Sé maka Jesus Kristu?

1. Antes Jesus mai to’o Rai, nia moris iha lalehan nu’udar kriatura espíritu ida. Nia maka Maromak kria primeiru. Tan ne’e maka nia iha naran Maromak nia Oan “boot liu”, ou oan-primeiru. (Koloso 1:15; Apokalipse [Wahyu] 3:14) Jesus mak Oan mesak de’it ne’ebé Maromak kria rasik. Antes Jesus mai to’o Rai nu’udar ema ida, Jeová uza nia nu’udar ninia “serbisu-na’in boot liu” para kria buat hotu seluk iha lalehan no iha Rai. (Provérbios [Amsal] 8:22-31; Koloso 1:16, 17) Maromak uza Jesus nu’udar ema importante liu atu dehan sai Ninia liafuan sira. Tanba ne’e maka Jesus iha naran ‘Liafuan’. — Joao 1:1-3; Apokalipse [Wahyu] 19:13.

2. Maromak haruka Nia Oan mai Rai hodi muda nia moris husi lalehan ba Maria nia kabun. Nune’e Jesus la iha aman husi Rai. Tanba ne’e maka nia la hetan sala ida, maibé nia perfeitu. Maromak haruka Jesus to’o Rai tanba razaun tolu: (1) atu hanorin ita lia-loos kona-ba Maromak (Joao 18:37), (2) atu hamriik metin hodi halo tuir buat hotu ne’ebé Maromak hakarak, nune’e nia fó mai ita ezemplu, ou modelu ida atu tuir (1 Pedro 2:21), no (3) atu saran, ou sakrifika nia moris hodi salva ita husi sala no mate. Tansá maka presiza ida-ne’e? — Mateus 20:28.

3. Hodi la halo tuir Maromak nia ukun-fuan mak ema primeiru iha Rai, Adão, halo buat ne’ebé Bíblia bolu “sala”. Tan ne’e maka Maromak fó ba nia kastigu-mate. (Gênesis [Kejadian] 3:17-19) Nia la halo tuir tan Maromak nia lei sira, tan ne’e maka nia la perfeitu tan. Neineik-neineik nia sai katuas no mate. Adão hada’et sala ba nia oan sira hotu. Tanba ne’e mak ita mós sai ferik-katuas, hetan moras no mate. Oinsá mak ema bele hetan salvasaun? — Roma 3:23; 5:12.

4. Iha Rai, Jesus de’it mak ema perfeitu ida hanesan ho Adão. Maibé, la hanesan Adão, Jesus halo tuir Maromak iha buat hotu, maski nia hasoru tentasaun boot liu. Tan ne’e maka nia bele saran ninia moris nu’udar ema perfeitu atu selu Adão nia sala. Ida-ne’e buat Bíblia bolu ‘rezgate’. Hanesan ne’e, Adão nia oan sira bele livre husi kastigu-mate. Ema hotu ne’ebé tau fiar iha Jesus bele hetan perdua husi sala no simu moris rohan-laek. — 1 Timoteo 2:5, 6; Joao 3:16; Roma 5:18, 19.

Jesus nia serbisu inklui hanorin, halo milagre sira, no mós fó ninia moris mai ita

5. Kuandu Jesus iha Rai, nia kura ema moras, fó-han ema hamlaha no halo hakmatek anin-fuik. Nia mós halo moris fali ema mate. Tansá maka nia halo milagre sira? (1) Nia sente hanoin ba ema sira iha terus laran, no nia hakarak ajuda sira. (2) Ninia milagre sira hatudu katak nia maka Maromak nia Oan. (3) Milagre sira hatudu saida maka nia sei halo ba ema ne’ebé maka halo tuir nia bainhira nia ukun Rai nu’udar Liurai. — Mateus 14:14; Marcos 2:10- 12; Joao 5:28, 29.

6. Jesus mate no Maromak halo nia moris fali nu’udar kriatura espíritu ida, no nia fila fali ba lalehan. (1 Pedro 3:18) Depois tempu liutiha maka Maromak halo nia sai Liurai ida. Lakleur tan, Jesus sei hasai buat aat hotu no terus hotu husi Rai ne’e. — Salmo [Mazmur] 37:9-11; Provérbios [Amsal] 2:21, 22.

Copyright © 2010 Watch Tower Bible and Tract Society of Pennsylvania. All rights reserved.