28:13.

7. Olo marigny fo tandrignaisan’i Jehovah vavaka. Izikoa tianao zegny, mifaigna magnano raha tian’ny Zagnahary. (Ohabolana 15:29; 28:9) Tsy tôkony magnambony taigna izikoa mivavaka. (Lioka 18:9-14) Mifaigna magnano raha mifagnaraka amy vavakanao. Amy zegny hita fa anao managna finoagna sady ilainao ankitigny raha angatahinao amy vavaka io. Amy zegny fo Jehovah vo mamaly vavaka ataonao.—Hebreo 11:6.

Copyright © 2006 Watch Tower Bible and Tract Society of Pennsylvania. All rights reserved.